ជម្លោះដីធ្លីដ៏រ៉ាំរៃរបស់ពលរដ្ឋមួយចំនួននៅក្នុងខេត្តកោះកុង ត្រូវបានអាជ្ញាធរដោះស្រាយបញ្ចប់នៅមុនថ្ងៃបោះឆ្នោតមកដល់ ក្រោយមានបញ្ជាពីរដ្ឋមន្រ្តីក្រសួងមហាផ្ទៃទៅរដ្ឋបាលខេត្តនានា ឲ្យដោះស្រាយវិវាទដីធ្លីក្នុងដែនសមត្ថកិច្ចរបស់ខ្លួនឲ្យមានប្រសិទ្ធភាព ដើម្បីកុំឲ្យពលរដ្ឋឡើងមកតវ៉ាដល់ភ្នំពេញ។
មួយរយៈចុងក្រោយនេះ ប្រជាពលរដ្ឋមកពីបណ្តាខេត្តនានា ក្នុងនោះមានពលរដ្ឋមកខេត្តកោះកុងផង បានសម្រុកឡើងមកតវ៉ាដីធ្លីដល់រាជធានីភ្នំពេញ ដើម្បីជំរុញទៅស្ថាប័នពាក់ព័ន្ធឲ្យពន្លឿនដំណោះស្រាយបញ្ចប់វិវាទដីធ្លីរបស់ពួកគេ ស្របពេលដែលការបោះឆ្នោតខិតជិតមកដល់។
អភិបាលខេត្តកោះកុង កាលថ្ងៃទី២៩មិថុនានេះ បានសម្របសម្រួលរកដំណោះស្រាយវិវាទដីធ្លីជាមួយប្រជាពលរដ្ឋជាង ២០០នាក់តំណាងឲ្យពលរដ្ឋ ៣១៧គ្រួសារនៅស្រុកស្រែអំបិល និងបុទុមសាគរដែលកំពុងមានជម្លោះដីធ្លីក្រុមហ៊ុនជាមួយ Koh Kong Plantation Co.,Ltd និង Koh Kong Sugar Industry Co., Ltd. ខណៈពលរដ្ឋទាំងនោះឡើងមកតវ៉ានៅភ្នំពេញ និងស្នាក់នៅវត្តសាមគ្គីរង្សី។
ជាអ្នកភូមិម្នាក់ លោក ហម ហាត ប្រាប់វីអូឌីថា នៅថ្ងៃនេះ មន្រ្តីក្រសួងរៀបដែនដី និងអាជ្ញាធរខេត្ត បានចុះដោះស្រាយដោយបានចែកប័ណ្ណក្បាលដីដល់ពលរដ្ឋម្នាក់ៗ។
លោកបន្តថា គ្រួសារនីមួយៗ ត្រូវបានអាជ្ញាធរដោះស្រាយជាមួយប្រាក់សំណងខូចខាត ៣ពាន់ដុល្លារ និងដីទំហំ ២ហិកតា ប៉ុន្តែ លោកថា ពលរដ្ឋនៅពុំទាន់ទទួលបានដីជាក់ស្ដែងនៅឡើយទេរហូតមកដល់ពេលនេះ។
លោកបន្ថែមថា៖ «គោលការណ៍របស់រដ្ឋាភិបាលបានដោះស្រាយដោយរលូនហើយ បើគិតជាភាគរយវាប្រហែល ៩០% ប៉ុន្តែ ពេលនេះ គេទើបតែឲ្យចុងសន្លឹកដឹងពីក្បាលដីប៉ុណ្ណោះ គេមិនទាន់ឲ្យប្លង់រឹង ប្លង់ទន់នៅឡើយទេ។ សម្រាប់ទីតាំងដីវិញ តាមខ្ញុំពិនិត្យមើលទៅ វាដូចជាមិនទាន់ច្បាស់នៅកន្លែងណានៅឡើយទេ ធ្វើនេះដូចជានៅច្របល់គ្នាទៅជារួមតែម្តង»។
