រដ្ឋមន្រ្តីក្រសួងមហាផ្ទៃ លោក ស ខេង សរសើរនាយនាយរងនិងមន្រ្តីប៉ុស្តិ៍នគរបាលច្រកទ្វាព្រំដែនអន្តរជាតិត្រពាំងក្រៀលថា មានប្រាជ្ញាឈ្លៀសវៃក្នុងការបង្ក្រាបការដឹកជញ្ជូនគ្រឿងញៀន។
នគរបាលច្រកទ្វាព្រំដែនអន្តរជាតិត្រពាំងក្រៀល បានចាប់ខ្លួនជនសង្ស័យ៣នាក់ និងថ្នាំញៀនប្រភេទមេតំហ្វេតាមីនគ្រីស្តាល់ ហៅម៉ាទឹកកក១២០គីឡូក្រាមកាលពីថ្ងៃទី២៦ខែមិថុនានេះ ត្រង់ចំណុចច្រកទ្វាព្រំដែនអន្តរជាតិត្រពាំងក្រៀល។
លោក ស ខេង លើកឡើងក្នុងលិខិតសសើរកាលពីថ្ងៃពុធម្សិលមិញថា នគរបាលច្រកទ្វាព្រំដែនអន្តរជាតិត្រពាំងក្រៀលមានស្នាដៃយ៉ាងធំធេង ក្នុងការបង្រ្កាបករណីដឹកជញ្ជូនគ្រឿងញៀនដ៏ធំ។ បើតាមលិខិតដដែល លោក ស ខេង ចាត់ទុកការបង្រ្កាបការជួញដូរគ្រឿងញៀននេះ ជាការរួមចំណែកទប់ស្កាត់ការបង្កគ្រោះថ្នាក់ដល់ប្រជាពលរដ្ឋដែលលួចលាក់ប្រើប្រាស់គ្រឿងញៀន។
អាជ្ញាធរជាតិប្រយុទ្ធប្រឆាំងគ្រឿងញៀនបានដុតបំផ្លាញគ្រឿងញៀនចំនួន៦៤គីឡូក្រាមកាលពីថ្ងៃអង្គារសប្តាហ៍នេះ គឺថ្ងៃតែមួយដែលនគរបាលច្រកទ្វាព្រំដែនអន្តរជាតិត្រពាំងក្រៀលចាប់បានថ្នាំញៀនចំនួន១២០គីឡូក្រាម៕