កម្ពុជាទទួលចំណូលពីការលក់សំបុត្រចូលទស្សនាអង្គរវត្តបានជាង៤៨លានដុល្លារ ក្នុងរយៈពេល៤ខែដើមឆ្នាំ២០១៨នេះ កើន លើសឆ្នាំមុន២៣ភាគរយ ។
យោងតាមទីភ្នាក់ងារសារព័ត៌មានកម្ពុជា AKP ចេញផ្សាយកាលពីថ្ងៃទី២ ឧសភា ឲ្យដឹងថា ក្នុងរយៈពេល៤ខែ ឆ្នាំ២០១៨នេះភ្ញៀវទេសចរបរទេស បានចូលមកទស្សនារមណីយដ្ឋានអង្គរបានជាង ១លាននាក់ កើនឡើង១១ភាគរយ ខណៈដែលប្រាក់ចំណូលដែលបានពីការលក់សំបុត្រទទួលបាន ៤៨ ២៥៥ ៣១៩ (សែសិបប្រាំបីលានពីរសែនប្រាំម៉ឺនប្រាំពាន់បីរយដប់ប្រាំបួន) ដុល្លារអាមេរិក។
AKP ក៏បានឲ្យដឹងផងដែរថា ជាមួយនឹងចំណូលនេះប្រាក់ចំនួនជាង២លានដុល្លារត្រូវបានផ្តល់ឲ្យមូលនិធិគន្ធបុប្ផា ដើម្បីគាំទ្រការព្យាបាលជំងឺដល់កុមារកម្ពុជាផងដែរ។
របាយការណ៍ប្រចាំឆ្នាំរបស់គ្រឹះស្ថានអង្គរបានឲ្យដឹងថាចំណូលពីការលក់ប័ណ្ណចូលទស្សនាអង្គរនៅឆ្នាំ២០១៧ មានជាង១០៧លានដុល្លាអាមេរិក ដែលកើនឡើងជាង៧២ភាគរយបើធៀបទៅនឹងឆ្នាំ២០១៦ ខណៈទទួលភ្ញៀវបរទេសបានជាង២លាន៤សែននាក់ដែលកើនលើសឆ្នាំ២០១៦ ជិត១២ភាគរយ។
គួររំលឹកផងដែរថា បន្ទាប់ពីរដ្ឋាភិបាលបានដកហូតអង្គរវត្តពីការគ្រប់គ្រងដោយ ក្រុមហ៊ុនលោក សុខ គង់ មកវិញចាប់ពីថ្ងៃទី១ខែកុម្ភៈឆ្នាំ២០១៧ នោះ ការអនុវត្តន៍តម្លៃថ្មីនៃប័ណ្ណចូលទស្សនាអង្គរវត្ដបានកើនឡើង។ តម្លៃថ្មីនៃសំបុត្រចូលទស្សនាមួយថ្ងៃតម្លៃ៣៧ដុល្លារ បីថ្ងៃតម្លៃ៦២ដុល្លារ និង៧ថ្ងៃតម្លៃ៧២ដុល្លារ ខណៈតម្លៃចាស់នោះគឺ មួយថ្ងៃតម្លៃ២០ដុល្លារ បីថ្ងៃ៤០ដុល្លារ និងមួយសប្ដាហ៍៦០ដុល្លារ៕