អ្នកនាំពាក្យក្រសួងការពារជាតិ អះអាងថា ការផ្ទុះគ្រាប់សម្លាប់មនុស្ស នៅក្នុងបន្ទាយទ័ព ACO ស្ថិតនៅភូមិក្រឡាញ់ ឃុំមហាសាំង ស្រុកភ្នំស្រួចខេត្តកំពង់ស្ពឺ បណ្តាលមកពីផ្ទុះគ្រាប់មីន ក្នុងចំការមីនបន្ទាយ។
អ្នកនាំពាក្យក្រសួង លោក ឈុំ សុជាតិ បានឲ្យ VOD ដឹងនៅព្រឹកនេះថា មូលហេតុដែលបណ្តាលឲ្យមានការផ្ទុះសម្លាប់មនុស្ស២នាក់ និងរបួស៣នាក់កាលពីម្សិលមិញនោះគឺបណ្តាលមកពីការចូលទៅដោះមីនក្នុងចំការមីនបន្ទាយដោយពុំបានប្រុងប្រយ័ត្នទើបបណ្តាលឲ្យផ្ទុះបែបនេះ។
លោកថា៖ «គាត់ដើរទៅក្នុងព្រៃ គាត់ដើរទៅឃើញ គាត់ក៏លើកមើលក៏ផ្ទុះតែម្តង។ ធម្មតានៅកន្លែងទ័ពរថក្រោះហ្នឹង គេមានកន្លែងហ្វឹកហាត់ តែកន្លែងហ្នឹង វាដោះស្រាយមិនទាន់ចប់ គាត់ដើរដល់ផ្លូវហ្នឹង គាត់ឃើញគាត់អាងថាគាត់ចេះផង ទៅលើកឡើងក៏ផ្ទុះបណ្តោយទៅ»។
បើតាមរបាយការណ៍ប៉ូលិស កាលពីរសៀលថ្ងៃទី១៥ មីនា មានករណីផ្ទុះគ្រាប់មិនទាន់ផ្ទុះ ដែលបណ្តាលឲ្យលោក Aarou Sweeibu ភេទប្រុស អាយុ៤០ឆ្នាំ ជនជាតិអូស្ត្រាលី ជាគ្រូបង្គោល និង វរសេនីយ៍ទោ កុយ ម៉ូក ភេទប្រុស អាយុ៥២ឆ្នាំ ដែលជាយោធា និងជាគ្រូបច្ចេកទេសដោះមីន បានស្លាប់ ខណៈទាហានខ្មែរ២នាក់ និងជនជាតិតអូស្ត្រាលីម្នាក់ទៀតរងរបួសស្រាល៕