ពេលដែលរដូវស្សាចូលមកដល់ពលរដ្ឋនៅឃុំមួយក្នុងស្រុករមាសហែក ខេត្តស្វាយរៀង បានបង្ហាញក្តីកង្វល់ និងគិតដល់បញ្ហាលំបាកផ្សេងៗ ខណៈផ្លូវលំមួយខ្សែក្នុងសហគមន៍របស់ពួកគាត់មិនត្រូវបាន អាជ្ញាធរថ្នាក់មូលដ្ឋានរួសរាន់ធ្វើការអភិវឌ្ឍ។
កំពុងអង្គុយពិភាក្សាគ្នាក្រោមផ្ទះជាមួយពលរដ្ឋផ្សេងទៀតជុំវិញបញ្ហាផ្លូវលំបាកនេះ អ្នកស្រី ស៊ុន ផល្លា រៀបរាប់ថា ផ្លូវលំមួយខ្សែមានប្រវែងប្រមាណ១គីឡូម៉ែត្រស្ថិតក្នុងភូមិត្រពាំងប្រិយ ឃុំអំពិល មិនត្រូវបានអាជ្ញាធរឃុំយកចិត្តទុកដាក់ក្នុងការសាងសង់នោះទេ ខណៈផ្លូវលំនៅឃុំផ្សេងៗទៀតគាត់សង្កេតឃើញថា មានការអភិវឌ្ឍច្រើនក្នុងអណត្តិនេះ។
អ្នកស្រី ស៊ុន ផល្លា ពលរដ្ឋនៅឃុំមួយក្នុងស្រុករមាសហែក ខេត្តស្វាយរៀង
បើទោះបីជានៅរដូវប្រាំងយើងមើលឃើញថា ផ្លូវលំនោះហាក់មិនមានបញ្ហាសម្រាប់ការធ្វើដំណើរឆ្លងកាត់ក៏ដោយ ប៉ុន្តែអ្នកភូមិអះអាងថា នៅរដូវវស្សាវិញ ផ្លូវនេះត្រូវទឹកជន់លិចកម្ពស់ប្រហែលកន្លះម៉ែតដែលតម្រូវឲ្យពលរដ្ឋធ្វើដំណើរឆ្លងកាត់ត្រូវប្រើប្រាស់ទូកជំនួស។
អង្គុយក្បែរគ្នាអ្នកភូមិម្នាក់ទៀត អ្នកស្រី អ៊ុក ពៅ និយាយថា ការប្រើប្រាស់ទូកជំនួសសម្រាប់ការធ្វើដំណើរឆ្លងកាត់នោះ គឺបានបង្កផលបាកជាខ្លាំង ជាពិសេសការដឹកទំនិញចេញចូល និងកូនក្មេងតូចៗមិនអាចធ្វើដំណើរទៅសាលារៀនបានដោយខ្លួនដូចនៅរដូវប្រាំង។
អ្នកភូមិម្នាក់ទៀត អ្នកស្រី អ៊ុក ពៅ ពលរដ្ឋនៅឃុំមួយក្នុងស្រុករមាសហែក ខេត្តស្វាយរៀង
ស្រ្តីវ័យជាង៥០ឆ្នាំរូបនេះឲ្យដឹងថា ផ្លូវលំមួយខ្សែនោះត្រូវបានទឹកជន់លិចតាំងពីយូរណាស់មកហើយ និងថាកន្លងមកធ្លាប់កូនអ្នកភូមិ និងអ្នកធ្វើដំណើរបានលង់ទឹកនៅលើកំណាត់ផ្លូវនេះដែរ។
អ្នកស្រី អ៊ុក ពៅ ពលរដ្ឋនៅឃុំមួយក្នុងស្រុករមាសហែក ខេត្តស្វាយរៀង
ចាស់ព្រឹទ្ធាចារ្យក្នុងឃុំអំបិលលោក កែវ សារឿន មានប្រសាសន៍ថា មានពលរដ្ឋចំនួនពីរភូមិ គឺភូមិត្រពាំងប្រិយ និងភូមិត្បែង ដែលធ្វើដំណើរឆ្លងកាត់ផ្លូវនេះប្រជាប្រចាំ ហើយលោកថា នៅរដូវទឹកលិចពលរដ្ឋត្រូវចំណាយប្រាក់៥០០រៀល ក្នុងមួយម្នាក់ ម៉ូតូ២៥០០រៀលដើម្បីបង់ថ្លៃទៅឲ្យទូកដរ ខណៈអីវ៉ានផ្សេងៗគិតតម្លៃផ្សេងទៀត។
