ក្រុមរដ្ឋមន្ត្រីនៃប្រទេសមានសេដ្ឋកិច្ចធំទាំង ៧ ហៅកាត់ថា G7 បានរិះគន់ទៅលើគោលនយោបាយពាណិជ្ជកម្មរបស់អាមេរិក ដែលជំរុញឲ្យមានការព្រមានអំពីសង្គ្រាមពាណិជ្ជកម្ម។ នេះបើតាមការចុះផ្សាយរបស់សារព័ត៌មានអង់គ្លេស BBC នៅថ្ងៃនេះ។
BBC បានចុះផ្សាយបន្តថា រដ្ឋមន្ត្រីហិរញ្ញវត្ថុអាមេរិក លោក Steve Mnuchin បានប្រឈមមុខនឹងការរិះគន់យ៉ាងស្រួចស្រាវពីក្រុមរដ្ឋមន្ត្រី G7 ជុំវិញការកំណត់ពន្ធគយថ្មីទៅលើការនាំចូលដែកថែប និងអាលុយមីញ៉ូម។
យោងតាម BBC រដ្ឋមន្ត្រីពាណិជ្ជកម្មបារាំង លោក Bruno Le Maire បានព្រមានថា សង្គ្រាមពាណិជ្ជកម្មអាចកើតឡើងត្រឹមតែពីរបីថ្ងៃប៉ុណ្ណោះ។
បើតាម BBC រដ្ឋមន្ត្រីពាណិជ្ជកម្មអាមេរិក លោក Wilbur Ross បានជួបជាមួយឧបនាយករដ្ឋមន្ត្រីចិន លោក លីវ ហ៊ឹ នៅទីក្រុងប៉េកាំង ដើម្បីដោះស្រាយភាពតានតានផែ្នកពាណិជ្ជកម្មអាមេរិក-ចិន។
បន្ទាប់មក ចិនបានព្រមានថា រាល់ការពិភាក្សាផ្នែកពាណិជ្ជកម្មទាំងអស់ជាមួយអាមេរិក នឹងគ្មានប្រយោជន៍នោះឡើយ ប្រសិនបើក្រុងវ៉ាស៊ីងតោនដាក់ចេញនូវទណ្ឌកម្មនានានោះ។
លោក Ross កំពុងព្យាយាមដោះស្រាយឱនភាពពាណិជ្ជកម្មផ្នែកកសិកម្ម និងថាមពលជាមួយចិន តែប៉ុន្មានថ្ងៃប៉ុណ្ណោះ ក្រោយពីក្រុងវ៉ាស៊ីងតោនបានគំរាមកំណត់ពន្ធគយ ៥០ពាន់លានដុល្លារបន្ថែមទៀតទៅលើទំនិញនាំចូលពីចិន៕
