កាលពីសប្ដាហ៍មុនអាមេរិកបានដំឡើងពន្ធ២៥%លើទំនិញជាង៨០០ប្រភេទដែលនាំចូលពីចិនដែលមានតម្លៃជាទឹកប្រាក់៥០ពាន់លានដុល្លា ហើយការអនុវត្តលើការដំឡើងពន្ធនេះនឹងអនុវត្តនៅថ្ងៃទី៦ខែក្រោយនេះ។
មិនតែប៉ុណ្ណោះនៅថ្ងៃច័ន្ទនេះ លោក ដូណាល់ ត្រាំ ក៏បានគំរាមថា ប្រសិនបើចិនធ្វើការសងសឹកនឹងខ្លួន អាមេរិកនឹងដំឡើងពន្ធ១០%បន្ថែមទៀតលើទំនិញចិនដែលមានតម្លៃប្រមាណជា២០០ពាន់លានដុល្លារ។ ទោះជាយ៉ាងណាក៏ដោយ ចិនកាលពីសប្ដាហ៍មុនក៏បានវាយបកទៅសហរដ្ឋអាមេរិកវិញភ្លាមៗដោយដំឡើងពន្ធនាំចូលលើទំិនិញអាមេរិក៦៥៩ប្រភេទដែលមានតម្លៃ៥០ពាន់លានដុល្លារ ហើយការអនុវត្តក៏នឹងចាប់ផ្ដើមនៅថ្ងៃទី ៦ខេកក្កដាដូចគ្នាទៅនឹងអាមេរិកដែរ។
ជម្លោះពាណិជ្ជកម្មរវាងអាមេរិកនិងចិនបែបនេះធ្វើឲ្យពិភពលោកបានមានការព្រួយបាម្ភជាខ្លាំងថាវាអាចនឹងប៉ះពាល់ដល់សេដ្ឋកិច្ចសកល។ ដោយឡែក ប្រទេសនៅតំបន់អាស៊ានវិញ ក៏មានការបារម្ភដូចគ្នានេះដែរ រហូតដល់មេដឹកប្រទេសនេះមួយចំនួនឲ្យមន្ត្រីរបស់ខ្លួនសិក្សាពីផលប៉ះពាល់នៃជម្លោះនេះ។
តើអាស៊ាននឹងរងផលប៉ះពាល់អ្វីខ្លះនៅពេលជម្លោះពាណិជ្ជកម្មរវាងអាមេរិកនិងចិនកើតឡើង?
បើទោះបីវាជាជម្លោះពាណិជ្ជកម្មរវាងប្រទេសពីរយ៉ាងណាក៏ដោយចុះ ប៉ុន្តែអាស៊ាននៅតែមិនអាចជៀសផុតពីប៉ះពាល់នោះទេ។
យោងតាមការចុះផ្សាយរបស់សារព័ត៌មានអនឡាញចិន GB Times អាស៊ានជាដៃគូពាណិជ្ជកម្មដ៏ធំមួយក្នុងចំណោមដៃគូពាណិជ្ជកម្មពីរទៀតដែលរួមមានអាមេរិកនិងអឺរ៉ុប។ ចំណែកឯចិនក៏ជាដៃពាណិជ្ជកម្មមួយដ៏ធំសម្រាប់អាស៊ានផងដែរ។ តាមសារព័ត៌មានដដែលកាលពីឆ្នាំ២០១៧កន្លងទៅ អាស៊ានបាននាំទំនិញចូលទឹកដីចិនមានតម្លៃជាទឹកប្រាក់រហូតដល់ជាង ២៣៥ពាន់លានដុល្លារ។
កាលពីខែឧសភាកន្លងទៅលោក Cyn-Young Park មន្រ្តីផ្នែកសិក្សាស្រាវជ្រាវសេដ្ឋកិច្ចនិងសហប្រតិបត្តិការក្នុងតំបន់របស់ធនាគារអភិវឌ្ឍន៍អាស៊ី បានថ្លែងប្រាប់អ្នកសារព័ត៌មានទូរទស្សន៍ CNBC របស់អាមេរិក ថាអាស៊ានជាតំបន់មួយដែលងាយរងគ្រោះនៅពេលដែលសង្រ្គាមពាណិជ្ជកម្មរវាងអាមេរិកនិងចិនផ្ទុុះឡើង។
