ពលរដ្ឋខ្មែរ ១៤នាក់ ក្នុងនោះមានទាំងកុមារ ៣នាក់ផងដែរ ត្រូវបានជួយសង្គ្រោះនៅឯក្រៅប្រទេស និងបញ្ជូនត្រឡប់មកប្រទេសកំណើតវិញកាលពីចុងខែមិថុនាកន្លងមកនេះ។ នេះបើតាមសេចក្ដីប្រកាសព័ត៌មានរបស់ក្រសួងការបរទេសកម្ពុជានៅថ្ងៃនេះ។
ក្រសួងការបរទេស បាននិយាយបន្ថែមនៅក្នុងសេចក្ដីប្រកាសព័ត៌មាននោះថា ពលករខ្មែរ ៩នាក់ ក្នុងនោះមានស្ត្រី ៤នាក់ និងកុមារ ២នាក់ ត្រូវបានជួយសង្គ្រោះបាននៅក្នុងប្រទេសម៉ាឡេស៊ី និងបញ្ជូនត្រឡប់មកប្រទេសកំណើតវិញចាប់ពីថ្ងៃទី២៣ ដល់ថ្ងៃទី២៩ ខែមិថុនាកន្លងមកនេះ។
ក្រសួងការបរទេស បានឲ្យដឹងបន្ថែមថា ពលរដ្ឋខ្មែរ ៥នាក់ទៀត ក្នុងនោះមានកុមារម្នាក់ផងដែរ ត្រូវបានជួយសង្គ្រោះបាននៅក្នុងប្រទេសចិន និងបញ្ជូនត្រឡប់មកប្រទេសកំណើតវិញកាលពីថ្ងៃទី២៨ ខែមិថុនា ក្រោយពីត្រូវបានមេខ្យល់នាំទៅរៀបការដោយខុសច្បាប់នៅក្នុងប្រទេសចិន។
តាមរបាយការណ៍របស់ក្រសួងការបរទេសកម្ពុជា រយៈពេលជាង ៦ខែនៃដើមឆ្នាំ២០១៧ អាជ្ញាធរកម្ពុជាបានជួយសង្រ្គោះនិងធ្វើមាតុភូមិនិវត្តន៍ ពលករខ្មែរចំនួន ៤៥០ នាក់។ ក្នុងនោះ បញ្ចូនមកពីប្រទេសថៃ មានចំនួន ១៧៨នាក់ ម៉ាឡេស៊ី ចំនួន១៣៤នាក់ វៀតណាម ចំនួន៦៨នាក់ មកពីឡាវ ចំនួន២៤នាក់ និងចំនួន ២២នាក់ផ្សេងទៀត បញ្ចូនមកពីប្រទេសចិន៕