លោកនាយករដ្ឋមន្ត្រី ហ៊ុន សែន និងជាមេដឹកនាំបក្សកាន់អំណាចផងនោះ បានប្រតិកម្មទៅនឹងការប្រៀបធៀបថា លោកមានលក្ខណសម្បត្តិអន់ជាងបេក្ខភាពនាយករដ្ឋមន្ត្រីគណបក្សប្រជាធិបតេយ្យមូលដ្ឋាន លោក បណ្ឌិត យ៉ង សាំងកុមារ។
កាលពីម្សិលមិញ ទំព័រហ្វេសប៊ុករបស់គណបក្សប្រជាធិបតេយ្យមូលដ្ឋាន បានបង្ហោះរូបលោក ហ៊ុន សែន ដាក់ទន្ទឹមគ្នា និងរូបលោក យ៉ង សាំងកុមារ ដោយប្រៀបធៀបពីលក្ខណសម្បត្តិខុសគ្នា៧ប្រការ ឲ្យពលរដ្ឋពិចារណា។
តាមការប្រៀបធៀបក្នុងទំព័រហ្វេសប៊ុករបស់ គណបក្សប្រជាធិបតេយ្យមូលដ្ឋាន គណបក្សប្រជាជនមាននាយករដ្ឋមន្ត្រី ដែលដឹកនាំដោយលោក ហ៊ុន សែន ថាជានាយករដ្ឋមន្ត្រីងាកឆេះ ចំណែកបេក្ខភាពនាយករដ្ឋមន្ត្រីរបស់គណបក្សប្រជាធិបតេយ្យមូលដ្ឋាន ថាជានាយករដ្ឋមន្ត្រី ងាកផ្តល់ចំណេះ។ មួយវិញទៀតថា មេដឹកនាំបក្សកាន់អំណាចចូលចិត្តប្រើកម្លាំង មានបទពិសោធន៍ធ្វើសង្គ្រាម ប្រើប្រព័ន្ធបញ្ជាពីលើទៅក្រោម ចំណែកមេដឹកនាំគណបក្សបក្សប្រជាធិបតេយ្យមូលដ្ឋានវិញ មេដឹកនាំមានបទពិសោធន៍ខាងអភិវឌ្ឍន៍ ប្រើប្រព័ន្ធប្រជាធិបតេយ្យពីក្រោមមកលើជាដើម។
ប៉ុន្តែលោក ហ៊ុន សែន ក្នុងពិធីចែកសញ្ញាបត្រដល់និស្សិត ក្នុងរាជធានីភ្នំពេញ នាថ្ងៃសុក្រនេះ បានប្រតិកម្ម ថា អ្នកដែលគេកំពុងលើកកម្ពស់ថាមានលក្ខណសម្បត្តិខ្លាំងជាងលោកនោះ ថាជាមនុស្សដែលលោកធ្លាប់បណ្តុះបណ្តាលឲ្យទទួលបានសញ្ញាបត្រជាបណ្ឌិត នៅប្រទេសអាលឺមង់ និងបានវាយបកវិញថា បណ្ឌិតរូបនេះ ទំនងជាមិនទាន់មានលទ្ធភាព ធ្វើនាយករដ្ឋមន្ត្រីដឹកនាំមនុស្សច្រើនលាននាក់ ក្រោយបោះឆ្នោតថ្ងៃទី ២៩ខែកក្កដាឆ្នាំនេះនៅឡើយទេ ។
លោកនាយករដ្ឋមន្ត្រី ហ៊ុន សែន
អ្នកនាំពាក្យគណបក្សប្រជាធិបតេយ្យមូលដ្ឋាន លោក សាម អ៊ីន អះអាងថា គោលនយោបាយរបស់បក្សនេះ មិនបានចោទប្រកាន់ ឬជេរប្រមាថលាភពណ៌ អ្នកដទៃទេ រួមទាំងលោកនាយករដ្ឋមន្ត្រីផង ។ ប៉ុន្តែអ្នកនាំពាក្យរូបនេះថា គណបក្សនៅតែរក្សាសិទ្ធិ ក្នុងការរិះគន់មេដឹកនាំជាដៃគូប្រកួត ទោះបីប្រតិកម្មរបស់នាយករដ្ឋមន្ត្រីនៅពេលនេះ បានបង្កការព្រួយបារម្ភខ្លះពីអនាគតរបស់គណបក្សលោកក៏ដោយ។
អ្នកនាំពាក្យគណបក្សប្រជាធិបតេយ្យមូលដ្ឋាន លោក សាម អ៊ីន
អ្នកវិភាគនយោបាយ លោក បណ្ឌិត មាស នី ហាក់មិនចាប់រម្មណ៍ទៅនឹងប្រតិកម្មនេះទេ ដោយលោកថាអ្នកនយោបាយខ្មែរ ភាគច្រើន វាយប្រហារគ្នាតែពីបញ្ហាបុគ្គល មិនសូវយកគោលនយោបាយទៅប្រកួតគ្នា ដើម្បីជំរុញយន្តការប្រជាធិបតេយ្យទេ។
ប៉ុន្តែលោក មាស នី ដាក់ការព្រួយបារម្ភថា គណបក្សនេះអាចប្រឈមនឹងផ្លូវច្បាប់ទៅថ្ងៃអនាគត បើនៅតែបន្តរិះគន់ ក្បាលម៉ាស៊ីនដឹកនាំ របស់បក្សកាន់អំណាចនោះ ដោយថា បើប្រព័ន្ធតុលាការហាក់មិនទាន់ផ្តល់ជំនឿដល់ពលរដ្ឋគ្រប់និន្នាការនៅឡើយនោះ ។
លោកថា៖«រឿងបញ្ហាតុលាការនេះ បើយើងមើលច្បាប់គណបក្សនយោបាយ សព្វថ្ងៃនេះ អ្នកដែលប្រលូកខ្លួនមកធ្វើនយោបាយក្នុងប្រទេសខ្មែរហ្នឹង ត្រូវតែដាក់ខ្លួនឯងស្ថិតក្នុងហានិភ័យមួយខ្ពស់ ព្រោះអីដោយសារតែ ដោយសារតែភាពមិនច្បាស់លាស់ រវាងអព្យាក្រឹត របស់តុលាការហើយនិងអ្នកនយោបាយ។ អញ្ចឹងនៅពេលខ្លះអ្នកនយោបាយនឹងអាចប្រើប្រាស់តុលាការដើម្បីធ្វើការចោទប្រកាន់ទៅលើនរណាមួយយើងពិបាកនឹងទស្សន៍ទាយបាន»។
យ៉ាងណាក៏ដោយ លោក ហ៊ុន សែន ក្នុងពិធីនោះដែរ បានអំពាវនាវទៅគ្រប់គណបក្សនយោបាយ ដែលបានចូលរួមប្រកួតការបោះឆ្នោត ឲ្យផ្សព្វផ្សាយលើកកម្ពស់តែគោលនយោបាយរបស់ខ្លួន ហើយថាកុំបង្អាប់គោលនយោបាយគណបក្សដទៃ ដើម្បីបញ្ចៀសការវាយបកវិញ។