អាជ្ញាធរស្រុកស្រែអំបិលខេត្តកោះកុង នៅព្រឹកនេះ បានរារាំងប្រជាពលរដ្ឋ ៣០២គ្រួសារ ដែលមានជម្លោះដីធ្លីជាមួយក្រុមហ៊ុនពីរ មិនឲ្យឡើងមកតវ៉ានៅរាជធានីភ្នំពេញជាថ្មីទៀត ខណៈពួកគេនៅតែពុំទាន់ទទួលបានដំណោះស្រាយបញ្ហាដីធ្លី។
កាលពីថ្ងៃទី១៧ ខែឧសភាកន្លងមកនេះ ប្រជាពលរដ្ឋ ៣០២គ្រួសារ បាននាំគ្នាប្រមូលផ្ដុំនៅក្រសួងដែន ដើម្បីទាមទារឲ្យស្ថាប័នមួយនេះ ពន្លឿនការដោះស្រាយបញ្ហាដីធ្លីរបស់ពួកគេឲ្យបានឆាប់ដល់ពួកគេ ខណៈដែលជម្លោះដីធ្លីអូសបន្លាយជាង ១០ឆ្នាំមកហើយ។ ប៉ុន្តែ ក្រោយមានការសម្របសម្រួលពីមន្ត្រីជាន់ខ្ពស់ក្រសួងដែនដី ពួកគេបាននាំគ្នាត្រឡប់ទៅផ្ទះវិញ។
អ្នកស្រី ជឹម ស្រីធួន ដែលអះអាងថា ជាតំណាឲ្យពលរដ្ឋ ៣០២គ្រួសារ បានប្រាប់វីអូឌីនៅព្រឹកនេះថា ពួកគាត់នាំគ្នាឡើងមកភ្នំពេញជាថ្មីនេះ ដោយសារប្រជាពលរដ្ឋមិនមានជំនឿលើការដោះស្រាយរបស់អភិបាលខេត្តកោះកុង ប៉ុន្តែ ថា ត្រូវបានអាជ្ញាធរឃាត់ឡាន នៅត្រង់ឃុំអូជ្រៅ ស្រុកស្រែអំបិល ដោយមិនអនុញ្ញាឲ្យពួកគាត់ ឡើងមកភ្នំពេញនោះទេ។
អ្នកស្រី ជឹម ស្រីធួន ដែលអះអាងថា ជាតំណាឲ្យពលរដ្ឋ ៣០២គ្រួសារ
ទោះជាយ៉ាងណាវីអូឌីមិនអាចសុំការអត្ថាធិប្បាយអភិបាលស្រុកស្រែកអំបិល លោក សួន សិលា បានទេ។
បើតាមប្រជាពលរដ្ឋអះអាងថា នៅសៀលនេះ អភិបាលស្រុកស្រែកអំបិល បានមកសន្យាជាមួយក្រុមប្រជាពលរដ្ឋថា នឹងដោះស្រាយបញ្ហាដីធ្លីនេះ ប៉ុន្តែ ពួកគេមិនព្រម ដោយថា មិនមានជំនឿចំពោះការដោះស្រាយរបស់អាជ្ញាធរ។
មន្ត្រីសម្របសម្រួលអាដហុកប្រចាំខេត្តកោះកុង លោក មាន ព្រហ្មមុនី ចាត់ទុកការរារាំងពលរដ្ឋថា ជាការបំបិទសិទ្ធិសេរីភាពក្នុងតវ៉ា ហើយលោកថា រដ្ឋាភិបាកគួរតែពន្លឿនការដោះស្រាយបញ្ហាដីធ្លីដល់ប្រជាពលរដ្ឋឲ្យបានចប់ ដើម្បីកុំឲ្យប្រជាពលរដ្ឋឡើងតវ៉ាម្ដងហើយម្ដងទៀត ។
មន្ត្រីសម្របសម្រួលអាដហុកប្រចាំខេត្តកោះកុង លោក មាន ព្រហ្មមុនី
ក្រុមពលរដ្ឋទាំងនោះមានវិវាទដីធ្លីជាមួយក្រុមហ៊ុន Koh Kong Plantation Co.,Ltd និងKoh Kong Sugar Industry Co., Ltd. តាំងពីឆ្នាំ ២០០៨មកម៉្លេះ ហើយរហូតមកដល់ពេលនេះ មិនទាន់មានដំណោះស្រាយនៅឡើយ។
ទោះជាយ៉ាង ការផ្ទុះការតវ៉ារបស់ពលរដ្ឋទាំងនោះ ធ្វើឡើងក្រោយពីក្រសួងរៀបចំដែនដី បានសម្រេចកាត់ដីទំហំប្រមាណ ៨២៥ហិចតា ចេញពីក្រុមហ៊ុនស្ករអំពៅក្នុងខេត្តកោះកុង ទៅឲ្យប្រជាពលរដ្ឋមួយក្រុមផ្សេងទៀតចំនួន ៣៧៥គ្រួសារ និងសម្រចឲ្យក្រុមហ៊ុនផ្តល់សំណងជាទឹកប្រាក់ ២៥០០ដុល្លារក្នុងមួយគ្រួសារ ដល់ពលរដ្ឋចំនួន ១៧៥គ្រួសារ ដើម្បីបញ្ចប់រឿងកាលពីថ្ងៃទី២២ ខែមីនា ឆ្នាំ២០១៨៕
