ទីបំផុតទៅ អាមេរិកមិនមែនគ្រាន់តែបានត្រឹមស្រែកគំរាមទណ្ឌកម្មនោះទេ ប៉ុន្តែ រដ្ឋបាលប្រធានាធិបតី ដូណាល់ ត្រាំ បានសម្រេចដាក់ទណ្ឌកម្មមកលើមន្ត្រីយោធាជាន់ខ្ពស់របស់កម្ពុជា បន្ទាប់ពីបានព្រមានជាបន្តបន្ទាប់ជុំវិញបញ្ហារំលោភសិទ្ធិមនុស្ស និងប្រជាធិបតេយ្យនៅក្នុងប្រទេសកម្ពុជា។
ក្រសួងរតនាគារអាមេរិក បានចេញសេចក្ដីប្រកាសព័ត៌មានមួយកាលពីថ្ងៃទី១២ ខែមិថុនានេះ ដោយបានសម្រេចដាក់នាយឧត្ដមសេនីយ៍ ហ៊ីង ប៊ុនហៀង អគ្គមេបញ្ជាការរងកងទ័ព និងជាមេបញ្ជាការកងអង្គរក្សលោកនាយករដ្ឋមន្ត្រី ហ៊ុន សែន ទៅក្នុងបញ្ជីហាមឃាត់ ឬហៅសាមញ្ញថា បញ្ជីខ្មៅ។
រដ្ឋបាលអាមេរិកបានសម្រេចបែបនេះ ដោយចោទមន្ត្រីយោធាកម្ពុជាជាន់ខ្ពស់រូបនេះថា ជាប់ពាក់ព័ន្ធនឹងការរំលោភសិទ្ធិមនុស្សយ៉ាងធ្ងន់ធ្ងរ និងប្រព្រឹត្តអំពើពុករលួយ។
ជាប្រតិកម្មតបទៅវិញ រដ្ឋាភិបាលកម្ពុជាដឹកនាំដោយបក្សកាន់អំណាចរបស់លោកនាយករដ្ឋមន្ត្រី ហ៊ុន សែន បានប្រកាសថ្កោលទោសចំពោះសេចក្ដីសម្រេចបែបនេះរបស់រដ្ឋបាលអាមេរិក ដោយថា អាមេរិកបានចោទប្រកាន់ទាំងគ្មានមូលដ្ឋានទៅលើលោក ហ៊ីង ប៊ុនហៀង និងថា អាមេរិកបានបំពានលើអធិបតេយ្យភាពកម្ពុជាផងដែរ។
ចំណែកឯសាមីខ្លួននាយឧត្ដមសេនីយ៍ ហ៊ីង ប៊ុនហៀង ក៏បានបញ្ចេញប្រតិកម្មផងដែរ ដោយថា លោកគ្មានទ្រព្យសម្បត្តិរក្សាទុកនៅអាមេរិកទេ។ ផ្ទុយទៅវិញ លោកថែមទាំងជំរុញទៅអាមេរិកឲ្យពន្លឿនវិធានការបង្កកទ្រព្យនេះទៀតផង ប្រសិនបើរកឃើញថា លោកមានទ្រព្យសម្បត្តិនៅទីនោះ។
ចំណុចនេះបានជំរុញឲ្យមានការចោទសួរថា តើវិធានការអាមេរិកបង្កកទ្រព្យសម្បត្តិលើលោក ហ៊ីង ប៊ុនហៀង មានវិសាលភាពកម្រិតណា?
តាមការពិតទៅ អាមេរិកបានសម្រេចចាត់វិធានការលើមន្ត្រីយោធាជាន់ខ្ពស់កម្ពុជា ផ្អែកទៅតាមច្បាប់សិទ្ធិមនុស្សសកល ឬភាសាអង់គ្លេសហៅថា Global Magnitsky Human Rights Accountability Act ឬហៅយ៉ាងខ្លីថា ច្បាប់ Magnitsky។ ច្បាប់ Magnitsky កាលពីដំបូងឡើយ មានវិសាលភាពនៃការអនុវត្តតែទៅលើក្រុមមន្ត្រីជាន់ខ្ពស់រុស្ស៊ី ដែលរដ្ឋបាលអាមេរិកជំនាន់ប្រធានាធិបតី បារ៉ាក់ អូបាម៉ា ចោទថា បានរំលោភសិទ្ធិមនុស្សធ្ងន់ធ្ងរ និងប្រព្រឹត្តអំពើពុករលួយ។ ច្បាប់នេះ ត្រូវបានហៅបែបនេះទៅតាមឈ្មោះសវនកររុស្ស៊ី លោក Sergei Magnitsky ដែលបានស្លាប់នៅក្នុងពន្ធនាគារក្នុងទីក្រុងមូស្គូកាលពីឆ្នាំ២០០៩ បន្ទាប់ពីលោកត្រូវបានអាជ្ញាធររុស្ស៊ីចាប់ដាក់ឃុំ ក្រោយពីលោកបានបើកការស៊ើបអង្កេតទ្រង់ទ្រាយធំទៅលើអំពើពុករលួយកិបកេងពន្ធទំហំ ២៣០លានដុល្លារពីសំណាក់ក្រុមមន្ត្រីពន្ធដាររុស្ស៊ី។
