កាលថ្ងៃសៅរ៍កន្លងទៅ លោក សេង កដិកា អ្នករៀបចំការប្រកួតប្រចាំនៅប៉ុស្ដិ៍លេខ៥ បានបង្ហាញការពេញចិត្តពេញថ្លើមយ៉ាងខ្លាំង ចំពោះការប្រកួតរវាងកីឡាករជើងថ្មី២រូប ដែលបើកការឆាកប្រយុទ្ធដាក់គ្នានៅលើសង្វៀន ក្រោមការរៀបចំរបស់លោក។ លោកបានទាំងហៅលទ្ធផលដែលស្ដែងឡើងដោយជើងថ្មីទាំង២ថាជាការប្រកួតជាគំរូ ដែលកីឡាករល្បីឈ្មោះខ្លះមិនអាចដូរបាននោះផង ជាពិសេសនៅពេលដែលអ្នកទាំងពីរមិនសំចៃដៃដាក់ គ្នាក្នុងការវាយលុក។
លោក សេង កដិកា និយាយថា លោកមានការរំភើបចិត្តយ៉ាងខ្លាំង បន្ទាប់ពីឃើញកីឡាករវ័យក្មេង២រូបគឺបង្គោលក្រហម លីន វិរៈ និង បង្គោលក្រហម តាំង សីហា ត្រូវបានលោកដាក់អោយប្រកួត ហើយអ្នកទាំងពីរប្រកួតគ្នាពេញទំហឹង។ ធៀបនឹងការប្រកួតរបស់កីឡាករជើងខ្លាំងចាស់វស្សានៅលើសង្វៀនដែលបានធ្វើឡើងក្នុងថ្ងៃដូចគ្នាកាលពីថ្ងៃទី៥ឧសភានោះ លោកថា កីឡាករវ័យក្មេង២រូប គឺ លីន វិរៈ ទទួលបានការចាប់អារម្មណ៍ពេញទំហឹងតែម្ដង បន្ទាប់ពីគេប្រើសមត្ថភាពវាយឈ្នះកីឡាករពូកែឌឺ តាំង សីហា ក្នុងពេលបង្គោលខៀវ តាំង សីហា ក៏បញ្ចេញថ្វីដៃមិនធម្មតាទម្រាំចាញ់ដោយពិន្ទុ។
ដ្បិតថាពួកគេឡើងប្រកួតគ្នា មិនមែនក្នុងនាមជាគូអន្តរជាតិ ឬជាគូប៉ះជាមួយកីឡាករល្បី តែលោកបញ្ជាក់ថាអាចនិយាយបានថាមិនមានអ្នកទស្សនាផ្ទាល់ណាម្នាក់ មិនសរសើរចំពោះមួយគូនេះទេ ដោយសម្រែកហ៊ោកញ្ជ្រៀវ និងការអបអរសាទរក្នុងពេលពួកគេវាយតប់ដាក់គ្នានៅលើសង្វៀននោះ គឺភស្ដុតាងស្រាប់។ មិនខុសពីលោកអះអាង សំឡេងហ៊ោកញ្ជ្រៀវបានកើតមានឡើងឡើងខ្ទរសង្វៀនប្រដាល់នាថ្ងៃនោះតែម្ដង ដែលអាចនិយាយបានកីឡាករមួយគូនេះបានក្លាយជាសមាសភាពដែលមានកម្រិតវាយលុកដក់ជាប់អារម្មណ៍មហាជនមិនធម្មតា ដែលផ្ទុយពីកីឡាករល្បីឈ្មោះមួយចំនួន ឡើងប្រកួតមិនអស់ដៃ ហើយទទួលរងនូវការរិះគន់។
កីឡាករ លីន វិរៈ ដែលជាអ្នកឈ្នះបានក្លាយជាកីឡាករកីឡាករលេចធ្លោរ ព្រោះតែជ័យជម្នះដែលខ្លួនទទួលបាន គឺបានដោយលំបាក។ ស្ទើរតែគ្រប់អ្នកអង្គុយទស្សនាសុទ្ធតែដកកចំហរមាត់មិនតិចនាក់ទេ ក្នុងពេលសកម្មភាពប្រកួតរបស់អ្នកទាំងពីរមានភាពស្វិតស្វាញពេញរយៈ៥ទឹក ជាពិសេសក្នុងទឹកទី៤ ដែលអ្នកឈ្នះក៏លេងចាស់ដៃ ហើយអ្នកចាញ់ក៏វាយមិនខ្លាចគ្រោះថ្នាក់។
លោក សេង កដិកា និយាយថា អ្នកទាំងពីរមិនទាន់ប្រកួតបានច្រើនលើកផង តែទទួលបានការចាប់អារម្មណ៍បានច្រើនដល់ម្លឹងទៅហើយ ចុះទម្រាំមានឱកាសឡើងប្រកួតគ្នាបានច្រើនជាងនេះ តើនឹងល្អយ៉ាងណា។
អ្នកទាំងពីរក៏ស្ថិតក្នុងវ័យដែលអាចបណ្ដុះអោយក្លាយជាធនធានរបស់កម្ពុជាសម្រាប់ព្រឹត្តិការណ៍ស៊ីហ្គេម ដែលកម្ពុជាធ្វើជាម្ចាស់ផ្ទះក្នុងឆ្នាំ២០២៣ផងដែរ ទើបលោកយល់ថាវត្តមានកីឡាករថ្មីៗតែវាយខ្លាំងគឺជារឿងល្អបំផុតសម្រាប់វិស័យប្រដាល់ ដែលលោកនឹងយកមកលើកស្ទួយ។ លោកថា មកទល់សព្វថ្ងៃដ្បិតថា សង្វៀនប្រដាល់មានការរីកចំរើន ប៉ុន្តែធនធានថ្មី ដែលមានសមត្ថភាពមានមិនសូវច្រើនទេ ខណៈដែលកីឡាករជើងចាស់ក៏ចាប់ផ្ដើមបាត់មុខម្ដងម្នាក់ៗ ហើយអ្នកដែលនៅក៏មានសមត្ថភាពធ្លាក់ដៃមិនសូវខ្លាំងក្លាបានយូរ។
យ៉ាងណាមិញ លោកក៏សម្ដែងការបារម្ភខ្លាចកីឡាករល្អៗដូច លីន វិរៈ និងតាំង សីហា លេចមុខនៅក្នុងពិភពប្រដាល់បានតែមួយរយៈ ហើយមិនរង់ចាំរហូតទាល់តែបានល្បីឈ្មោះសិនដែរ បើទោះជាកីឡាករទាំងពីរបានប្រកាសនៅក្រោយការប្រកួតថានឹងតស៊ូនៅក្នុងវិស័យប្រដាល់មិនដកថយ៕