អាជ្ញាធរបន្ទាយមានជ័យបានដាក់កម្លាំងនគរបាលជំនាញនៅតាមច្រកព្រំដែននីមួយៗ ដោយថា ដើម្បីទប់ស្កាត់ទំនិញគេចពន្ធ និងទំនិញខូចគុណភាពដែលឈ្មួញលួចនាំចូលពីប្រទេសថៃ។
អភិបាលខេត្តបន្ទាយមានជ័យលោក សួន បវរ ប្រាប់វីអូឌីនៅថ្ងៃម្សិលមិញថា អាជ្ញាធរបានចុះពិនិត្យ តាមច្រកព្រំដែនមួយចំនួនដើម្បីទប់ស្កាត់ការនាំទំនិញគេចពន្ធ និងទំនិញខូចគុណភាព។ លោកបន្តថា ការចុះពិនិត្យនេះធ្វើតាមបញ្ជាថ្នាក់ដឹកនាំ ដោយសារកន្លងមកមានឈ្មួញបានលួចនាំទំនិញចូលនៅតាមច្រកទាំងនោះ។
លោកថា៖« វាចេះតែមានបន្តិចបន្តួត អញ្ចឹងហើយបានជាយើងទទួលបទបញ្ជាពីសម្ដេច យើងរឹតបន្តឹង អញ្ចឹង ហើយបានជាយើងដាក់ពង្រាយកងកម្លាំង ដើម្បីមានវិធានការរឹតបន្តឹង ប៉ុន្តែមួយរយៈ នេះគឺមិន ទាន់មានឃើញបាតុភាពអ្វីកើតឡើងនៅឡើយទេ»។
លោកបន្តថា ការចុះពិនិត្យតាមបន្ទាត់ព្រំដែន ធ្វើឡើងចាប់តាំងពីថ្ងៃទី១៩ ខែមីនា ហើយទីកន្លែងដែលត្រូវ ពិនិត្យ មានដូចជា ក្រុងប៉ោយប៉ែត ស្រុកអូរជ្រៅ ស្រុកស្វាយចេក ស្រុកថ្មពួក រួមទាំងក្រុងជាប់ព្រំដែន និងបិទច្រករបៀងខុសច្បាប់មួយចំនួនទៀត ដែលធ្លាប់មានបទល្មើសកើតឡើង។
មន្ត្រីសម្របសម្រួលសមាគមអាដហុកប្រចាំខេត្តបន្ទាយមានជ័យ លោក ស៊ុំ ចាន់គា ចាត់ទុកការចុះត្រួត ពិនិត្យរបស់អាជ្ញាធរថា ធ្វើឡើងឲ្យតែល្អមើលប៉ុណ្ណោះ ដោយសារ ទំនិញគេចពន្ធ និងទំនិញខូចគុណភាព ដូចជា សាច់មាន់ សាច់ទា សាច់ជ្រូករួមទាំងទំនិញផ្សេងទៀត ត្រូវបានឈ្មួញនាំ ចូលជារៀងរាល់ថ្ងៃ ដោយគ្មានការទប់ស្កាត់ឡើយ។
លោកថា៖«នៅតាមច្រកមហោស្របស្ថិតនៅក្នុងគោករមាសស្រុកថ្មពួកគឺចេញម៉ូតូដូចម្រាមដៃច្រកផ្សេងៗ ទៀតតាមបណ្ដាយព្រំដែនខ្មែរថៃចេញឡានផង ចេញម៉ូតូផង ចេញឈើក្រញូងផង សុទ្ធរបស់ គេចពន្ធប៉ុនការឆ្លើយ អាហ្នឹងពង្រឹងអី ថាមិនចាំបាច់ពង្រឹងអីធ្វើឲ្យវារឹងទៅ។ អនុវត្តទៅតាម ការបញ្ជា ឬក៏ចេញសេចក្ដីប្រកាសរបស់ក្រសួងមហាផ្ទៃ វាល្អពេកហើយ ប៉ុនប្រកាសខាងលើហើយ អាខាងក្រោមនេះ វាមិនប្រកាសអីនៅតែបើកនៅតែចំហដដែលហ្នឹង»។
ជាញឹកញាប់ មន្ត្រីកម្ពុជានៅតាមព្រំដែនជាប់ជាមួយថៃ តែងតែចាប់ឃាត់ទុក និងដុតបំផ្លាញចោលទំនិញដូចជា អាហារកំប៉ុង ជង្គង់មាន់ សាច់មាន់ជាដើម ដែលនាំចូលពីប្រទេសថៃ ក្រោយពេលពិនិត្យឃើញថា ទំនិញទាំងនោះខូចគុណភាព។
កាលពីថ្ងៃទី៧ ខែមីនា កន្លងមក មន្ត្រីនគរបាលប្រឆាំងបទល្មើសសេដ្ឋកិច្ច និង មន្ត្រីកាំកុងត្រូល បានដុតបំផ្លាញផលិតក្លែងក្លាយ និង ខូចគុណភាពទម្ងន់ជាង១០តោន បន្ទាប់ពីរឹបអូសបានពីឈ្មួញដែលចែកចាយនៅលើទីផ្សារ។ ការដុតនោះរៀបចំធ្វើឡើងនៅជាយរាជធានីភ្នំពេញ។
