ប្រធានាធិបតីអាមេរិកលោក ដូណាល់ត្រាំ លើកឡើងថាការធ្វើពាណិជ្ជកម្មរវាងអាមេរិកជាមួយប្រទេសកាណាដា និងសហភាពអឺរ៉ុបមិនយុត្តិធម៌ទាល់តែសោះសម្រាប់ប្រទេសខ្លួន។
លោកត្រាំបានសរសេរនៅលើបណ្ដាញTwitter របស់លោកនៅថ្ងៃនេះថា៖
លោកបានលើកឡើងបន្តទៀត វាមិនយុត្តិធម៌សោះសម្រាប់កសិករ កម្មករ និងក្រុមហ៊ុនរបស់អាមេរិក។ ត្រាំ ក៏ដាស់តឿនដល់សហគមន៍អឺរ៉ុប និង កាណាដាផងដែរថាបើប្រទេសទាំងនោះមិនបន្ធូរបន្ថយនិងលុបចោលរនាំងពាណិជ្ជកម្មទាំងឡាយទេ អាមេរិកនឹងធ្វើខ្លាំងជាងនេះ។
ការលើកឡើងរបស់លោក ត្រាំ បែបធ្វើឡើងស្របពេលដែលលោកនឹងចូលរួមកិច្ចប្រជុំកំពូលប្រទេសក្រុមប្រទេសមហាអំណាចសេដ្ឋកិច្ចទាំង៧ (G7) នៅប្រទេសកាណាដាដែលធ្វើពីថ្ងៃទី ៨ ដល់ថ្ងៃទី ៩ ខែ មិថុនានេះ។
សម្រាប់សហភាពអឺរ៉ុបក៏ដូចជាកាណាដាតែងតែបដិសេធចោលនូវការលើកឡើងរបស់មេដឹកអាមេរិករូបនេះ ហើយ ប្រទេសទាំងនោះតែងតែក្រើនរំលឹកអាមេរិកពីទំនាក់ទំនងដ៏ល្អដែលខ្លួនធ្លាប់មានជាមួយប្រទេសនេះ។
ប្រធានាធិបតីបារាំងលោក អេម៉ានុយអែល ម៉ាក្រុង បានសរសេរលើបណ្ដាញ Twitter របស់លោកនៅថ្ងៃនេះដែរថា មិនវាសមទាល់តែសោះសម្រាប់ប្រទេសដែលជាសម្ព័ន្ធមិត្តនឹងគ្នាប្រើលេសរឿងសន្តិសុខជាតិមកដាក់ទណ្ឌកម្មពាណិជ្ជកម្មទៅលើប្រទេសដែលជាមិត្តខ្លួន។
ប្រធានាធិបតីរូបនេះក៏បានព្រមានដល់សហរដ្ឋអាមេរិកផងដែរថា ទីផ្សារ ៦ប្រទេសនៃក្រុមប្រទេស( G7 ) គឺធំជាងទីផ្សារអាមេរិក។ លោកប្រាប់អាមេរិកថាកុំភ្លេចរឿងនេះឲ្យសោះ។
ភាពតានតឹងរវាងអាមេរិកជាមួយនឹងសហភាពអឺរ៉ុប និង កាណាដា បានកើតឡើងក្រោយពេលសហរដ្ឋអាមេរិកបានចេញសេចក្តីសម្រេចមួយដែលតម្រូវឲ្យមានការដំឡើងពន្ធនាំចូលដែកនិងអាលុយមីញ៉ូមចូលទឹកដីអាមេរិក។ ទាំងអឺរ៉ុប និងកាណាដាបានប្រតិកម្មថាពួកគេនឹងសងសឹកអាមេរិកវិញ ដោយដំឡើងពន្ធលើទំនិញមួយចំនួនរបស់សហរដ្ឋអាមេរិកដែលនាំចូលប្រទេសទាំងនោះ៕