ប្រធានាធិបតីអាមេរិកវ័យ៧១ឆ្នាំ ដែលបានឡើងកាន់តំណែងកាលពីដើមឆ្នាំ២០១៧នោះ ធ្វើឲ្យពិភពលោកចាប់អារម្មណ៍ខ្លាំង លើសកម្មភាពរបស់លោក គឺធ្វើអ្វីៗគ្រប់យ៉ាងដើម្បីប្រយោជន៍អាមេរិក(American First) ដោយកាត់បន្ថយលើសកម្មភាពកិច្ចការមនុស្សធម៌ បរិស្ថាន និងពង្រឹងលទ្ធិប្រជាធិបតេយ្យនៅតាមបណ្តាប្រទេសផ្សេងៗ តាមរយៈការលុបចោលឬ កាត់បន្ថយជំនួយ។
តាមរយៈពាក្យសម្តី និងការឈ្លោះជាមួយមន្ត្រីរបស់លោក បន្តបន្ទាប់នោះ លោកត្រាំក៏អាចចាត់ទុកថា ជាមនុស្សឆេវឆាវមួយរូបដែរ ហើយពេលខ្លះមន្ត្រីដែលស្និទ្ធក៏ធ្លាប់ហៅថា លោកមនុស្សមានបញ្ហាខួរក្បាលទៀតផង។
ក្នុងពេលយុទ្ធនាការឃោសនាបោះឆ្នោតកាលពីឆ្នាំ២០១៦លោក ត្រាំ ក៏ធ្លាប់ស្នើសុំជួបជាមួយលោក គីម ជុងអ៊ុនដែរ ដើម្បីដោះស្រាយបញ្ហាអាវុធនុយក្លេអ៊ែ ប៉ុន្តែពេលនោះលោក ត្រាំ ហាក់ស្នើឡើងដើម្បីឲ្យមានការចាប់អារម្មណ៍ពីម្ចាស់ឆ្នោតតែប៉ុណ្ណោះ។
ក្នុងអំឡុងឆ្នាំ២០១៧ ពេលដែលកូរ៉េខាងជើងផ្ទុះកំហឹងខ្លាំង ហើយសាកល្បងអាវុធមីស៊ីល និងនុយក្លេអ៊ែជាបន្តបន្ទាប់ហើយធ្លាប់ព្រមានបាញ់កម្ចេចដល់អាមេរិកនោះ រដ្ឋការរបស់លោកត្រាំក៏បានជំរុញឲ្យសម្ព័ន្ធមិត្តជួយដាក់សម្ពាធកូរ៉េខាងជើងឲ្យចូលតុចរចា។
ការប្រកួតកីឡាអូឡាំពិករដូវត្រជាក់នៅកូរ៉េខាងត្បូង
សារជូនពរថ្ងៃឆ្លងឆ្នាំសកល២០១៧ចូល២០១៨ របស់លោក គីម ជុងអ៊ុន ធ្វើឲ្យពិភពលោកភ្ញាក់ផ្អើលនោះ គឺលោក បញ្ជាក់ថា កូរ៉េខាងជើងបញ្ជូនកីឡាកររបស់ខ្លួនចូលរួមប្រកួតមិត្តភាពដែលរៀបចំ ដោយកូរ៉េខាងត្បូង ដែលនោះជាសញ្ញានៃភាពត្រូវរ៉ូវគ្នាវិញ។
ឥរិយាបថទន់ភ្លន់នេះ ធ្វើឲ្យឈានដល់មេដឹកនាំកូរ៉េខាងជើងលោក គីម ជុងអ៊ុន និង មេដឹកនាំកូរ៉េខាងត្បូងលោក មូន ជែអ៊ីន ជួបគ្នាកាលពីថ្ងៃទី២៧ខែមេសា ហើយលោក គីម គ្រោងជួបលោក ត្រាំនៅថ្ងៃទី១២ខែមិថុនា។
សមយុទ្ធរួមគ្នារវាងកូរ៉េខាងត្បូងនិងអាមេរិក
