អយ្យការអមសាលាដំបូងរាជធានីភ្នំពេញបានចេញដីកាកោះហៅ លោក សម រង្ស៊ី ដែលកំពុងនិរទេសខ្លួននៅក្រៅប្រទេសឲ្យចូលបំភ្លឺ ពាក់ព័ន្ធការចោទថា បានប្រមាថព្រះមហាក្សត្រ។
តាមដីកាកោះដែលចេញដោយព្រះរាជអាជ្ញារងនៃសាលាដំបូងរាជធានីភ្នំពេញលោក សៀង សុខ កាលពីថ្ងៃអង្គារសម្សិលមិញ បានបញ្ជាក់ថា ហ្វេសប៊ុកឈ្មោះ Sam Rainsy បានប្រមាថព្រះមហាក្សត្រជាបន្តបន្ទាប់។ ដីកានេះ បង្គាប់ឲ្យលោកសម រង្ស៊ីចូលខ្លួនបំភ្លឺនៅថ្ងៃទី១២ខែកក្កដា។
ទោះយ៉ាងណាក្នុងដីកាមិនបានបញ្ជាក់ថា លោក សម រង្ស៊ី ប្រមាថព្រះមហាក្សត្រយ៉ាងម៉េចនោះទេ ប៉ុន្តែក្រោយពេលព្រះមហាក្សក្រចេញព្រះរាជសារអំពាវនាវឲ្យពលរដ្ឋទៅបោះឆ្នោតមក លោក សម រង្ស៊ី តែងតែចោទថា ព្រះរាជសារនោះក្លែងក្លាយ ឬ មានការគាបសង្កត់ពីលោកនាយករដ្ឋមន្ត្រីហ៊ុន សែន។