អគ្គស្នងការដ្ឋាននគរបាលជាតិ បានប្រគល់រង្វាន់លើកទឹកចិត្តជិត៣០ម៉ឺនដុល្លារដល់អង្គភាពចំនួន៤ ដែលបានចុះបង្ក្រាបបទល្មើសគ្រឿងញៀនអំឡុងពេលជាង៥ខែចុងក្រោយនេះ។
ក្នុងវេបសាយរបស់អគ្គស្នងការដ្ឋាននគរបាលជាតិចុះផ្សាយកាលពីម្សិលមិញថា រដ្ឋាភិបាលផ្តល់ពាន់រង្វាន់២៩ម៉ឺនដុល្លារអាមេរិកទៅឲ្យមន្ទីរប្រឆាំងគ្រឿងញៀន នៃអគ្គស្នងការដ្ឋាននគរបាលជាតិ ក្រុមស៊ើបអង្កេតបទល្មើសឆ្លងកាត់ព្រំដែន ការិយាល័យប្រឆាំងគ្រឿងញៀន នៃស្នងការដ្ឋាននគរបាលរាជធានី-ខេត្ត និងកងរាជអាវុធហត្ថ ដើម្បីយកទៅប្រើប្រាស់ ដឹកនាំ រៀបចំផែនការបង្ក្រាប ក្នុងយុទ្ធនាការប្រយុទ្ធប្រឆាំងគ្រឿងញៀនបន្ដទៀត ដោយថា មិនមែនផ្ដល់ជូន ដើម្បីយកទៅចាយស្រេចតែចិត្តនោះទេ។
អគ្គលេខាធិការនៃអាជ្ញាធរជាតិប្រយុទ្ធប្រឆាំងគ្រឿងញៀន លោក មាស វីរិទ្ធ មានប្រសាសន៍បន្ថែមថា រដ្ឋផ្តល់រង្វាន់លើកទឹកចិត្តដល់មន្ត្រីបង្ក្រាបគ្រឿងញៀន ដើម្បីឲ្យពួកគេធ្វើការងារប្រកបដោយប្រសិទ្ធិភាពខ្ពស់។
អគ្គលេខាធិការនៃអាជ្ញាធរជាតិប្រយុទ្ធប្រឆាំងគ្រឿងញៀន លោក មាស វីរិទ្ធ
លោក វីរិទ្ធ បញ្ជាក់ថា រយៈពេលជិត៦ខែ ឆ្នាំ២០១៨នេះ សមត្ថកិច្ចចុះបង្ក្រាបបទល្មើសគ្រឿងញៀនប្រហែល៦ពាន់នាក់ ដោយក្នុងនោះអ្នកជួញដូរប្រហែលជា៤ពាន់នាក់ និងអ្នកប្រើប្រាស់ប្រហែល២ពាន់នាក់តែប៉ុណ្ណោះ ខណៈរបាយការណ៍នេះលោកថាមិនទាន់ប្រៀបធៀបជាមួយឆ្នាំ២០១៧នៅឡើយ ដោយសារក្រុមការងារកំពុងរវល់ស្របពេលបោះឆ្នោតជិតមកដល់។
ប្រធានសមាគមន៍សង្គ្រោះជនរងគ្រោះ ដោយគ្រឿងញៀនកម្ពុជា ហៅកាត់ថា DARAC លោក មាស សុវណ្ណ មានប្រសាសន៍ថា ការប្រគល់រង្វាន់លើកទឹកចិត្តជិត៣០ម៉ឺនដុល្លារដល់អង្គភាពចំនួន៤ មិនអាចជួយកាត់បន្ថយបទល្មើសគ្រឿងញៀនបានទេ ដោយសារថវិកានោះចូលក្នុងហោប៉ៅឯកជនទៅវិញ។
លោកផ្តល់ជាអនុសាសន៍ថា ដើម្បីទប់ស្កាត់និងបង្ក្រាបបទល្មើសគ្រឿងញៀនឲ្យមានប្រសិទ្ធិភាព រដ្ឋាភិបាលត្រូវផ្តល់ថវិកាឲ្យគ្រប់គ្រាន់ជួយដល់មណ្ឌលអប់រំកែប្រែអ្នកញៀនថ្នាំ នៅតាមមណ្ឌលរបស់រដ្ឋនិងឯកជន រួមទាំងសហគមន៍សង្គ្រោះគ្រឿងញៀនជាដើម។
លោក មាស សុវណ្ណ ប្រធានសមាគមន៍សង្គ្រោះជនរងគ្រោះ ដោយគ្រឿងញៀនកម្ពុជា ហៅកាត់ថា DARAC
របាយការណ៍សង្ខេបស្តីពីលទ្ធការងារត្រួតពិនិត្យគ្រឿងញៀនកាលពីឆ្នាំ២០១៧ បានឲ្យដឹងថា ចំនួនអ្នកប្រើប្រាស់គ្រឿងញៀននៅទូទាំងប្រទេស បានកើនឡើងពីចំនួន ៧ ៣០១នាក់នៅឆ្នាំ២០១៦ ទៅដល់ចំនួន ១២ ៦៩៥នាក់ នៅក្នុងឆ្នាំ២០១៧ ពោលគឺបានកើនឡើងដល់ទៅ ៧៣.៨៨ភាគរយ។
របាយការណ៍ដដែល បានឲ្យដឹងទៀតថា បទល្មើសគ្រឿងញៀនដល់ទៅ ៨ ១៧៣ករណី ត្រូវសមត្ថកិច្ចបង្ក្រាបបាននៅឆ្នាំ២០១៧ ដោយមានកំណើនដល់ ៩២.៤៨ភាគរយ បើធៀបនឹងតួលេខឆ្នាំ២០១៦ ដែលមានចំនួន ៤ ២៤៦ករណី
លោកនាយករដ្ឋមន្ត្រី ហ៊ុន សែន ធ្លាប់បានប្រកាសពីយុទ្ធនាការបង្ក្រាបគ្រឿងញៀនកាលពីដើមឆ្នាំ២០១៧កន្លងទៅ បន្ទាប់ពីដំណើរទស្សនកិច្ចរបស់ប្រធានាធិបតីហ្វីលីពីន លោក រ៉ូទ្រីហ្កូ ឌូទើតេ កាលពីពាក់កណ្ដាលខែធ្នូឆ្នាំ២០១៦៕