ចុងឆ្នាំ២០១៧ គឺជាពេលមួយដែលកូរ៉េខាងជើងនិងសហរដ្ឋអាមេរិកប្រឈមមុខដាក់គ្នាខ្លាំងបំផុត រហូតដល់អាមេរិកត្រៀមខ្លួនប្រើកម្លាំងវាយប្រហារ ហើយអាមេរិកក៏បានជំរុញឲ្យសម្ព័ន្ធមិត្តរបស់ខ្លួនទាំងអស់ចូលរួមដាក់សម្ពាធ។
អាមេរិកក៏តែងតែជំរុញឲ្យចិនជាប្រទេសដែលស្និទ្ធទាំងផ្នែកសេដ្ឋកិច្ចនិងនយោបាយជាមួយកូរ៉េខាងជើងជួយដាក់សម្ពាធដើម្បីឲ្យរបបទីក្រុងព្យុងយ៉ាងរំលាយចោលកម្មវិធីអាវុធនុយក្លេអ៊ែកុំឲ្យគំរាមកំហែងឧបទ្វីបកូរ៉េ។
ខណៈអង្គការសហប្រជាជាតិនិងបណ្តាប្រទេសផ្សេងៗចាប់ផ្តើមដាក់សម្ពាធកាន់តែខ្លាំង ចិនក៏ចាប់ផ្តើមដាក់សម្ពាធលើកូរ៉េខាងជើងដែរ។
ក្រោយការបង្ហាញជំហរមាំរបស់ចិនក្នុងការដាក់សម្ពាធ កូរ៉េខាងជើងក៏បង្ហាញការដូរឥរិយាបថងាកមករកការចរចាជាមួយដៃគូជម្លោះផ្សេងៗទៀតរួមទាំងអាមេរិកនិងកូរ៉េខាងត្បូង។
ទំនាក់ទំនងរវាងលោកគីម ជុងអ៊ុន និង លោក ស៊ី ជីនពីងក្នុងពេលចរចា
ក្រោយពេលស្ថានភាពជម្លោះក្នុងតំបន់ហាក់ធូរស្រាលបន្តិច លោក គីម ជុងអ៊ុន យល់ព្រមចូលតុចរចាជាមួយមេដឹកនាំកូរ៉េខាងត្បូង និងសហរដ្ឋអាមេរិកនៅដើមឆ្នាំ២០១៨។
ប៉ុន្តែក្រោយពេលដែលមានការយល់ព្រមកំណត់ថ្ងៃជួបជាមួយមេដឹកនាំកូរ៉េខាងត្បូង និងមេដឹកនាំអាមេរិក លោក គីម ជុងអ៊ុន បានធ្វើដំណើរតាមរថភ្លើងដោយសម្ងាត់មួយទៅកាន់ទីក្រុងប៉េកាំងកាលពីថ្ងៃទី២៨ខែមីនា ប៉ុន្តែក្រោយមកមួយថ្ងៃក៏មានបែកធ្លាយព័ត៌មាន។
រហូតដល់ថ្ងៃទី១៨ខែមេសា លោក ស៊ី ជីនពីង ក៏បានធ្វើដំណើរទស្សនកិច្ចជាលើកដំបូងទៅកាន់ទីក្រុងព្យុងយ៉ាងវិញ។
ក្រោយមកទៀត មេដឹកនាំកូរ៉េខាងជើងលោក គីម ជុងអ៊ុន មានការជួបជាប្រវត្តិសាស្ត្រពីរផ្សេងទៀតគឺ ជួបមេដឹកនាំកូរ៉េខាងត្បូងលោក មូន ជែអ៊ីន នៅថ្ងៃទី២៧ខែមេសា និង ជួបជាមួយប្រធានាធិបតីអាមេរិកនៅថ្ងៃទី ១២ខែមិថុនា។
អ្វីដែលគួរគត់សម្គាល់នោះគឺនៅពេលលោក គីម ជុងអ៊ុន ធ្វើដំណើរទៅជួបជាមួយលោក ដូណាល់ ត្រាំ នៅសិង្ហបុរីគឺ ជិះយន្តហោះរបស់ចិន។ បន្ទាប់មកទៀត នៅថ្ងៃទី១៩ និងថ្ងៃទី២០ខែមិថុនា លោក គីម ជុងអ៊ុន នាំគណៈប្រតិភូទៅជួបជាមួយមេដឹកនាំចិនលោក ស៊ី ជីនពីង នៅទីក្រុងប៉េងកាំងម្តងទៀត។
ជុំនួបវិលជុំចុះឡើងនេះ គឺហាក់ដូចជា លោក គីម ជុងអ៊ុន ទៅសុំយោបល់ពីលោក ស៊ី មុនពេលចរចាជាមួយដៃគូជម្លោះ ហើយបន្ទាប់ពីការជួបចរចាហើយ ក៏ទៅរាយការណ៍ប្រាប់លោក ស៊ី បន្តម្តងទៀត។
ការទាញឲ្យកូរ៉េខាងជើងដូររបបដឹកនាំ
ក្នុងដំណើរទស្សនកិច្ចលើកទី៣របស់លោក គីម ជុងអ៊ុន ទៅកាន់ទីក្រុងប៉េកាំងចាប់ពីថ្ងៃអង្គារដល់ថ្ងៃពុធសប្តាហ៍នេះ លោក ស៊ី ជីនពីង បានជំរុញឲ្យលោក គីម ជុងអ៊ុន ដូររបបដឹកនាំពីរបបផ្តាច់ការទៅជារបបសង្គមនិយមដូចចិនវិញ ដើម្បីងាយស្រួលគ្រប់គ្រងនិងងាយក្នុងការសហការគ្នារវាងប្រទេសទាំងពីរ។
ចំណែកមេដឹកនាំកូរ៉េខាងជើងលោក គីម ជុងអ៊ុន ប្តេជ្ញាថានឹងធ្វើតាមការស្នើឡើងនេះ។ លោកបន្តថា ចិន និងកូរ៉េខាងជើងគឺជាប្រទេសជិតខាងគ្នា មានភាពស្និទ្ធស្នាល និងជួយគ្នាដូចជាគ្រួសារតែមួយ។
