សាច់ញាតិនៅតែបន្តជួបជុំជជែកគ្នានៅមុខផ្ទះ បើទោះបីជាបុណ្យសពបានចប់សព្វគ្រប់អស់រយៈពេល៤ថ្ងៃហើយក៏ដោយ។ ការជជែកគ្នារបស់សាច់ញាតិទាំងនេះគឺជជែកពីការនឹកអាណិត និងស្រណោះដល់ស្ត្រីឈ្មោះ អ៊ុំ សុភី វ័យ២៤ឆ្នាំ ត្រូវស្វាមីប្រើហិង្សាកាប់ដោយកាំបិតស្លាប់ កាលពីថ្ងៃទី២៧ខែឧសភា។
ក្រោយកើតហេតុនេះ អ៊ុំ សុភី ស្លាប់ បុរសជាប្តីឈ្មោះ អាំ ភាន អាយុ២៦ត្រូវបានសមត្ថកិច្ចឃុំខ្លួន ហើយបន្សល់ទុកកូនប្រុសពីរម្នាក់គឺម្នាក់អាយុ៦ឆ្នាំ និងម្នាក់ទៀតអាយុ២ឆ្នាំ។
អ្នកស្រី អ៊ុំ សុភី ចាប់តាំងពីក្លាយជាប្តីប្រពន្ធជាមួយលោក អាំ ភាន រយៈពេល៤ឆ្នាំមក គឺអ្នកស្រីទទួលរងការវាយដំរហូត ហើយការវាយដំនោះទៀតសោតសុទ្ធតែមានលក្ខណៈធ្ងន់ធ្ងរ។ នេះបើតាមបងស្រីរបស់ជនរងគ្រោះគឺ អ្នកស្រី ឆែម រឿន។
អ្នកស្រី ឆែម រឿន រៀបរាប់ថា ធ្លាប់ជួយការពារប្អូនស្រីពីអំពើហិង្សា ប៉ុន្តែត្រូវបានឈ្មោះ អាំ ភាន វាយទាំងអ្នកស្រីឲ្យរងរបួស និងគំរាមសម្លាប់អ្នកស្រីទៀតផង។
អ្នកស្រី ឆែម រឿន ពលរដ្ឋដែលជួបបញ្ហាអំពើហិង្សាក្នុងគ្រួសារ
វ័យ៦២ឆ្នាំ អ្នកស្រី យ៉ាន ផាន ជាម្តាយរបស់ អ៊ុំ សុភី រៀបរាប់ថា ទំនាស់ក្នុងគ្រួសារកូនស្រី របស់គាត់នេះ កើតឡើងច្រើនដងរាប់មិនអស់ទេ ហើយថា ពេលខ្លះកើតឡើងទាំងកណ្តាលយប់ទៀតផង។
ចំណែកបណ្តឹងទៅអាជ្ញាធរមានសមត្ថកិច្ច អ្នកស្រីថាធ្វើឡើងច្រើនដងណាស់ ប៉ុន្តែភាគច្រើន ទទួលបានតែការសម្របសម្រួល និង ពេលខ្លះមិនមានចំណាត់ការទេ។
អ្នកស្រី យ៉ាន ផាន ថ្លែងថា មុនកើតហេតុ៣ទៅ៤ថ្ងៃ កូនស្រីរបស់គាត់ដែលរងគ្រោះថ្លែង ប្រាប់ថា បើមិនមានអ្នកណាជួយឲ្យទេប្រាកដជាស្លាប់ដោយសារប្តីកាប់ហើយ។
អ្នកស្រី ផាន បន្តរៀបរាប់ថា មុនថ្ងៃកើតហេតុឃាតកម្ម២០ថ្ងៃ គាត់និងកូនស្រី បានយកករណីដែលឈ្មោះ ភាន ប៉ងសម្លាប់នេះទៅប្តឹងសមត្ថកិច្ចប៉ុស្តិ៍ក្រយា ប៉ុន្តែសមត្ថកិច្ចថា មិនមានស្លាកស្នាមមិនអាចចាត់ការបានទេ។
ពេលដែលរំឭកដល់ កូនស្រីដែលមានជីវភាពក្រលំបាក ខំធ្វើការដោយកម្លាំងដើម្បីយក ប្រាក់ផ្គត់ផ្គង់គ្រសារនិងសងបំណុលគេ ហើយរស់នៅក្នុងស្ថានភាពអំពើហិង្សារយៈពេល៤ឆ្នាំ រហូតដល់រងការសម្លាប់ដោយអណោចអធមនេះ អ្នកស្រី យ៉ាន ផាន ទ្រហោយំរកនិយាយ បន្តមិនរួច។
