ប៉ូលីសថៃ លើកឡើងថាពួកគេនឹងកាន់តែពិបាកក្នុងការចាប់ខ្លួនអតីតនាយករដ្ឋមន្រ្តីអ្នកស្រី យីងឡាក់ ស៊ីណាវ៉ាត្រាប្រសិនបើអ្នកស្រីទទួលបានទិដ្ឋាការរយៈពេល១០ឆ្នាំពីប្រទេសអង់គ្លេស។
យោងតាមការចុះផ្សាយរបស់ការសែត បាងកកប៉ុស្តិ៍ អាជ្ញាធរប្រទេសនេះបានសម្តែងការព្រួយបារម្ភបែបនេះដោយសារពួកគេទទួលបានព័ត៌មានដែលចុះផ្សាយដោយភា្នក់ងារសារព័ត៌មានអង់គ្លេស BBC ថាអ្នកស្រីយីង ឡាក់ត្រូវបានប្រទេសអង់គ្លេសផ្ដល់ទិដ្ឋាការឲ្យរយៈពេល១០ឆ្នាំ។
តាមសារព័ត៌មានដដែល អាជ្ញាធរថៃពេលនេះកំពុងតែទាក់ទងសុំការបំភ្លឺជាមួយភាគីអង់គ្លេសជុំវិញការផ្ដល់ទិដ្ឋាការដល់អតីតនាយករដ្ឋមន្រ្តីរូបនេះ។
អ្នកស្រី យីងឡាក់ ត្រូវក្រុមយោធារបស់នាយករដ្ឋមន្រ្តីថៃបច្ចុប្បន្ន ប្រាយុទ្ធ ចាន់អូចារ ធ្វើរដ្ឋប្រហារទំលាក់កាលពីឆ្នាំ២០១៤កន្លងទៅ។ លោកស្រីបានគេចខ្លួនចេញពីប្រទេសថៃនៅឆ្នាំ២០១៧ ប៉ុន្មានថ្ងៃមុនតុលាការប្រទេសនេះកាត់ទោស កំបាំងមុខឲ្យជាប់ពន្ធនាគាររយៈពេល៥ឆ្នាំពីបទធ្វេសប្រហែសក្នុងតួនាទីទាក់ទងទៅនឹងគម្រោងសន្យាទិញស្រូវ របស់រដ្ឋាភិបាលអ្នកស្រី ពេលនោះដែលបានបង្កឱ្យរដ្ឋាភិបាលប្រទេសនេះបានបាត់លុយរាប់ពាន់លានបាត៕