លោកបានពន្យល់បន្តថាប្រទេសនៅតំបន់អាស៊ាននាំចេញវត្ថុធាតុដើម និងទំនិញពាក់កណ្ដាលសម្រេចជាច្រើនទៀតទៅផ្គត់ផ្គង់ឲ្យចិន មានន័យថាចិនជាទីផ្សារដ៏ធំមួយសម្រាប់ប្រទេសក្នុងតំបន់អាស៊ាន។ វត្ថុធាតុដើម និងទំនិញពាក់កណ្ដាលសម្រេចទាំងនោះត្រូវបានចិនយកទៅផលិតបន្តដើម្បីក្លាយជាផលិតសម្រេច រួចទើបនាំចេញទៅអាមេរិកនិងអឺរ៉ុបជាដើម។
យោងតាមរបាយការណ៍របស់វិទ្យាស្ថានគោលនយោបាយសេដ្ឋកិច្ចអន្តរជាតិកូរ៉េ ការធ្វើពាណិជ្ជកម្មទំនិញពាក់កណ្ដាលសម្រេចរវាងអាស៊ាននិឹងចិនទៅវិញទៅមកមានប្រមាណជាជាង៥០ភាគរយសម្រាប់ភាគីនីមួយៗ។
តាមការចុះផ្សាយរបស់សារព័ត៌មាន Bloomberg ហ្វីលីពីនជាប្រទេសដែលងាយរងគ្រោះជាងគេក្នុងតំបន់អាស៊ាន ដោយសារតែទំនិញពាក់កណ្ដាលសម្រេចរបស់ហ្វីលីពីនប្រហែល ១៧ភាគរយ ត្រូវបាននាំចេញទៅប្រទេសចិន។ ផលិតផលពាក់កណ្ដាលសម្រេចទាំងនោះភាគច្រើនជាគ្រឿងបង្គុំឧបករណ៍អេឡិចត្រូនិច។ ចិនប្រើប្រាស់ទំនិញទាំងនេះក្នុងការផលិតជាផលិតផលសម្រេចមានដូចជាទូរស័ទ្ទដៃ និងកុំព្យូទ័រជាដើម ហើយទើបនាំចេញទៅសហរដ្ឋអាមេរិក។ ដូច្នេះជម្លោះពាណិជ្ជកម្មនេះនឹងមានផលប៉ះពាល់ជាអវិជ្ជមានដល់ហ្វីលីពីនដោយជៀសមិនរួចឡើយ។
ប្រទេសមួយចំនួនទៀតក្នុងតំបន់នេះមានដូចជា ម៉ាឡេស៊ី ឥណ្ឌូនេស៊ី ថៃ សឹង្ហបុរី និងវៀតណាមជាដើមក៏មិនអាចជៀសផុតពីផលប៉ះពាល់នៃការជម្លោះពាណិជ្ជកម្មរវាងអាមេរិកនិងចិននេះ ព្រោះប្រទេសទាំងនោះក៏នាំចេញផលិតពាក់កណ្ដាលសម្រេចនិងវត្ថុធាតុដើមទៅផ្គត់ផ្គង់ដល់សង្វាក់ផលិតកម្មទំនិញរបស់ចិនដែលត្រូវនាំចេញទៅអាមេរិកដែរ។
ប៉ុន្តែអ្នកវិភាគមួយចំនួននៅតែយល់ថាជម្លោះពាណិជ្ជកម្មរវាងអាមេរិកនិងចិនក៏អាចជាឱកាសមួយសម្រាប់អាស៊ានដែរ ព្រោះថាចិនអាចនឹងពិចារណារកផលិតផលជំនួសទំនិញមួយចំនួនរបស់អាមេរិក។ ឧទាហរណ៍ ប្រេងសណ្កែកសៀងជាដើម ហើយងាកមករកដូងប្រេងរបស់ម៉ាឡេស៊ី និងឥណ្ឌូនេស៊ីវិញ។
តាមការចុះផ្សាយរបស់សារព័ត៌មាន The ASEAN Post អ្នកវិភាគបានជម្រុញឲ្យប្រទេសក្នុងតំបន់អាស៊ានត្រៀមខ្លួនទុកជាមុខដើម្បីទប់ទល់នឹងស្ថានការណ៍នានាដែលអាចកើតមានដោយសារតែជម្លោះពាណិជ្ជកម្មរវាងអាមេរិកនិងចិននេះ ព្រោះថាសេដ្ឋកិច្ចរបស់ប្រទេសក្នុងតំបន់នេះភាគច្រើនពឹងផ្អែកលើការនាំចេញ៕