ប្រទេសថៃត្រូវបានកាន់កាប់ដោយក្រុមយោធាតាំងពីមានរដ្ឋប្រហារទម្លាក់អតីតនាយករដ្ឋមន្រ្តី លោកស្រី យីងឡាក់ ស៊ីណាវ៉ាត្រា កាលខែឧសភាពីឆ្នាំ២០១៤មកម៉្លេះ។ រដ្ឋាភិបាលយោធាមួយនេះ តែងតែសន្យានឹងប្រជាពលរដ្ឋថៃ ថានឹងរៀបចំឲ្យមានការបោះឆ្នោត ដើម្បីឲ្យប្រទេសខ្លួនមានការគ្រប់គ្រងតាមបែបស៊ីវិលវិញ ក្នុងអំឡុងពេលពេល២ឆ្នាំ។
ប៉ុន្តែ រដ្ឋាភិបាលយោធាប្រទេសនេះ តែងតែលើកពេលបោះឆ្នោតម្តងហើយម្តងទៀត។ កាលបរិច្ឆេតនៃការបោះឆ្នោតចុងក្រោយនេះ ដែលកំណត់ដោយរដ្ឋាភិបាលយោធាថា នឹងមានការរៀបចំឲ្យមានការបោះឆ្នោតនាខែកុម្ភៈឆ្នាំ២០១៩ខាងមុន ប៉ុន្តែកាលពីថ្ងៃអង្គារសប្តាហ៍មុននាយករដ្ឋមន្រ្តីថៃបច្ចុប្បន្ន លោក ប្រាយុទ្ធ ចាន់អូចា បានប្រកាសថា ការបោះឆ្នោតដែលគ្រោងនឹងធ្វើនៅខែកុម្ភៈឆ្នាំ២០១៩ នឹងមិនកើតមានទេ ដោយលើកហេតុផលថា រដ្ឋាភិបាលត្រូវរៀបចំពិធីឡើងគ្រងរាជសម្បត្តិរបស់ព្រះមហាក្សត្រខ្លួនជាមុខសិន។
នេះ មិនមែនជាលើកទី១ទេ ដែលរដ្ឋាភិបាលយោធាថៃ តែងតែលើកពេលក្នុងការរៀបចំការបោះ ដោយលើកផលផ្សេងៗ មកអះអាងថាជារឿងសំខាន់ជាការបោះឆ្នោត ដែលខ្លួនតែងតែសន្យា។
តើមូលហេតុធ្វីបានជារដ្ឋាភិបាលយោធាថៃដឹកនាំដោយលោក ប្រាយុទ្ធ ចាន់អូចា ចេះ តែរកលេសពន្យាពេលនៃការបោះឆ្នោតម្តងហើយម្តងទៀត?
ការពិតមួយ ដែលមិនអាចបដិសេធ បានគឺរដ្ឋាភិបាលរបស់ក្រុមយោធាថៃនៅតែខ្លាចញញើតនឹងឥទ្ធិពលរបស់ត្រកូល ស៊ីណាវ៉ាត្រា ដែលចាក់ឬសក្នុងនយោបាយប្រទេសថៃជិត២០ឆ្នាំមកហើយ។ ថ្វីត្បិតតែបងប្អូនត្រកូល ស៊ីណាវ៉ាត្រា ដែលរួមមានលោក ថាក់ស៊ីន និងអតីតនាយករដ្ឋមន្រ្តីលោកស្រី យីងឡាក់ ដែលត្រូវបានទម្លាក់ដោយរដ្ឋប្រហារយោធាដឹកនាំដោយលោកប្រាយុទ្ធ ចាន់អូចា កំពុងរស់នៅនិរទេសនៅបរទេសយ៉ាងណាក៏ដោយ ក៏គណបក្សរបស់ពួកគេធ្លាប់ដឹកនាំនៅតែមានវត្តមានក្នុងប្រទេសថៃដដែល។
ត្រកូល ស៊ីណាវ៉ាត្រា នៅតែមានឥទ្ធិពលលើគណបក្សភឿថៃ បើទោះបីជាមេដឹកនាំគណបក្សនេះតែងតែអះអាងថា ទាំងលោកថាក់ស៊ីន ទាំងលោកស្រីយីងឡាក់ ពុំមានឥទ្ធិពលណាមួយលើគណបក្សខ្លួនយ៉ាងណាក៏ដោយ ក្រោយពេលដែលរដ្ឋាភិបាលយោធាបានចោទប្រកាន់ ហើយជម្រុញឲ្យមានការស៊ើបអង្កេតទៅលើគណបក្សនេះ ថាមានទាក់ទងនឹងអតីតនាយករដ្ឋមន្រ្តីទាំងពីររូបនោះ។
