អង្គការសមាគមជាងមួយរយ បានចេញសេចក្តីថ្លែងការណ៍រួមគ្នាដោយហៅប្រកាសអន្តរក្រសួងស្តីពីការគ្រប់គ្រងការផ្សព្វផ្សាយតាមគេហទំព័រ និង បណ្ដាញសង្គមថាជាការធ្វើទុក្ខបុកម្នេញលើសេរីភាពបញ្ចេញមតិតាមប្រព័ន្ធអ៊ិនធើណិត។
យោងតាមសេចក្តីថ្លែងការណ៍ដែលចេញផ្សាយលើគេហទំព័រអង្គការសិទ្ធិមនុស្សលីកាដូ អង្គការសមាគមចំនួន១១៧ដែលធ្វើការងារក្នុងវិស័យផ្សេងៗហៅប្រកាសអន្តរក្រសួងនេះ ថាជាការរឹតត្បិតថែមទៀតចំពោះសេរីភាពបញ្ចេញមតិជាសាធារណៈ ខណៈដែលសេរីភាពនេះកំពុងតែទទួលរងនូវការធ្វើទុក្ខបុកម្នេញជាបន្តបន្ទាប់ក្នុងរយៈពេលប៉ុន្មានខែចុងក្រោយនេះ។ អង្គការសមាគមទាំងនោះ ក៏សម្ដែងក្តីបារម្ភទៀតថាប្រកាសនេះអាចត្រូវបានប្រើក្នុងការបំបិទសម្លេងឬដាក់ទោសទណ្ឌដល់អ្នកដែលបង្ហោះឬចែកចាយព័ត៌មានដែលរិះគន់រដ្ឋាភិបាលផងដែរ។
តាមសេចក្តីថ្លែងការណ៍ដដែល អង្គការសង្គមស៊ីវិលទាំងនោះ ក៏បានបានសំណូមពរឲ្យរដ្ឋាភិបាលធ្វើការនិរាករណ៍ ប្រកាសនេះវិញ ដោយយល់ថាវាប៉ះពាល់ជាខ្លាំងដល់សិទ្ធិបញ្ចេញមតិ និងសិទ្ធិឯកជនភាពដែលត្រួវបានធានាដោយរដ្ឋធម្មនុញ្ញនៃព្រះរាជាណាចក្រកម្ពុជា។
កាលពីថ្ងៃទី២៨ខែឧសភាកន្លងទៅក្រសួងចំនួនបីរួមមានក្រសួងព័ត៌មាន ក្រសួងប្រៃសណីយ៍និងទូរគមនាគមន៍ និង ក្រសួងមហាផ្ទៃបានចុះហត្ថលេខារួមគ្នាលើប្រកាសមួយ ចាត់តាំងអង្គភាពជំនាញរៀងៗខ្លួនគ្រប់គ្រងការផ្សព្វផ្សាយតាមគេហទំព័រ និងបណ្តាញសង្គមដែលផ្សព្វផ្សាយ ឬចែកចាយខ្លឹមសារព័ត៌មានទាំងឡាយណាដែលបង្កចលាចលដល់វិស័យការពារសន្តិសុខជាតិ ទំនាក់ទំនងជាមួយប្រទេសដទៃ សេដ្ឋកិច្ច សណ្តាប់ធ្នាប់សាធារណៈ ការរើសអើង និងវប្បធម៌ ប្រពៃណី ហើយអ្នកផ្សព្វផ្សាយទាំងនោះអាចប្រឈមនឹងផ្លូវច្បាប់ផងដែរ។