កាលពីខែមិនា រដ្ឋមន្ត្រីក្រសួងរៀបចំដែនដីបានសម្រេចកាត់ដីជាតិ ១០០០ហិកតាពីក្រុមហ៊ុនស្ករអំពោះខេត្តកោះកុង ដើម្បីបែងចែកទៅពលរដ្ឋ ២ក្រុម ក្នុងនោះពលរដ្ឋ ២០០គ្រួសារទទួលបានដំណោះស្រាយនៅនឹងកន្លែង ខណៈពលរដ្ឋ ១៧៥គ្រួសារទៀត ត្រូវបានផ្លាស់ប្ដូរឲ្យទៅរស់នៅលើទីតាំងថ្មីជាមួយប្រាក់សំណង ២៥០ដុល្លារ។
តំណាងឲ្យពលរដ្ឋ ១៧៥គ្រួសារ អ្នកស្រី ផាវ ញ៉ើង និយាយថា ដំណើរការនៃការចុះដោះស្រាយរបស់អាជ្ញាធរហាក់មិនមានតម្លាភាពដែលរហូតមកដល់ថ្ងៃនេះ មានពលរដ្ឋជាង ១០០គ្រួសារប៉ុណ្ណោះទទួលបានដីជាក់លាក់ ខណៈពលរដ្ឋ ៥២គ្រួសារទៀតមិនទាន់ទទួលយកនៅឡើយ។
អ្នកស្រីបន្ថែមថា៖ «ការដោះស្រាយនេះមិនមានភាពត្រឹមត្រូវទេ គេឲ្យពួកខ្ញុំចាប់សន្លឹកឆ្នោតមែន ប៉ុន្តែ សន្លឹកឆ្នោតត្រូវបានគេ រៀបចំស្រាប់។ រៀបចំស្រាប់ម៉េច? ឧទារណ៍ថា នៅភូមិ «ក» អញ្ចឹង បែរជាដាក់លេខក្បាលឡូតិ៍ដីហ្នឹងចម្រុះគ្នាពីភូមិ «ក» រហូតដល់ភូមិ «ខ» ភូមិ «គ» ដែលមិនមែនជាការព្រមព្រៀងរបស់សហគមន៍ទេ។ ខ្ញុំថា នេះមិនជាបញ្ហាប៉ុន្មានទេ ប៉ុន្តែ សម្រាប់ដីខ្ញុំ ខ្ញុំទទួលយកអត់បានទេ»។
អភិបាលរងខេត្តកោះកុង លោក អន ភារៈ សុំមិនធ្វើអធិប្បាយទេនៅថ្ងៃនេះ ដោយលោកថា មេឃកំពុងភ្លៀងខ្លាំងមិនអាចនិយាយទូរស័ព្ទបានទេ ខណៈនៅថ្ងៃនេះ មន្រ្តីក្រសួងរៀបចំដែនដី និងអាជ្ញាធរខេត្តកោះកុងបានចុះចែកប័ណ្ណក្បាលដីដល់ ពលរដ្ឋខេត្តកោះកុងដែលទើបទទួលបានដំណោះស្រាយនោះ។
អភិបាលខេត្តកោះកុង លោកស្រី មិថុនា ភូថង កាលពីចុងខេត្តមុននេះ បានសម្រេចកាត់ដីពីក្រុមហ៊ុនប្រគល់ជូនពលរដ្ឋ ៣១៧គ្រួសារមកពីស្រុកស្រែអំបិល និងបុទុមសាគរ ដើម្បីបញ្ចប់ជម្លោះ ខណៈពលរដ្ឋទាំងនោះមានជម្លោះដីធ្លីជាមួយក្រុមហ៊ុន Koh Kong Plantation Co.,Ltd និងKoh Kong Sugar Industry Co., Ltd. តាំងពីឆ្នាំ ២០០៨។
កាលពីថ្ងៃទី ១៣ខែមិថុនា រដ្ឋមន្ត្រីក្រសួងមហាផ្ទៃ លោក ស ខេង បានបញ្ជាទៅរដ្ឋបាលខេត្តនានាឲ្យដោះស្រាយវិវាទដីធ្លីក្នុងដែនសមត្ថកិច្ចរបស់ខ្លួនឲ្យមានប្រសិទ្ធភាព និងរក្សាភាពអត់ធ្មត់ក្នុងការបំពេញការងារពាក់ព័ន្ធនឹងបញ្ហាទំនាស់ដីធ្លី ដើម្បីកុំឲ្យពលរដ្ឋឡើងមកតវ៉ាដល់ភ្នំពេញ៕