អ្នកស្រីរៀបរាប់ថា៖«ខ្ញុំស្តាយណាស់កូនខ្ញុំគ្មានអ្វីប្រៀបបានទេ កូនខ្ញុំស្លូតណាស់»។
ក្រុមការងារ របស់វីអូឌី បានទៅដល់កន្លែងកើតហេតុក្នុងស្រុកសន្ទុក ខេត្តកំពង់ធំកាលពីថ្ងៃទី៣១ ខែឧសភា ឃើញមានថង់ខ្ចប់បាយរហែក ដបទឹកសុទ្ធរប៉ាត់រប៉ាយគ្មានសណ្តាប់ធ្នាប់ ទំនងដូចជាមានការប្រតាយប្រតប់មុនកាប់សម្លាប់មែន។
កុមារ អាយុ៦ឆ្នាំ កូនអ្នកស្រី អ៊ុំ សុភី និយាយថា គាត់នឹកម្តាយ ហើយរំឭកសកម្មភាព ពេលយកដៃបិទភ្នែកម្តាយដែលស្លាប់ទាំងបើកភ្នែក។
សាច់ញាតិដែលអង្គុយនៅកន្លែងផ្ទះធ្វើបុណ្យសពនេះអះអាង បុរសជាប្តីដែលឈានដល់ការសម្លាប់ប្រពន្ធនេះដោយសារតែឥទ្ធិពលនៃសារធាតុញៀន។
ស្ត្រីវ័យកណ្តាលនៅក្នុងភូមិនេះ៣រូប ដែលសុំមិនឲ្យបង្ហាញអត្តសញ្ញាណខ្លាចរងការសម្លាប់ពីប្តីដែរនោះ បានឲ្យដឹងថា ប្តីរបស់ពួកគាត់កំពុងតែប្រើប្រាស់គ្រឿងញៀន ហើយគាត់មានការភ័យខ្លាច និងបានលួចរាយការណ៍ប្រាប់សមត្ថកិច្ច។
ក្រុមការងាររបស់វីអូឌីព្យាយាមសុំការឆ្លើយតបពីមេប៉ុស្តិ៍ក្រយាលោក លី ពីធូ ប៉ុន្តែលោកថា មិនអាចផ្តល់បទសម្ភាសន៍បានទេ ដោយសារថ្នាក់លើមិនអនុញ្ញាត ប៉ុន្តែលោកមិនបានបញ្ជាក់ថា ថ្នាក់លើនោះស្ថិតនៅកម្រិតណានោះទេ។
ចំណែកមេភូមិសិរីមង្គល លោក ស៊ុន គឹមរ៉េន មានប្រសាសន៍ថា គ្រួសារ អ៊ុំ សុភី និង អាំ ភាន មានជម្លោះ ញឹកញាប់ណាស់ហើយអាជ្ញាធរក៏បានប្រឹងប្រែងជួយរកដំណោះស្រាយដែរ។ លោកថា ដោយសារលោក អស់លទ្ធភាពក្នុងការសម្របសម្រួល ក៏បានធ្វើលិខិតឲ្យអ្នកទាំងពីរលែងលះគ្នា ប៉ុន្តែថា លិខិតនោះមិនមានប្រសិទ្ធិភាពទេ គឺក្រោយមក អាំ ភាន នៅតែបំពានមករស់នៅជាមួយ អ៊ុំ សុភី ដដែល។ មូលហេតុសំខាន់គឺគ្រឿងញៀន។
លោកមានប្រសាសន៍ថា៖«ដល់ប្តីប្រើប្រាស់គ្រឿងញៀន ដល់ប្រើប្រាស់គ្រឿងញៀនភាគច្រើននាំឲ្យប្រព្រឹត្តអំពើហិង្សា។»
លោក បន្តថា នៅក្នុងភូមិមានមុខសញ្ញាមួយចំនួនទៀតលោកកំពុងតាមដាន។
មេភូមិសិរីមង្គលលោក ស៊ុន គឹមរ៉េន
អាជ្ញាធរមូលដ្ឋានមួយចំនួនដែលសុំមិនបញ្ចេញឈ្មោះថ្លែងថា នៅក្នុងតំបន់នោះពិបាកគ្រប់គ្រងដោយសារតែជាតំបន់ដាច់ស្រយាល មានចំការកៅស៊ូច្រើន ហើយថាគ្រឿងញៀនមួយចំនួននាំចូលដោយកម្មករចំការទាំងនោះ។
