អភិបាលខេត្តកោះកុង លោកស្រី មិថុនា ភូថង នៅព្រឹកថ្ងៃសុក្រនេះ បានជួបចរចារជាមួយពលរដ្ឋជាង២០០នាក់ ក្នុងជំលោះដីធ្លីជាមួយក្រុមហ៊ុន Koh Kong Plantation Co.,Ltd និងKoh Kong Sugar Industry Co., Ltd. នៅវត្តសាមគ្គីរង្ស៊ី ក្នុងទីក្រុងភ្នំពេញបន្ទាប់ពីពួកគាត់បដិសេធត្រលប់ទៅដោះស្រាយនៅឯខេត្តកោះកុង។
លោក ស្រី មិថុនា ភូថង បានស្នើឲ្យតំណាងប្រជាពលរដ្ឋទៅពិនិត្យមើលដីដែល គ្រោងចែកជូនពួកគាត់ ហើយសន្យាថា អាជ្ញាធរខេត្តនឹងចាប់ឆ្នោជូនពួកគាត់នៅភ្នំពេញ ដោយផ្តល់ដី ០២ហិចតា ក្នុងមួយគ្រួសារ ព្រមទាំងផ្តល់ជូនថវិកា ៣០០០ដុល្លារ ប្រសិនបើពួកគាត់យល់ព្រម។
អភិបាលខេត្តកោះកុង លោកស្រី មិថុនា ភូថង
ក្រោយពីកិច្ចប្រជុំជាមួយអភិបាលខេត្ត ប្រជាពលរដ្ឋ៣០នាក់ តំណាងឲ្យ ប្រជាពលរដ្ឋ៣១៧គ្រួសារ មកពីស្រុក ស្រែអំបិល និង បុទុមសាគរ បានយល់ព្រមទៅពិនិត្យដីដែលអាជ្ងាធរខេត្តគ្រោងចែកជូនពួកគាត់ តែទោះជាយ៉ាងណាប្រជាពលរដ្ឋមិនទាន់ប្រាកដថានឹងទទួលយកនោះទេ។
តំណាងពលរដ្ឋម្នាក់គឺ អ្នកស្រី ធឹម ស្រីផាត បានប្រាប់វីអូឌីថា អ្នកស្រីនឹងទៅពិនិត្យមើលដីនោះជាមួយតំណាងពលរដ្ឋផ្សេងទៀត។ អ្នកស្រីនឹងធ្វើការសម្រេចិត្តបន្ទាប់ពីពិនិត្យដីរួច ប៉ុន្តែអាជ្ញាធរត្រូវផ្តល់ប្រាក់បន្ថែម ព្រមទាំងឈូសឆាយដី។
អ្នកស្រី ធឹម ស្រីផាត បាននិយាយថា៖ «ឲ្យយើងទៅមើលកន្លែងហ្នឹង អាចយកបានដែរអត់ បើសិនជាយើងយកបាន អាហ្នឹងចង់និយាយថាបើសិនជាដីថ្មី បើសិនជាខ្ញុំមើលហើយអាចយកបាន ទាល់តែគាត់ហ្នឹងឈួសឆាយ ធ្វើឲ្យយើង ហើយនឹងខ្ញុំដែលថាអ្នកទទួលបានហ្នឹង ឲ្យចាប់លេខក្បាលឡូត៍ ហើយទទួលថវិការ សំណង ហ្នឹងមកហើយយកមក បង្ហាញបងប្អូន បញ្ជាក់ថា អាចទទួលយកបានហើយ អាហ្នឹងចាំបងប្អូនសំរេចចិត្តឲ្យបងប្អូនទៅយកទាំងអស់គ្នា»។
តំណាងពលរដ្ឋម្នាក់ទៀតគឺ អ្នកស្រី ចេង ស៊ា បានប្រាប់វីអូឌីថា ដីដែលអភិបាលខេត្តស្នើឲ្យពលរដ្ឋទៅពិនិត្យមើល ជាដីដែលខាងខេត្តធ្លាប់សន្យាថានឹងផ្ដល់ជូនកាលពីលើកមុន តែប្រជាពលរដ្ឋពុំបានទៅមើលនោះទេដោយសារឆ្ងាយ ហើយបារម្ភដីគ្មានជីជាតិ នឹងត្រូវចំណាយពេលឈូសឆាយទៀត។ ប៉ុន្តែពេលនេះអាជ្ញាធរខេត្តបានសន្យាជួយឈូសឆាយដី ទើបពួកគាត់យល់ព្រមទៅពិនិត្យមើលដីនោះ។
តំណាងពលរដ្ឋម្នាក់ទៀតគឺ អ្នកស្រី ចេង ស៊ា
អ្នកស្រី ចេង ស៊ាងបាននិយាយថាតំណាងប្រជាពលរដ្ឋត្រូវផ្តល់ចំលើយជូនអាជ្ញាធរខេត្តនៅថ្ងៃស្អែក។
កាលពីថ្ងៃទី ២៦ខែមិថុនា ២០១៨នេះ ពួកគាត់បានឡើងមកភ្នំពេញម្តងទៀតដើម្បីស្វែងរកអន្តរាគមន៍ពីលោកនាយរដ្ឋមន្រ្តី ហ៊ុន សែន តែអាជ្ងាធរក្រុងភ្នំពេញបានរារាំងពួកគាត់មិនឲ្យទៅគេហដ្ឋានលោកហ៊ុន សែន។
ប្រជាពលរដ្ឋទាំង ៣១៧គ្រួសារ មានវិវាទដីធ្លីជាមួយក្រុមហ៊ុន Koh Kong Plantation Co.,Ltd និងKoh Kong Sugar Industry Co., Ltd. តាំងពីឆ្នាំ ២០០៨។ ពួកគេឡើងមកតវ៉ានៅរាជធានីភ្នំពេញនេះចំនួន ៥ លើក តែពុំមានដំណោះស្រាយនោះទេ។