គណបក្សភឿថៃ ជាគណបក្សមួយដែលមានប្រជាប្រិយបំផុតនៅក្នុងស្រទាប់ប្រជាជនក្រីក្រថៃ ជាពិសេសក្រុមកសិករ ដោយសារតែគោលនយោបាយគណបក្សនេះ គាំទ្រនិងធានាតម្លៃកសិផលរបស់ពួកគេ។ និយាយជារួម បើទោះជានាយករដ្ឋមន្រ្តីយោធាថៃ លោក ប្រាយុទ្ធ ចាន់អូចា មិនបាននិយាយជាសាធារណៈពីឥទ្ធិពលត្រកូល ស៊ីណាវ៉ាត្រា យ៉ាងណាក៏ដោយ ក៏អ្វីដែលលោក ប្រាយុទ្ធ ធ្វើនៅពេលនេះ បង្ហាញពីការបារម្ភរបស់ខ្លួននូវការវិលត្រឡប់របស់គ្រួសារ ថាក់ស៊ីន មកវិញ នៅពេលដែលគណបក្សភឿថៃឈ្នះឆ្នោតនោះ។
ម្យ៉ាងវិញទៀត ការពន្យាពេលបោះឆ្នោតរបស់រដ្ឋាភិបាលយោធាម្តងហើយម្តងទៀតអាចបណ្ដាលមកពីពួកគេត្រូវការពេលវេលាបន្ថែមទៀត ក្នុងការកសាងទំនុកចិត្តនិងប្រជាប្រិយភាពពីសំណាក់មហាជនថៃ ជាពិសេសក្រុមកសិករ ដែលធ្លាប់តែជាអ្នកដែលស្មោះស្ម័គ្រនឹងអតីតនាយករដ្ឋមន្រ្តីបងប្អូនត្រកូល ស៊ីណាវ៉ាត្រា។ បើទោះបីជាលោក ប្រាយុទ្ធ មិនដែលនិយាយជាសាធារណៈថា លោកនឹងបង្កើតគណបក្ស ហើយឈរឈ្មោះជាបេក្ខជននាយករដ្ឋមន្រ្តីយ៉ាងណាក៏ដោយ ប៉ុន្តែ កាលពីខែមករាកន្លងទៅ លោកបានប្រកាសថា លោកពេលនេះមិនមែនជាមន្រ្តីយោធាទៀតទេ លោកជាអ្នកនយោបាយ។
ក្នុងរយៈពេលចុងក្រោយនេះ លោកនាយករដ្ឋមន្រ្តី ប្រាយុទ្ធ ចាន់អូចា តែងតែចុះទៅតាមមូលដ្ឋានជួបសំណះសំណាលជាប្រជាជនថៃជាញឹកញាប់ ដែលស្របពេលជាមួយគ្នានេះគណបក្សដទៃទៀត មិនអាចធ្វើការជួបជុំគ្នាបានស្រួលដូចលោក ប្រាយុទ្ធ ទេ។ លោកនាយករដ្ឋមន្រ្តីរូបនេះបានប្រើឱកាសនេះ ដើម្បីកសាងភាពស្និទ្ធស្នាលជាមួយប្រជាជននៅតាមមូលដ្ឋានទាំងនោះ។ ដូច្នេះការពន្យាពេលបោះឆ្នោត ក៏អាចជួយឲ្យនាយករដ្ឋមន្រ្តីរូបនេះ មានពេលវេលាគ្រប់គ្រាន់ ដើម្បីកសាងប្រជាប្រិយភាពរបស់ខ្លួន។
ចាប់តាំងពីឆ្នាំ២០១៤ រដ្ឋាភិបាលយោធា បានលើកពេលបោះឆ្នោត ដែលខ្លួនបានកំណត់ចំនួនបីលើកមកហើយ។ ប្រទេសកាន់លទ្ធិប្រជាធិបតេយ្យ ដែលជាសម្ព័ន្ធមិត្តស្និទស្នាលរបស់ថៃមានដូចជាសហគមន៍អឺរ៉ុប និង អាមេរិកជាដើមតែងតែជម្រុញឲ្យរដ្ឋាភិបាលយោធាថៃរៀបចំឲ្យមានការបោះឆ្នោតតាមបែបប្រជាធិបតេយ្យឡើងវិញឲ្យបានឆាប់តាម ដែលអាចធ្វើទៅបាន៕
