លោកនាយករដ្ឋមន្ត្រីហ៊ុន សែន ហៅអ្នកណែនាំពលរដ្ឋមិនឲ្យទៅបោះឆ្នោតថ្នាក់ជាតិខាងមុខថា ជាជនអគតិ និងមានបំណងបំផ្លាញប្រជាធិបតេយ្យនិងឆន្ទះរបស់ប្រជាពលរដ្ឋ។
លោកនាយករដ្ឋមន្ត្រីបានសរសេរនៅលើទំព័រហ្វេសបុករបស់លោកនៅព្រឹកថ្ងៃទី ១៦ ឧសភា នេះថារហូតមកដល់ពេលនេះមានគណបក្សនយោបាយចំនួន៥ បានចុះឈ្មោះ និងទទួលស្គាល់ជាផ្លូវការពីគ.ជ.ប រួចរាល់ហើយ ខណៈនៅមានគណបក្សមួយចំនួនទៀតកំពុងពិនិត្យបែបបទនៅ គ.ជ.ប។
លោកក៏បានប្រៀបធៀបការបោះឆ្នោតកន្លងទៅនៅអឺរ៉ុប និងអាមេរិក ថាមានអ្នកទៅ បោះឆ្នោតមិនដល់ពាក់កណ្តាលប្រទេសនោះទេ ខណៈកម្ពុជាមានអ្នកទៅបើឆ្នោតដល់ទៅ ៦៩ភាគរយដោយថាជាការរីកចម្រើននៃលិទ្ធិប្រជាធិបតេយ្យនៅកម្ពុជា។ លោកក៏បានចោទប្រកាន់អ្នកដែលណែនាំមិនឲ្យពលរដ្ឋទៅបោះឆ្នោតជាជនអគតិ ដែលមានបំណងបំផ្លាញដល់លទ្ធិប្រជាធិបតេយ្យនៅកម្ពុជា។
លោក ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា
ការឆ្លើយតបរបស់លោកហ៊ុន សែន នៅពេលនេះគឺធ្វើឡើងបន្ទាប់យុទ្ធនាការប្រឆាំងការបោះឆ្នោតថ្នាក់ជាតិថ្ងៃទី២៩ កក្កដា ខាងមុខរបស់លោកសម រង្ស៊ី កាន់តែខ្លាំងក្លាឡើង។
ក្នុងការថ្លែងរបស់លោក សម រង្ស៊ី កាលពីថ្ងៃទី ១៣ ឧសភា នៅរដ្ឋកាលីហ្វ័រញ៉ា សហរដ្ឋអាមេរិក លោកបានថ្លែងថា អ្នកដែលបំផ្លាញលទ្ធិប្រជាធិបតេយ្យគឺលោកហ៊ុន សែនទៅវិញទេ ដោយសារតែលោកបានរំលាយគណបក្សសង្គ្រោះជាតិដែលមានប្រជាពលរដ្ឋគាំទ្រជិតពាក់កណ្តាលប្រទេស ហើយជាពិសេសឈប់ឲ្យគណបក្សនេះធ្វើនយោបាយបានទៀតនោះ។
លោកសម រង្ស៊ី ក៏បានបញ្ជាក់ផងដែរថា ការបោះឆ្នោតនាពេលខាងមុខគឺមិនបានឆ្លុះបញ្ជាំងពីឆន្ទៈរាស្ត្រនោះទេ ដោយស្នើឲ្យពលរដ្ឋដែលគាំទ្រគណបក្សសង្គ្រោះជាតិធ្វើពហិការកុំទៅបោះឆ្នោត។
លោកសម រង្ស៊ី អតីតមេដឹកនាំគណបក្សសង្គ្រោះជាតិ
អ្នកតាមដាននយោបាយលោក ឯម សុវណ្ណារ៉ា មានប្រសាសន៍ថាការលើកឡើងខ្វែងគ្នានេះ កំពុងតែបង្កើនសម្ពាធសម្រាប់ប្រជាពលរដ្ឋ ដោយសារក្នុងចំណោមអ្នកដែលគាំទ្របក្សសង្គ្រោះជាតិមួយចំនួនក៏មានសមាសភាពជាសមាជិកបក្សកាន់អំណាចផងដែរ។ លោកថា អ្នកនយោបាយគួរតែពិចារណាពីតម្រូវការប្រជាពលរដ្ឋជាជាងជំរុញឲ្យពលរដ្ឋទៅបោះឆ្នោត ឬមិនទៅបោះឆ្នោតនោះ។
លោកថា៖ « នៅក្នុងសមាភាពនៃសំឡេងរបស់បក្សប្រជាជនមាន៥ ទៅ៦លានតែការបោះឆ្នោតបានតែ៣លានទេ។ អញ្ចឹងនៅក្នុងសមាជិកគណបក្សប្រជាជនមួយចំនួនដែលមិនគាំទ្រ គាត់នៅតែទៅ បោះឆ្នោតដដែលទេ ទោះបីគាត់មិនពេញចិត្តទៅលើការដឹកនាំមួយចំនួន ឬការសម្រេចចិត្តផ្សេង គាត់អាចជ្រើសរើសផ្សេង ឬក៏អនុបវាទអីទៅ តែរឿងការបោះឆ្នោតគាត់នៅតែទៅទេ។ ក៏ប៉ុន្តែធ្វើយ៉ាងមិចឲ្យពលរដ្ឋមានសេរីភាព ឬហៅថាភាពងាយស្រួលក្នុងការបង្ហាញឆន្ទៈខ្លួនឯង អ្នកនយោបាយទាំងអស់គួរតែពិចារណាតាមតម្រូវការប្រជាពលរដ្ឋ ព្រោះបើមិនឆ្លើយតបតាមតម្រូវការប្រជាពលរដ្ឋ អ្វីៗគ្រាន់តែអាចលាក់បាំងតែមួយរយៈកាលទេ រយៈកាលក្រោយមកប្រជាពលរដ្ឋនៅតែអាចទាមទារបានដែលទេ » ។
បន្ទាប់ពីអវត្តមានគណបក្សសង្គ្រោះជាតិក្នុងការបោះឆ្នោតថ្នាក់ជាតិខាងមុខនេះ កម្តៅនយោបាយនៅកម្ពុជាហាក់កាន់តែកើនឡើងកាន់តែខ្លាំង ដែលធ្វើសហគមន៍អន្តរជាតិមួយចំនួន និងអ្នករាយការណ៍ពិសេសផ្នែកសិទ្ធិមនុស្សប្រចាំកម្ពុជាផងក៏បានបង្ហាញក្តីបារម្ភពីការបោះឆ្នោតនាពេលខាងមុខថាពុំអាចឆ្លុះបញ្ហាំងពីឆន្ទះប្រជាពលរដ្ឋនោះទេ។
ម្ចាស់ជំនួយធំមួយរបស់គ.ជ.ប គឺប្រទេសជប៉ុន ក៏បានជំរុញកម្ពុជាឲ្យរៀបចំការបោះឆ្នោតដោយសេរី ត្រឹមត្រូវ និងយុត្តិធម៌ ដោយថា ដើម្បីឆ្លុះបញ្ចាំងពីឆន្ទៈពិតប្រាកដរបស់ប្រជាពលរដ្ឋ ហើយក៏បញ្ជាក់ថា ជប៉ុននឹងបន្តតាមដានស្ថានការណ៍វិវត្តន៍នៅកម្ពុជានេះផងដែរ៕