អតីតបុគ្គលិកស្ថានទូតអាមេរិកជាង២០នាក់ប្រមូលផ្តុំនៅមុខទូតទាមទារសំណងជំងឺចិត្តនិងប្រាក់អត្ថប្រយោជន៍ ដោយថាស្ថានទូតនេះបញ្ឈប់ពួកគេពីការងារជាង៣ខែ ទាំងអយុត្តិធម៌ និងមិនមានភស្តុតាងច្បាស់លាស់។
ក្រុមអ្នកតវ៉ាទាំងនោះបានឲ្យដឹងថា ពួកគេជាអតីតសន្តិសុខដែលត្រូវបានស្ថានទូតអាមេរិកបញ្ឈប់ពីការងារដោយអយុត្តិធម៌ ដោយចោទប្រកាន់ថាពួកគេមើលរូបអាសអាភាសអនីតិជន ដែលគេចែករំលែកនៅក្នុង Messenger Group របស់ពួកគេ។
លោក ឡុង សេងប៊ុនហុង ដែលអះអាងថា ធ្វើការងារនៅស្ថានទូតអាមេរិក១៩ឆ្នាំ បានរៀបរាប់ថា ស្ថានទូតនេះបានបញ្ឈប់ពួកគេជាង៣០នាក់ ពីការងារអំឡុងខែមេសា ដោយចោទថា ពួកគេមើលរូបអាសអាភាសរបស់កុមារនៅក្នុង Messenger Group ប៉ុន្តែលោកថា ការចោទប្រកាន់នេះមិនមានភស្តុតាងច្បាស់លាស់ និងមានចេតនារៀបចំទុកជាមុន ដើម្បីបញ្ឈប់ពួកគេពីការងារដោយមិនផ្តល់សំណង និងប្រាក់អត្ថប្រយោជន៍តែប៉ុណ្ណោះ។
លោករៀបរាប់ដូចនេះថា៖«ការបញ្ឈប់នេះវាហាក់បីដូចជាអត់ច្បាស់ទាល់តែសោះ។ រឿងដែលបញ្ឈប់ពួកយើង គឺហាក់បីដូចជាការរៀបចំ ការបញ្ឈប់គឺចោទប្រកាន់ដូចៗគ្នាទាំងអស់ កំហុសទាំង៣២នាក់គឺដូចគ្នាទាំងអស់។»
កំពុងឈរតវ៉ានៅមុខស្ថានទូតអាមេរិក លោក អ៊ីម រ៉ា បាននិយាយទាំងមិនអស់ចិត្តថា ការចោទប្រកាន់របស់ស្ថានទូតនឹងបញ្ឈប់ពួកគេចេញពីការងារ ធ្វើឡើងដោយអយុត្តិធម៌ ដោយថាពួកគេមិនបានធ្វើខុសដូចការចោទប្រកាន់នោះទេ។
អតីតបុគ្គលិកស្ថានទូតទាំងនោះ មានអះអាងប្រហាក់ប្រហែលគ្នាថា ក្រោយពីស្ថានទូតបញ្ឈប់ពីការងារ ធ្វើឲ្យពួកគាត់ជួបញ្ហាប្រឈមក្នុងជីភាពគ្រួសារ ខណៈរង់ចាំដំណោះស្រាយពីស្ថានទូតអស់រយៈពេលជាង៣ខែកន្លងទៅនេះ។
អ្នកនាំពាក្យស្ថានទូតអាមេរិកប្រចាំកម្ពុជា លោក David Josar បានឆ្លើយតបតាមរយៈអ៊ីម៉ែលប្រាប់វីអូឌីនៅថ្ងៃនេះថា អាមេរិកគាំទ្រការធ្វើបាតុកម្មដោយសន្តិវិភាព ប៉ុន្តែលោកថាការធ្វើរឿងណាមួយដែលទាក់ទងនឹងរូបភាពអាសអាភាសរបស់កុមារនិងការកេងប្រវ័ញលើកុមារវាជារឿងធ្ងន់ធ្ងរសម្រាប់អាមេរិក។ មន្រ្តីស្ថានទូតអាមេរិករូបនេះ បានបដិសេធមិនបកស្រាយទេជុំវិញការទាមទាររបស់អតីតសន្តិសុខរបស់ស្ថានទូតដែលធ្វើកាលពីព្រឹកមិញនេះ ដោយលើកហេតុផលថាជាបញ្ហាផ្ទៃក្នុងបុគ្គលិក។
ប្រធានគ្រប់គ្រងផ្នែកអង្កេតនៃអង្គការការពារសិទ្ធិមនុស្សលីកាដូ លោក អំ សំអាត មានប្រសាសន៍ថា អាមេរិកជាប្រទេសមហាអំណាចប្រកាន់លទ្ធិប្រជាធិបតេយ្យ និងគោរពសិទ្ធិមនុស្ស ករណីនេះលោកថា ស្ថានទូតអាមេរិកនឹងរកវិធីដោះស្រាយជូនអតីតបុគ្គលិករបស់ខ្លួនប្រកបដោយយុត្តិធម៌។
លោកមានប្រសាសន៍ថា«ស្ថានទូតសហរដ្ឋអាមេរិកជាប្រទេសមួយដែលប្រកាន់លទ្ធិប្រជាធិបតេយ្យមួយពេញលេញ។ ចឹងគេធ្វើអ្វីទៅតាមគោលការណ៍លទ្ធិប្រជាធិបតេយ្យ ហើយនឹងការស្វែងរកដំណោះស្រាយជាមួយគ្នាទៅវិញទៅមក»។
នាយកប្រតិបត្តិនៃមជ្ឈមណ្ឌលសម្ព័ន្ធភាពការងារ និងសិទ្ធិមនុស្ស លោក មឿន តុលា ពន្យល់តាមច្បាប់ការងារថា បើស្ថានទូតអាមេរិកបញ្ឈប់បុគ្គលិកខ្មែរដោយមិនមានភស្តុតាងច្បាស់លាស់ដូចក្រុមអ្នកតវ៉ាលើកឡើងមែន លោកថា មិនអាចយកច្បាប់ការងាររបស់កម្ពុជាមកអនុវត្តបាននោះទេ ករណីនេះត្រូវយកច្បាប់ការងារអាមេរិកមកដោះស្រាយវិញ។
នាយកប្រតិបត្តិនៃមជ្ឈមណ្ឌលសម្ព័ន្ធភាពការងារ និងសិទ្ធិមនុស្ស លោក មឿន តុលា
កាលពីខែមេសាកន្លងទៅស្ថានទូតអាមេរិកប្រចាំកម្ពុជា បានបញ្ឈប់បុគ្គលិកខ្លួនដែលជាជនជាតិខ្មែរ និងខ្មែរ-អាមេរិក ចំនួន៣២នាក់ ដោយចោទប្រកាន់ថាពួកគេបានចែកចាយរូបភាពអាសអាភាសកុមារនៅក្នុងFacebook Messager Group របស់ពួកគេ៕