លោកបន្តថា ជុំវិញបញ្ហាផ្លូវលំបាកដោយសារទឹកលិចនៅរដូវស្សានេះ អ្នកភូមិបានដាក់សំណើទៅអាជ្ញាធរឃុំឲ្យជួយដោះស្រាយជាច្រើនដងហើយ ប៉ុន្តែអាជ្ញាធរបានត្រឹមសន្យាដោះស្រាយប៉ុណ្ណោះ។
ចាស់ព្រឹទ្ធាចារ្យក្នុងឃុំអំបិលលោក កែវ សារឿន
មេឃុំអំពិលលោក ជា សារ៉ន បានទទួលស្គាល់ថា ផ្លូវនោះពិតជាត្រូវបានទឹកលិចនៅរដូវវស្សា និងបានបង្កផលលំបាកដល់ប្រជាពលរដ្ឋក្នុងការធ្វើដំណើរមែន ប៉ុន្តែលោកថា ឃុំមិនបានព្រងើយកន្តើយក្នុងការយកចិត្តទុកដាក់ដោះស្រាយនោះទេ ដោយថា កន្លងមកអាជ្ញាធរបានជួសជុលជាបណ្តើរៗរួចមកហើយ។
មេឃុំបេក្ខភាពមកពីគណបក្សប្រជាកម្ពុជា ដែលបានជាប់ឆ្នោតក្នុងអាណត្តិជាបន្តបន្ទាប់រូបនេះ និយាយថា ការពន្យារពេលសាងសង់ផ្លូវនោះ ដោយសារថវិកាដែលរដ្ឋាភិបាលផ្តល់ឲ្យសម្រាប់ផែនការអភិវឌ្ឍន៍ឃុំសង្កាត់មានចំនួនតិចតួចពេក ដែលតម្រូវឲ្យឃុំសម្រេចយកថវិកានោះទៅអភិវឌ្ឍគម្រោងណាអទិភាពមុន។
មេឃុំអំពិលលោក ជា សារ៉ន
តែទោះយ៉ាងណាមេឃុំរូបនេះអះអាងថា ក្រុមប្រឹក្សាមានគម្រោងយកមូលនិធិឃុំទៅអភិវឌ្ឍផ្លូវនៅភូមិត្រពាំងប្រិយដែលកំពុងជួបការលំបាកនោះ នៅឆ្នាំ២០១៩ខាងមុខនេះហើយ។
អ្នកសម្របសម្រួលកម្មវិធីគណនេយ្យភាពរបស់អង្គការស្ដារកម្ពុជា ដែលកំពុងធ្វើការជំរុញគណនេយ្យភាពសង្គមក្នុងស្រុករមាសហែក ខេត្តស្វាយរៀង លោកស្រី ជា ជ័យសុវណ្ណា មានប្រសាសន៍ថា តាមការអង្កេត ផ្លូវលំមួយចំនួនក្នុងស្រុករមាសហែក ក្នុងនោះក៏មានផ្លូវលំនៅឃុំអំពិល គឺមិនទាន់អភិវឌ្ឍន៍បានល្អសម្រាប់ឲ្យប្រជាធ្វើដំណើរ។
លោកស្រី ជំរុញទៅអាជ្ញាធរថ្នាក់មូលដ្ឋាន ត្រូវខិតខំដោះស្រាយរាល់ផលប៉ះពាល់នៃផ្លូវលំបាក់នេះជូនពលរដ្ឋឲ្យ បានទាន់ពេលវេលា ដើម្បីកុំឲ្យពលរដ្ឋអន់ចិត្ត និងអស់ជំនឿលើការដឹកនាំ។
ជុំវិញផ្លូវលំបាកនេះ អ្នកភូមិបានអំពាវនាវសុំទៅអាជ្ញាធរ និង អង្គការដៃគូរអភិវឌ្ឍន៍នានា រួមទាំងសប្បុរសជន ជួយគាំទ្រ និងជួយកសាងផ្លូវនេះ ឲ្យពលរដ្ឋធ្វើដំណើរបានស្រួលផងដែរ។
នៅក្នុងឃុំអំពិល មានចំនួន២២ភូមិ និងមានប្រជាជនសរុប១៤ ៤៤០នាក់ ដែលភាគច្រើនពលរដ្ឋនៅទីនោះ ជាកសិករ ហើយពលរដ្ឋទាំងនោះ បានអំពាវនាវសុំទៅរដ្ឋាភិបាល ស្ថាប័នពាក់ព័ន្ធ និង អង្គការក្រៅរដ្ឋាភិបាល នានាជួយកសាងផ្លូវលំមួយខ្សែរនេះ ដើម្បីសម្រួលដល់ការធ្វើដំណើររបស់អ្នកភូមិ៕
