មន្ត្រីជាន់ខ្ពស់សាលារាជធានីភ្នំពេញឲ្យដឹងថា ពេលនេះអាជ្ញាធរពាក់ព័ន្ធកំពុងតែអនុវត្តវិធានការចំនួនបីក្នុងការដោះស្រាយបញ្ហាជំនន់ទឹកភ្លៀង ដោយការ ស្តាលូ ធ្វើប្រឡាយ និងបង្កើតស្ថានីយ៍បូមទឹកចេញបន្ថែមទៀត។
អ្នកនាំពាក្យសាលារាជធានីភ្នំពេញ លោក ម៉េត មាសភក្តី មានប្រសាសន៍ថា ផែនការរំដោះទឹករៀបចំឡើងតាំងពីរដើមរដូវប្រាំង។ លោកបន្តថា សាលារាជធានីបានសហការជាមួយ មន្ទីរសាធារណការស្តាលូបានជាង៤០០គីឡូម៉ែត្ររួមមាននៅក្នុងខណ្ឌចំនួនបួនមានខណ្ឌដូនពេញ ចំការមន ទួលគោក និងខណ្ឌ៧មករា។
លោកបន្តថា សម្រាប់ការងាររៀបចំប្រឡាយដែលអាចស្តុក និងលំហូរទឹកផងនោះ គ្រាន់តែសម្រាមមួយភាគបីដែលស្តាពីប្រឡាយស្ទឹងមានជ័យ មានចំនួនជាងមួយម៉ឺនម៉ែត្រគូប។
លោក ភក្តី ប្រាប់បន្ថែមទៀតថា សាលារាជធានីបានបង្កើតស្ថានីយ៍បូមទឹកថ្មី គឺស្ថានីយ៍បូមទឹកលូប្រាំ និងបង្កើនម៉ូទ័របូមទឹកនៅតាមស្ថានីយ៍បូមទឹកចាស់។
អ្នកនាំពាក្យសាលារាជធានីភ្នំពេញ លោក ម៉េត មាសភក្តី
សម្រាប់នាយកប្រតិបត្តិសមាគមធាងត្នោត លោក សឿង សារ៉ន យល់ថា បញ្ហាជំនន់ទឹកភ្លៀងនៅភ្នំពេញគឺដោយសារការលុបបឹងមួយចំនួនក្នុងរាជធានីភ្នំពេញរយៈពេល១០ឆ្នាំចុងក្រោយនេះ។
សម្រាប់នាយកប្រតិបត្តិសមាគមធាងត្នោត លោក សឿង សារ៉ន
បើតាមមន្ត្រីសាលារាជធានីភ្នំពេញឲ្យដឹងថា កាលពីថ្ងៃទី២៥និង២៦មិថុនាកន្លងមក ទីក្រុងភ្នំពេញទទួលភ្លៀងធំ ធ្វើឲ្យកំពស់ទឹកភ្លៀងឡើងដល់៥០ទៅ៨០មីល្លីម៉ែត្រ ដោយគំហុកទឹកភ្លៀងនេះធ្វើឲ្យលិចផ្លូវ និងផ្ទះមួយចំនួន។
