ក្រុមអ្នកឃ្លាំមើលការបោះឆ្នោត បានប្រកាសថា ពួកគេនឹងដាក់ពង្រាយពលរដ្ឋស្ម័គ្រចិត្ត ដើម្បីឃ្លាំមើលបរិយាកាសពីខាងក្រៅការិយាល័យបោះឆ្នោត ប៉ុន្ដែ គ.ជ.ប. អះអាងថា សកម្មភាពបែបនេះ ហាក់ពុំត្រូវបានអនុញ្ញតដោយច្បាប់នោះឡើយ។
កាលពីថ្ងៃទី៣០ មិថុនា អង្គការឃ្លាំមើលការបោះឆ្នោតហៅកាត់ថា ខុមហ្វ្រែល បានផ្ញើលិខិតមួយទៅប្រធានគណៈកម្មការបោះឆ្នោតនៅរាជធានី-ខេត្ត ដើម្បីស្នើសុំដាក់ពង្រាយប្រជាពលរដ្ឋស្ម័គ្រចិត្ត សម្រាប់ឃ្លាំមើលបរិយាកាសនយោបាយ និងសិទ្ធិមនុស្ស ពីខាងក្រៅការិយាល័យបោះឆ្នោតនៅចុងខែកក្កដានេះ។
ប៉ុន្ដែ លិខិតនេះ ត្រូវបានបង្វែរទៅគណៈកម្មាធិការជាតិរៀបចំការបោះឆ្នោត គ.ជ.ប. ហើយ គ.ជ.ប. បានចាត់ទុកសកម្មភាពនេះថា ពុំត្រូវបានអនុញ្ញាតដោយច្បាប់ ព្រោះអង្គការនេះបានប្រកាសមិនចូលរួមឃ្លាំមើលការបោះឆ្នោត និងមិនបានចុះបញ្ជីនៅ គ.ជ.ប. ។
មន្ដ្រីជាន់ខ្ពស់កម្មវិធីផ្នែកអង្កេតរបស់អង្គការខុមហ្វ្រែល លោក កន សាវាង្ស អះអាងថា តាមច្បាប់អង្គការសង្គមស៊ីវិលពិតជាត្រូវចុះឈ្មោះ ដើម្បីអាចឃ្លាំមើលដំណើរការបោះឆ្នោត និងចូលទៅដល់មណ្ឌលបោះឆ្នោតនីមួយៗ។ ប៉ុន្ដែ លោកថា អង្គការរបស់លោក មិនបានឃ្លាំមើលដល់ក្នុងការិយាល័យបោះឆ្នោតនោះទេ ពោលគឺឃ្លាំមើលតែបរិយាកាសនយោបាយ និងសិទ្ធិមនុស្ស ពីខាងក្រៅការិយាល័យបោះឆ្នោតប៉ុណ្ណោះ។
មន្ដ្រីជាន់ខ្ពស់កម្មវិធីផ្នែកអង្កេតរបស់អង្គការខុមហ្វ្រែល លោក កន សាវាង្ស
ទោះបីមានការខ្វែងគំនិតត្រង់ចំណុចនេះក្ដី អ្នកនាំពាក្យ គ.ជ.ប លោក ហង្ស ពុទ្ធា ក្រើនរំលឹកថា អង្គការខុមហ្វ្រែល ត្រូវពិនិត្យពីសកម្មភាពរបស់ខ្លួន និងអនុវត្តទៅតាមច្បាប់ ដែលមានជាធរមាន។
អ្នកនាំពាក្យ គ.ជ.ប លោក ហង្ស ពុទ្ធា
បើតាមរបាយការណ៍ អង្គការខុមហ្វ្រែល គ្រោងដាក់ពង្រាយពលរដ្ឋអ្នកសង្កេតការណ៍ស្ម័គ្រចិត្តចំនួន ៣០០នាក់ សម្រាប់ឃ្លាំមើលស្ថានការណ៍នយោបាយនៅឃុំ-សង្កាត់ចំនួន ៣០០កន្លែងនៅទូទាំងប្រទេស ហើយអង្គការនេះបានជូនដំណឹងអំពីការដាក់ពង្រាយពលរដ្ឋអ្នកសង្កេតការណ៍នេះទៅអាជ្ញាធររួចរាល់ហើយ។
ទោះជាយ៉ាងណា ខុមហ្វ្រែល និងអង្គការសង្គមស៊ីវិលមួយចំនួនទៀត បានប្រកាសមិនចូលរួមឃ្លាំមើលការបោះឆ្នោតនៅថ្ងៃទី២៩ ខែកក្កដានេះទេ៕
