នាយករដ្ឋមន្ត្រីកម្ពុជាបានជំរុញទៅកាន់អាជ្ញាធរមីនឲ្យពង្រឹងសកម្មភាពបន្ថែមទៀតក្នុងការបោសសម្អាតគ្រាប់មីន និងគ្រាប់មិនទាន់ផ្ទុះ ដើម្បីសម្រេចបានផែនការកម្ពុជាគ្មានមីននៅត្រឹមឆ្នាំ២០២៥។
ក្នុងសារាចរស្តីពីការពង្រឹងបន្ថែមលើការងារគ្រប់គ្រងវិស័យសកម្មភាពមីនចុះថ្ងៃទី២០ មិថុនា លោកនាយករដ្ឋមន្ត្រី ហ៊ុន សែន បានណែនាំដល់ប្រតិបត្តិការបោសសម្អាតមីនជាតិ និងអន្តរជាតិទាំងអស់ ត្រូវអនុវត្តការងារឲ្យមានប្រសិទ្ធិភាព គោរពសហការ និងផ្តល់ព័ត៌មានជានិច្ចដល់អាជ្ញាធរមីន ជាពិសេសអាជ្ញាធរមីនត្រូវបន្តដឹកនាំការអនុវត្តផែនការឲ្យមានប្រសិទ្ធិភាពខ្ពស់នៅត្រឹមឆ្នាំ២០២៥ខាងមុខ។
លោក ហ៊ុន សែន បានចេញសេចក្ដីណែនាំបែបនេះ ចំពេលដែលអគ្គនាយកស៊ីម៉ាក់ លោក ហេង រតនា បានឲ្យដឹងតាមហ្វេសបុករបស់លោកថា កម្លាំងជំនាញស៊ីម៉ាក់បានរកឃើញរណ្តៅលាក់គ្រាប់សម័យសង្គ្រាមដែលមានគ្រាប់មិនទាន់ផ្ទុះជាច្រើនរយគ្រាប់ ស្ថិតនៅក្នុងភូមិកោះថ្កូវ ឃុំកោះថ្កូវ ស្រុកជល់គីរី ខេត្តកំពង់ឆ្នាំង កាលពីថ្ងៃម្សិលមិញនេះ។
ក្នុងសេចក្តីប្រកាសព័ត៌មានរបស់សន្និបាតជាតិវិស័យសកម្មភាពមីនកាលពីថ្ងៃទី១៥ ឧសភា ឆ្នាំ២០១៨ អាជ្ញាធរមីនបានឲ្យដឹងថា រយៈពេល២៥ឆ្នាំកន្លងមកនេះ កម្ពុជាបានបោសសម្អាតគ្រាប់មីន និងកាកសំណល់សង្គ្រាមបានជិត ៤លានគ្រាប់ លើផ្ទៃដីប្រមាណ ១៧០០គីឡូម៉ែត្រការ៉េ នៅសល់ជាង ២ ០០០គីឡូម៉ែត្រការ៉េទៀតដែលនឹងត្រូវបោសសម្អាតឲ្យអស់នៅឆ្នាំ២០២៥ខាងមុខ។
អាជ្ញាធរមីនក៏បានឲ្យដឹងផងដែរថា គិតត្រឹមខែធ្នូ ឆ្នាំ២០១៧ គ្រាប់មីន និងគ្រាប់មិនទាន់ផ្ទុះបានធ្វើឲ្យមនុស្សស្លាប់ ១៩ ៧៥៨នាក់ និងរបួស ៣៥ ៩៤១នាក់៕