ក្រសួងមហាផ្ទៃ អំពាវនាវទៅអង្គការសង្គមស៊ីវិល និងអាជ្ញាធរ ឲ្យសហការគ្នាឡើងវិញ ជំរុញការអភិវឌ្ឍប្រទេសតាមបែបប្រជាធិបតេយ្យ ខណៈមានការរិះគន់ថា របត់នយោបាយនៅកម្ពុជាកំពុងដើរចេញពីគន្លងប្រជាធិបតេយ្យ។
រដ្ឋមន្ត្រីក្រសួងមហាផ្ទៃ លោក ស ខេង ក្នុងវេទិកាស្តីពីភាពជាដៃគូរវាងរដ្ឋាភិបាល និងអង្គការសង្គមស៊ីវិល ដែលធ្វើឡើងនៅរាជធានីភ្នំពេញ នាថ្ងៃព្រហស្បតិ៍នេះ បានថ្លែងហាក់ក្រើនរំឭកថា មួយរយៈចុងក្រោយនេះ អាជ្ញាធរ និងអង្គការសង្គមស៊ីវិល ហាក់បានសាចទឹកដាក់គ្នាជុំវិញកិច្ចសហការជំរុញការអភិវឌ្ឍបែបប្រជាធិបតេយ្យ។
មន្ត្រីរដ្ឋាភិបាលរូបនេះ អះអាងទៀតថា ក្រុមអង្គការសង្គមស៊ីវិល បានបង្ហាញការព្រួយបារម្ភថា សេរីភាពរបស់ពួកគេបានរួមតូច ដោយសារតែអាជ្ញាធរទប់ស្កាត់សកម្មភាពស្របច្បាប់របស់ពួកគេ ពេលធ្វើសកម្មភាពលើកកម្ពស់សិទ្ធិមនុស្ស និងបើកវគ្គបណ្តុះបណ្តាលធនធានមនុស្សនៅថ្នាក់មូលដ្ឋាន ដោយថា អាជ្ញាធរតម្រូវឲ្យសុំច្បាប់មុនធ្វើសកម្មភាព។
លោក ស ខេង បន្តថា ចំណែកអាជ្ញាធរវិញ បានរាយការណ៍មកថា ការបង្ក្រាប និងទប់ស្កាត់សកម្មភាពរបស់ក្រុមអង្គការសមាគមទាំងនោះ ដោយសារតែពួកគេមិនបានសហការជាមួយអាជ្ញាធរមូលដ្ឋាន។
លោក ស ខេង អំពាវនាវឲ្យអាជ្ញាធរ និងក្រុមអង្គការសង្គមស៊ីវិល គួរស្វែងរកដំណោះស្រាយ កាត់បន្ថយបញ្ហា ៥០ភាគរយម្នាក់ ដើម្បីបង្កើនកិច្ចសហការភាពជាដៃគូ ធានាដល់ការពង្រឹងលទ្ធិប្រជាធិបតេយ្យនៅកម្ពុជា។
លោក ស ខេង រដ្ឋមន្ត្រីក្រសួងមហាផ្ទៃ
លោក ស ខេង បញ្ជាក់ផងដែរថា សមាគមនៅថ្នាក់មូលដ្ឋាន អាចធ្វើសកម្មភាពបាន ដោយមិនតម្រូវឲ្យពួកគេមកចុះបញ្ជីនៅក្រសួងមហាផ្ទៃទេ ហើយថា រាល់ការធ្វើសកម្មភាព របស់សមាគម ឬអង្គការ ក៏មិនតម្រូវឲ្យសុំច្បាប់ដែរ ដោយថា គ្រាន់តែជូនដំណឹង ៣ថ្ងៃមុនប៉ុណ្ណោះ។
នាយកប្រតិបត្តិអង្គការគណៈកម្មាធិការសហប្រតិបត្តិការដើម្បីកម្ពុជា (CCC) លោក សឿង សារឿន តំណាងក្រុមអង្គការដែលបានចូលរួមក្នុងវេទិកា ប្រាប់ VOD ថា ការក្រើនរំឭករបស់មន្ត្រីជាន់ខ្ពស់នៅក្រសួងមហាផ្ទៃនេះថា ជាសញ្ញាវិជ្ជមានមួយដល់អង្គការសង្គមស៊ីវិលឡើងវិញ។
នាយកប្រតិបត្តិអង្គការគណៈកម្មាធិការសហប្រតិបត្តិការដើម្បីកម្ពុជា (CCC) លោក សឿង សារឿន
សុន្ទរកថារបស់ក្រុមអង្គការសង្គមស៊ីវិល លើកឡើងថា ១ឆ្នាំចុងក្រោយនេះ សង្គមស៊ីវិលបានទទួលរងនូវក្តីព្រួយបារម្ភចំពោះការថយចុះនៃកិច្ចសហការពីសំណាក់អាជ្ញាធរមូលដ្ឋាន ក្នុងការសម្របសម្រួលការអនុវត្តគម្រោងរបស់អង្គការ ភ្ជាប់អង្គការសង្គមស៊ីវិលថា បានចូលរួមក្នុងចលនាបដិវត្តពណ៌ប្រឆាំងនឹងរដ្ឋាភិបាលជាដើម។
ប៉ុន្តែ លោក ស ខេង ឆ្លើយតបថា រដ្ឋាភិបាលមិនដែលប្តឹងអង្គការសង្គមស៊ីវិលណាមួយថា បានចូលរួមធ្វើបដិវត្តពណ៌នោះទេ។
ទោះជាយ៉ាងណា ជម្លោះនយោបាយ ដែលឈានទៅចាប់ឃុំខ្លួនអតីតមេដឹកនាំបក្សប្រឆាំង លោក កឹម សុខា បណ្តេញអង្គការ NDI របស់អាមេរិកចេញពីកម្ពុជា ធ្វើច្បាប់រំលាយគណបក្សប្រឆាំង កម្រិតសិទ្ធិអង្គការសង្គមស៊ីវិល និងបិទប្រព័ន្ធផ្សព្វផ្សាយឯករាជ្យជាដើម ជំរុញឲ្យប្រទេសលោកសេរីចេញសេចក្តីថ្លែងការណ៍ជាបន្តបន្ទាប់ គំរាមផ្តាច់ទំនាក់ទំនងផ្នែកពាណិជ្ជកម្ម និងឈប់ផ្តល់ជំនួយ បើរដ្ឋាភិបាលកម្ពុជាមិនស្តារប្រជាធិបតេយ្យឡើងវិញ។
បើតាមរបាយការណ៍ការសិក្សារួមមួយកាលពីឆ្នាំ២០១២ មានអង្គការសង្គមស៊ីវិលជិត ២ពាន់អង្គការ។ ពួកគេបានចំណាយប្រាក់សរុបជាង ៦០០ ទៅ ៧០០លានដុល្លារក្នុងមួយឆ្នំាៗចូលរួមក្នុងការអភិវឌ្ឍកម្ពុជា។
របាយការណ៍បញ្ជាក់ថា ប្រាក់ដែលបានចំណាយនេះ ផ្តល់អត្ថប្រយោជន៍ដល់មនុស្សជិត ១២លាននាក់ទាំងផ្ទាល់ និងប្រយោល៕