កងរាជអាវុធហត្ថលើផ្ទៃប្រទេស បានព្រមានចាត់វិធានការផ្លូវច្បាប់ទៅបុគ្គលដែលបន្លំប្រើប្រាស់សម្ភារៈ ឯកសណ្ឋាន និងអត្តសញ្ញាណរបស់អង្គភាពខ្លួនខុសច្បាប់។
កងរាជអាវុធហត្ថបានព្រមានបែបនេះនៅក្នុងសេចក្ដីប្រកាសព័ត៌មានកាលពីថ្ងៃទី២២ ខែមិថុនា ដោយថា បុគ្គលមួយចំនួនបានប្រើប្រាស់ដោយគ្មានសិទ្ធិនូវឯកសណ្ឋាន អត្តសញ្ញាបណ្ណ សញ្ញាសម្គាល់ ឬប្រើប្រាស់យានយន្តកងរាជអាវុធហត្ថនៅតាមទីសាធារណៈ និងថា មានការបង្កើតកម្លាំងប្រដាប់អាវុធដោយខុសច្បាប់ផងដែរ។
កងរាជអាវុធហត្ថ បានចាត់ទុកសកម្មភាពទាំងនោះ គឺជាអំពើប្រព្រឹត្តល្មើសនឹងច្បាប់ ដោយព្រមានដាក់ពន្ធនាគារពី ១ខែដល់ ១ឆ្នាំ និងពិន័យជាប្រាក់ពី ១០ម៉ឺនទៅ ២លានរៀល ចំពោះអ្នកប្រើប្រាស់ដោយខុសច្បាប់នូវសម្លៀកបំពាក់អាធរសាធារណៈ និងការប្រើប្រាស់ដោយគ្មានសិទ្ធិនូវយានយន្តដែលមានសញ្ញាសម្គាល់ប្រើប្រាស់ដោយយោធា ឬកងរាជអាវុធហត្ថ។
តាមសេក្ដីប្រកាសព័ត៌មានដដែលនោះបន្ថែមថា ចំពោះអ្នកដែលប្រើប្រាស់នូវឯកសណ្ឋានជាអាទ៍ ដែលមានភាពប្រហាក់ប្រហែលគ្នានឹងយោធា ឬកងរាជអាវុធហត្ថ ដែលអាចនាំឲ្យមានការភាន់ច្រលំក្នុងស្មារតីនៃសាធារណៈជននឹងត្រូវផ្តន្ទាទោសដាក់ពន្ធនាគារពី ១ខែ ដល់ ៦ ខែ និងពិន័យជាប្រាក់ពី ១០ ម៉ឺន ទៅ ១លានរៀល។
បន្ថែមលើនោះ កងរាជអាវុធហត្ថក៏ព្រមានដាក់ពន្ធនាគារពី ១៥ ទៅ ៣០ឆ្នាំ ចំពោះអំពើបង្កើតកម្លាំងប្រដាប់អាវុធដោយគ្មានសិទ្ធិ ឬគ្មានការអនុញ្ញាតពីអាជ្ញាធរស្របច្បាប់។
កងរាជអាវុធហត្ថបានព្រមានបែបនេះ បន្ទាប់ពីកងរាជអាវុធហត្ថបានចាប់ខ្លួនមនុស្ស ៦នាក់ កាលពីថ្ងៃទី១៩ ខែមិថុនា ដែលស្ថាប័ននេះចោទថា បានប្រើប្រាស់ឯកសណ្ឋាន និងឈ្មោះមេបញ្ជាការរងកងរាជអាវុធហត្ថ លោក វង្ស ពិសេន ដើម្បីប្រមូលមនុស្សចូលក្របខណ្ឌនៃស្ថាប័ននេះ៕