តាមកាលបរិច្ឆេទ សមយុទ្ធរួមគ្នារវាងសហរដ្ឋអាមេរិក និងកូរ៉េខាងត្បូង ត្រូវធ្វើឡើងតាំងពីដើមឆ្នាំ ប៉ុន្តែដោយដឹងថា រាល់ការធ្វើសមយុទ្ធនេះតែងតែធ្វើឲ្យកូរ៉េខាងជើងផ្ទុះកំហឹង ក៏ផ្អាកទៅវិញ ដើម្បីឲ្យកូរ៉េខាងជើងចូលរួមកីឡាអូឡាំពិក។
ឥរិយាបថមួយ កាលពីថ្ងៃទី២០ខែមេសា លោក គីម ជុងអ៊ុន ប្រកាសឲ្យមន្ត្រីក្រោមបង្គាប់ផ្អាកការសាកល្បងអាវុធគ្រប់ប្រភេទ ដើម្បីបើកផ្លូវចរចា។ ប៉ុន្តែលោកត្រាំ បែរជាព្រមានថា នឹងដើរចេញពីការចរចា ហើយរើសយកផ្លូវសង្គ្រាមវិញបើការចរចាមិនបានផល ទន្ទឹមនឹងនោះលោក ត្រាំ នៅតែអំពាវនាវឲ្យសម្ព័ន្ធមិត្តបន្តដាក់ទណ្ឌកម្មលើកូរ៉េខាងជើងឲ្យធ្ងន់ធ្ងរបំផុតរហូតដល់កម្មវិធីអាវុធនុយក្លេអ៊ែរបស់ប្រទេសនេះត្រូវរំលាយចោលជាផ្លូវការ។
នៅក្នុងខែឧសភា ការធ្វើសមយុទ្ធរវាងអាមេរិកនិងកូរ៉េខាងត្បូង ចាប់ផ្តើមឡើង ហាក់ដុតកម្តៅដល់កូរ៉េខាងជើង នាំឲ្យកូរ៉េខាងជើងចេញសេចក្តីថ្លែងការថ្កោលទោសជាបន្តបន្ទាប់ រហូតដល់ព្រមានប្រើប្រាស់កម្មវិធីអាវុធនុយក្លេអ៊ែជាថ្មីទៀត។
ឈានដល់ដំណាក់កាលចុងក្រោយនៅថ្ងៃទី ២៤ខែឧសភាម្សិលមិញ លោក ដូណល ត្រាំ ប្រធានាធិបតីអាមេរិក បានចេញសេចក្តីថ្លែងការណ៍មួយដោយបញ្ជាក់ថា លោកលុបចោលគម្រោងជួបជាមួយលោក គីម ជុងអ៊ុន នៅថ្ងៃទី១២ខែមិថុនា នៅក្នុងប្រទេសសិង្ហបុរី ដោយសារ មិនសប្បាយចិត្តជាមួយសេចក្តីថ្លែងការណ៍របស់កូរ៉េខាងជើងជាបន្តបន្ទាប់ មួយរយៈកាលចុងក្រោយនេះ។
ក្នុងលិខិតរបស់លោក ត្រាំ ក៏បានបញ្ជាក់ដែរថា គម្រោងជួបគ្នានៅក្នុងប្រទេសសិង្ហបុរីនោះជា សំណើរបស់កូរ៉េខាងជើង ហើយថា លោកនឹងពិចារណាក្នុងការជួបនៅពេលក្រោយ ពេលស្ថានការណ៍ល្អប្រសើរឡើងវិញ។
លោកត្រាំ ក៏បានព្រមានដែរថា អាមេរិក កូរ៉េខាងត្បូង និង ជប៉ុន ត្រៀមខ្លួនជាស្រេច ក្នុងការទប់ស្កាត់បើសិនជា កូរ៉េខាងជើងមានសកម្មភាពផ្ទុះអាវុធណាមួយកើតឡើង។
