ប្រតិបត្តិករនៃតំបន់រមណីយដ្ឋានអង្គរ បានឲ្យដឹងថា ចំនួនភ្ញៀវទេសចរ និងចំណូលថវិកាដែលបានមកពីការលក់សំបុត្រទេសចរណ៍តំបន់អង្គរ សុទ្ធតែបានកើនឡើង នៅក្នុងត្រីមាសទី១ក្នុងឆ្នាំនេះ។
គ្រឹះស្ថានអង្គរដែលជាក្រុមហ៊ុនរដ្ឋគ្រប់គ្រងនៅតំបន់អង្គរ បាននិយាយក្នុងសេចក្ដីប្រកាសព័ត៌មានកាលពីថ្ងៃម្សិលមិញនេះថា ភ្ញៀវទេសចរបរទេសជាង ១លាន ៣៥ម៉ឺននាក់ បានចូលទស្សនាតំបន់រមណីយដ្ឋានអង្គរចន្លោះពីខែមករាដល់ខែមិថុនាកន្លងមកនេះ ដោយបានកើនឡើងប្រហែល ១០ភាគរយ បើធៀបនឹងរយៈពេលដូចគ្នាក្នុងឆ្នាំ២០១៧កន្លងមក។
គ្រឹះស្ថានដដែលនេះ បានឲ្យបន្ថែមថា ប្រាក់ចំណូលបានមកពីការលក់សំបុត្រជូនភ្ញៀវទេសចរបរទេសចូលទស្សនារមណីយដ្ឋានប្រវត្តិសាស្ត្រមួយនេះ ក៏បានកើនឡើងដល់ជាង ៦១លានដុល្លារផងដែរ ឬមានកំណើន ១៧.៨៤ភាគរយ បើធៀបនឹងត្រីមាសទី១កាលពីឆ្នាំមុន។
ស្ថាប័ននេះ បានឲ្យដឹងបន្ថែមថា ថវិកាដល់ទៅជាង ២.៧១លានដុល្លារ ត្រូវបានកាត់ចេញពីប្រាក់ចំណូលនៃការលក់សំបុត្រចូលទស្សនាតំបន់អង្គរ ទៅឲ្យមូលនិធិមន្ទីរពេទ្យគន្ធបុប្ផា នៅក្នុងរយៈពេល ៦ខែកន្លងមកនេះ ដែលជាផ្នែកមួយនៃការអនុវត្តតាមការប្ដេជ្ញាចិត្តរបស់រដ្ឋាភិបាលកម្ពុជាចំពោះមូលនិធិមន្ទីរពេទ្យកុមារមួយនេះ។
កាលពីឆ្នាំ២០១៧កន្លងទៅនេះ រមណីយដ្ឋានអង្គរ ទទួលបានភ្ញៀវទេសចរប្រមាណ ២,៤៥៧,០២៣នាក់ និងទទួលបានចំណូល ១០៧,៩៧៦,៤៣៩ដុល្លារ៕