ធនាគារជាតិកម្ពុជាបានរំឭកឲ្យប្រជាពលរដ្ឋមានការប្រុងប្រយ័ត្នចំពោះបញ្ហាបំណុលនិងការគៀបសង្កត់ផ្សេងៗដោយថា បច្ចុប្បន្នមានស្ថាប័នផ្តល់ប្រាក់កម្ចីមួយចំនួនដែលមិនមានការទទួលស្គាល់ដោយច្បាប់ កំពុងតែធ្វើសកម្មភាព។
ក្នុងសេចក្ដីប្រកាសព័ត៌មានមួយចុះថ្ងៃទី ២៩ ខែ មិថុនា ម្សិលមិញស្ដីពីផលវិបាកនៃការប្រើប្រាស់កម្ចីខុសច្បាប់ ដោយធនាគារជាតិឲ្យប្រុងប្រយ័ត្នបន្ទាប់ពីកត់សម្គាល់ឃើញមានក្រុមហ៊ុនឯកជនផ្សព្វផ្សាយតាមបណ្ដាញសង្គម និងចែកខិតប័ណ្ណ ឬផ្ញើសារតាមទូរសព្ទជាដើម។
បើតាមសេចក្ដីប្រកាសព័ត៌មាននោះធនាគារជាតិព្រមានថាការទទួលកម្ចីខុសច្បាប់ អតិថិជនអាចប្រឈមនឹង បំណុលវ័ណ្ឌក ដោយសារអត្រាការប្រាក់ និង កម្រៃសេវាផ្សេងៗខ្ពស់យ៉ាងខ្លាំងជាងគ្រឹះស្ថានដែលស្របច្បាប់។
បន្ថែមលើនោះធនាគារជាតិបន្តថាអតិថិជនក៏អាចប្រឈមមុខនឹងការគំរាមកំហែង គៀបសង្កត់ គ្រោះថ្នាក់ ឬរូបភាពផ្សេងៗ ដើម្បីបង្ខំឲ្យសងប្រាក់ដើម ការប្រាក់ និង ប្រាក់ពិន័យដែលមិនសមហេតុផលទៅក្រុមហ៊ុនវិញ ចំណែកឯទ្រព្យធានារបស់អតិថិជនអាចត្រូវបានក្រុមហ៊ុន ឬអ្នកផ្ដល់កម្ចីខុសច្បាប់រឹបអូសដោយពុំឆ្លងកាត់ការសម្រេចពីតុលាការជាដើម។
ទោះបីជាយ៉ាងណាទាក់ទងនឹងបញ្ហានេះ ធនាគាជាតិថាបានកំពុងស្នើសុំការសហការពីអាជ្ញាធរពាក់ព័ន្ធដើម្បីចាត់វិធានការតាមផ្លូវច្បាប់ទៅលើក្រុមហ៊ុន ឬអ្នកផ្ដល់កម្ចីខុសច្បាប់គ្រប់រូបភាពទាំងអស់៕
