រដ្ឋមន្រ្តីក្រសួងសាធារណៈការ និងដឹកជញ្ជូន លោក ស៊ុន ចាន់ថុល បានអំពាវនាវទៅដល់អ្នករស់នៅក្បែរផ្លូវរថភ្លើង និងអ្នកធ្វើដំណើរឆ្លងកាត់ ឲ្យប្រុងប្រយ័ត្នខ្ពស់ ដើម្បីជៀសផុតពីគ្រោះថ្នាក់ជាយថាហេតុ។
រដ្ឋមន្រ្តីក្រសួងសាធារណៈការរូបនោះ បានអំពាវនាវបែបនេះ ក្នុងពិធីសម្ភោធដាក់ឲ្យដំណើរការផ្លូវរថភ្លើងមួយខ្សែទៀតភ្ជាប់ពីក្រុងសិរីសោភ័ណ ទៅខេត្តបាត់ដំបងដែលមានប្រវែង ៦៥ គីឡូម៉ែត្រ នៅថ្ងៃទី ២៩ ខែ មេសានេះ។
លោក ស៊ុន ចាន់ថុល បានលើកឡើងថា៖ «ថ្ងៃនេះ ខ្ញុំស្នើសុំប្រជាពលរដ្ឋដែលរស់នៅតាមដងផ្លូវ ក៏ដូចអ្នកឆ្លងផ្លូវ រទេះភ្លើង សូមមានការប្រុងប្រយ័ត្នឲ្យមែនទែន ដោយសារទេះភ្លើងអត់មានហ្វ្រាំងជាន់ជាប់ដូចឡានទេ»។
ជាមួយគ្នានោះដែរ លោក ស៊ុន ចាន់ថុល ក៏បានលើកឡើងអំពាវនាវកុំឲ្យប្រជាពលរដ្ឋទៅលក់ឥវ៉ាន់ និងគេងនៅលើផ្លូវរថភ្លើង ដើម្បីជៀសវាងគ្រោះថ្នាក់នៅលើផ្លូវរថភ្លើង។
លោក ស៊ុន ចាន់ថុល ក៏បន្ថែមដែរថា ចាប់តាំងពីថ្ងៃទី០៤ ខែមេសា មកដល់ថ្ងៃនេះ គ្រោះថ្នាក់ចរាចរណ៍នៅលើផ្លូវរថភ្លើង បានកើតឡើងចំនួន ៣ដងរួចមកហើយ ដោយសារអ្នកបើកបរឆ្លងកាត់ផ្លូវរថភ្លើងមិនមានការប្រុងប្រយ័ត្ន មិនគោរពអទិភាពរបស់រថភ្លើង។
បន្ថែមលើនោះ លោកស៊ុន ចាន់ថុលក៏បានបង្ហាញពីគម្រោងដាក់ឲ្យដំណើរការនូវផ្លូវរថភ្លើងចំនួន ៣ខ្សែបន្ថែមទៀតក្នុងឆ្នាំ ២០១៨នេះ ដោយមួយខ្សែពីបាត់ដំបងទៅពោធិ៍សាត់នឹងដាក់ដំណើរការនៅថ្ងៃទី២៩ ខែ ឧសភាខាងមុខ ចំណែកមួយខ្សែទៀតពីពោធិ៍ទៅបាត់ដឹងខេត្តកំពង់ស្ពឺ នឹងដាក់ឲ្យដំណើរការនៅខែកក្ដដារខាងមុខ និងពីបាត់ដឹងមកភ្នំពេញផងដែរ៕