ចាប់តាំងពីច្បាប់នេះចាប់កំណើត និងក្រោយពីច្បាប់នេះត្រូវបង្កើនវិសាលភាពទូទាំងពិភពលោកមក មេដឹកនាំ និងបុគ្គលជាន់ខ្ពស់ចំនួន ៥៩រូបហើយ ត្រូវបានដាក់ឲ្យស្ថិតនៅក្រោមច្បាប់នេះ ទៅតាមបទបញ្ជារបស់មេដឹកនាំអាមេរិក។ នាយឧត្ដមសេនីយ៍ ហ៊ីង ប៊ុនហៀង និងសមាជិកព្រឹទ្ធសភាដូមីនីកា លោក Felix Ramon គឺជាបុគ្គលពីររូបថ្មីបំផុត ដែលត្រូវបានអាមេរិកដាក់បញ្ចូលឲ្យស្ថិតនៅក្រោមច្បាប់នេះ។
ច្បាប់នេះបានសម្រេចដាក់ចេញនូវទណ្ឌកម្ម ២ចំណុច គឺការហាមឃាត់ជាន់ទឹកដីអាមេរិក និងវិធានការបង្កកទ្រព្យសម្បត្តិរបស់បុគ្គលដែលរដ្ឋាភិបាលអាមេរិកសម្រេចដាក់ទណ្ឌកម្ម។
ផ្អែកតាមខ្លឹមសារនៃច្បាប់នេះ លោក ហ៊ីង ប៊ុនហៀង ត្រូវបានអាមេរិកហាមឃាត់មិនឲ្យជាន់ទឹកដីរបស់ខ្លួននោះឡើយ ហើយទ្រព្យសម្បត្តិរបស់មន្ត្រីយោធាជាន់ខ្ពស់កម្ពុជារូបនេះ ក៏នឹងត្រូវបង្កកទុកផងដែរ។
ជាងនេះទៅទៀត ច្បាប់នេះក៏បានហាមឃាត់ពលរដ្ឋអាមេរិកទាំងអស់ មិនឲ្យធ្វើជំនួញជាមួយបុគ្គលដែលរដ្ឋាភិបាលអាមេរិកបានសម្រេចដាក់ទណ្ឌកម្មផងដែរ។
អង្គការឃ្លាំមើលសិទ្ធិមនុស្សអាស៊ី Human Rights Watch បានបកស្រាយពីប្រសិទ្ធភាពនៃច្បាប់នេះថា បុគ្គលដែលត្រូវបានរដ្ឋាភិបាលអាមេរិកសម្រេចដាក់ទណ្ឌកម្មនោះ នឹងមិនត្រូវបានអនុញ្ញាតឲ្យចូលទៅដកហូតទ្រព្យសម្បត្តិពីធនាគារជាច្រើន និងមិនត្រូវបានអនុញ្ញាតឲ្យផ្ទេរទ្រព្យសម្បត្តិជាមួយក្រុមហ៊ុនអាមេរិកនោះឡើយ។
អង្គការឃ្លាំមើលសិទ្ធិមនុស្សដដែលនេះ បានបកស្រាយបន្ថែមថា ទាំងក្រុមហ៊ុនអាមេរិក និងក្រុមហ៊ុនអន្តរជាតិដែលមានក្រុមហ៊ុនបុត្រសម្ព័ន្ធអាមេរិក នឹងប្រឈមមុខនឹងទណ្ឌកម្មពីអាមេរិក ប្រសិនបើរកឃើញថា បានធ្វើពាណិជ្ជកម្មជាមួយបុគ្គលជាប់ទណ្ឌកម្មនោះ។
បើផ្អែមតាមខ្លឹមសារនៃច្បាប់នេះ មានន័យថា ទ្រព្យសម្បត្តិរបស់បុគ្គលជាប់ទណ្ឌកម្ម ដែលដាក់ផ្ញើ ផ្ទេរ ឬតម្កល់នៅតាមបណ្ដាធនាគារនៅឯបរទេស ឬនៅក្នុងប្រទេសកម្ពុជា ក៏នឹងត្រូវហាមឃាត់ផងដែរ ប្រសិនបើធនាគារនោះ កាន់កាប់ដោយម្ចាស់បុគ្គល ឬម្ចាស់ភាគហ៊ុនអាមេរិក។
ដូច្នេះ បើផ្អែកតាមខ្លឹមសារនៃច្បាប់នេះ មន្ត្រីយោធាជាន់ខ្ពស់កម្ពុជាដែលជាប់ទណ្ឌកម្ម នឹងទទួលរងផលប៉ះពាល់ បើទោះបីជាអះអាងថា គ្មានទ្រព្យសម្បត្តិនៅលើទឹកអាមេរិកដោយផ្ទាល់ក៏ដោយ៕