សាលាក្តីខ្មែរក្រហមបានឲ្យដឹងថា សហភាពអឺរ៉ុប បានផ្តល់ជំនួយជាង៤លានដុល្លារអាមេរិក ដល់អង្គជំនុំជម្រះវិសាមញ្ញក្នុងតុលាការកម្ពុជា (អ.វ.ត.ក) ដើម្បីគាំទ្រដល់ដំណើរការការងារ សម្រាប់ឆ្នាំ ២០១៨នេះ។
ក្នុងគេហទំព័ររបស់ អ.វ.ត.ក បានចុះផ្សាយនៅថ្ងៃនេះថា សហភាពអឺរ៉ុប បានប្រកាសផ្តល់ជំនួយចំនួន៤ ០៧៨ ៧៧៧ដុល្លារ ស្មើនឹង៣.៥លានអឺរ៉ូ ដល់ (អ.វ.ត.ក) ដើម្បីគាំទ្រដល់ដំណើរការការងារឆ្នាំ ២០១៨ ដែលក្នុងនោះ ទឹកប្រាក់ជាង ២លាន៦សែនដុល្លារជួយដល់ភាគីអន្តរជាតិនិងជាង ១លាន៤សែនដុល្លារជួយដល់ភាគីជាតិ។
សហភាពអឺរ៉ុបគឺជាម្ចាស់ជំនួយធំមួយក្នុងចំណោមម្ចាស់ជំនួយធំៗបំផុត របស់ អ.វ.ត.ក ហើយការផ្តល់ជំនួយចុងក្រោយនេះ ធ្វើឲ្យជំនួយហិរញ្ញវត្ថុដែលសហភាពអឺរ៉ុបបានផ្តល់ដល់ អ.វ.ត.ក មានចំនួនជាង២៦លានដុល្លារ ចាប់ពីសាលាក្តីខ្មែរក្រហមដំណើរការនៅឆ្នាំ ២០០៦ មក។
អ្នកនាំពាក្យ អ.វ.ត.ក លោក ភក្ត្រា បញ្ជាក់ប្រាប់VODថា នៅឆ្នាំ២០១៨នេះ សាលាក្តីខ្មែរក្រហម គ្រោងចំណាយជាង ២៤លានដុល្លារ សម្រាប់ដំណើរការតុលាការបន្តទៅមុខទៀត។
របាយការណ៍ចំណាយរបស់សាលាក្ដីខ្មែរក្រហម បានដឹងថា សាលាក្ដីនេះ បានចំណាយថវិកាដល់ទៅ ២៩៣លានដុល្លារហើយ ចាប់តាំងពីកើតសាលាក្ដីនេះនៅឆ្នាំ២០០៦ដល់ឆ្នាំ២០១៦កន្លងមកនេះ។ ថវិកាទាំងនោះ ទទួលបានជំនួយពីបណ្តាប្រទេសជិត ៤០ ដោយក្នុងនោះប្រទេសជប៉ុនឈលំដាប់ទី១ អាមេរិកលេខ ២ និងសហភាពអឺរ៉ុបលំដាប់លេខ៣៕
