រដ្ឋបាលរាជធានីភ្នំពេញប្រកាសដល់ពលរដ្ឋដែលនឹងធ្វើដំណើរឆ្លងកាត់រង្វង់មូលចោមចៅនៅថ្ងៃសុក្រស្អែកនេះ ឲ្យពង្វាងទិសចរាចរចូលមកទីក្រុង ដោយសារតែមានការសម្ភោធបើកការដ្ឋានសាងសង់ស្ពានអាកាសនិងផ្លូវក្រោមដីនៅត្រង់រង្វង់មូលចោមចៅ។
យោងតាមសេចក្តីជូនដំណឹងរបស់សាលារាជធានីភ្នំពេញចេញកាលពីថ្ងៃពុធម្សិលមិញឲ្យដឹងថា លោកនាយករដ្ឋមន្រ្តី ហ៊ុន សែន និងលោកស្រី ប៊ុន រ៉ានី និងធ្វើជាអធិបតីក្នុងការបើកការដ្ឋានសាងសង់ស្ពានអាកាស និងផ្លូវក្រោមដីត្រង់ចំណុចរង្វង់មូលចោមចៅ សង្កាត់ចោមចៅទី៣ ខណ្ឌពោធិសែនជ័យនៅព្រឹកថ្ងៃសុក្រស្អែកនេះ ដោយមានអ្នកចូលរួមប្រមាណ៦០០០នាក់។
តាមរយៈសេចក្តីជូនដំណឹងនោះ សាលារាជធានីភ្នំពេញបានស្នើដល់ម្ចាស់រថយន្ដដឹកទំនិញគ្រប់ប្រភេទ និងម្ចាស់រថយន្ដដឹកអ្នកដំណើរចេញ-ចូលរាជធានីភ្នំពេញពង្វាងផ្លូវឆ្លង់កាត់រង្វង់មូលចោមចៅ ដើម្បីរក្សាសន្តិសុខ សុវត្ថិភាព សណ្តាប់ធ្នាប់នៅកន្លែងរៀចំកម្មវិធី។ ក្នុងសេចក្តីប្រកាសបានណែនាំដល់រថយន្ដមកពីផ្លូវជាតិលេខ៣ ចូលរាជធានីភ្នំពេញត្រូវធ្វើដំណើរតាមផ្លូវពង្វាងបត់ស្ដាំទៅតាមផ្លូវព្រៃស មុខវត្តស្លែងឬទៅតាមផ្លូវទួលពង្រ។ ចំណែកឯរថយន្តតាមផ្លូវចោមចៅ ចេញក្រៅរាជធានីទៅផ្លូវជាតិលេខ៣ ត្រូវធ្វើដំណើរតាមផ្លូវទួលពង្រ។ តាមសេចក្តីប្រកាសដដែល ចំពោះអ្នកធ្វើដំណើរតាមផ្លូវជាតិលេខ៤ ចូលមកទីក្រុងត្រូវបត់ស្តាំត្រង់ផ្សារបែកចាននិងបត់វាងតាមផ្លូវកប់ស្រូវ៕