ក្រុមអ្នកជួយសង្គ្រោះនៅក្នុងប្រទេសថៃ បានធ្វើការបោសសម្អាតផ្លូវបំបែកមួយ សម្រាប់អ្នកមុជទឹកនៅខាងក្នុងបរិវេណរូងភ្នំដែលជោរជន់ដោយទឹកជំនន់នៅថ្ងៃចន្ទនេះ ខណៈដែលការស្វែងរកក្មេងប្រុសចំនួន១២នាក់និងគ្រូបង្វឹកបាល់ទាត់របស់ពួកគេបានឈានចូលក្នុងថ្ងៃទី៩។ នេះបើតាមការចុះផ្សាយរបស់ទីភ្ងាក់ងារសារព័ត៌មានរ៉យទ័រ។
ក្រុមក្មេងប្រុសអាយុចន្លោះពី១១ទៅ១៦ឆ្នាំ និង គ្រូបង្វឹកវ័យ២៥ឆ្នាំរបស់ពួកគេ បានបាត់ខ្លួនកាលពីថ្ងៃទី២៣ខែមិថុនា ក្នុងអំឡុងពេលធ្វើដំណើរកំសាន្តទៅកាន់រូងភ្នំ ថាម ហ្លួង ដែលមានចម្ងាយ១០គីឡូម៉ែត្រ ក្រោមភ្នំនៅខេត្តឈៀងរ៉ៃភាគខាងជើង។
រ៉យទ័រ បានផ្សាយទៀតថា អាជ្ញធរនៅមិនទាន់រកឃើញអ្វីផ្សេង រហូតមកដល់ពេលនេះ ក្រៅពីសម្ភារៈដែលបន្សល់ទុកនៅមាត់រូងភ្នំនិងស្នាមបាតដៃនៅលើជញ្ជាំងរូងភ្នំ។
ជាមួយនឹងផ្លូវចេញពីរូងភ្នំដែលត្រូវបានរារាំងដោយទឹកជំនន់ពីភ្លៀងដែលធ្លាក់ខ្លាំង ក្រុមអ្នកជួយសង្គ្រោះសង្ឃឹមថា ក្មេងប្រុសបានឆ្លងកាត់ថ្មភ្នំដែលមានឈ្មោះហៅក្រៅថា «ឆ្នេរខ្សាច់ប៉ាតាយ៉ា» បន្ទាប់ពីតំបន់ទេសចរណ៍ដ៏ល្បីល្បាញមួយរបស់ប្រទេសថៃ។
រ៉យទ័យ បានផ្សាយទៀតថា បេសកម្មស្វែងរកក្រុមក្មេងប្រុសដែលបាត់ខ្លួន ធ្វើឲ្យមានការចាប់រម្មណ៍ជាខ្លាំងពីសំណាក់ប្រជាជាតិថៃ ជាមួយការចុះផ្សាយព័ត៌មានជាច្រើន ដែលគ្របដណ្តប់ដោយព័ត៌មានថ្មីៗស្តីពីការរីកចម្រើននៃការជួយសង្គ្រោះដែលបានធ្វើឡើងដោយកិច្ចខិតខំប្រឹងប្រែងយ៉ាងធំធេង ដែលមានមនុស្សចូលរួមជាង១០០០នាក់។
អ្នកមុជទឹកមកពីអង្គភាព SEAL របស់កងទ័ពជើងទឹកថៃ បានស្ថិតនៅជួរមុខនៃការស្វែងរកដែលត្រូវបានគាំទ្រដោយក្រុមជួយសង្គ្រោះអន្តរជាតិមកពីសហរដ្ឋអាមេរិក អង់គ្លេស និងជប៉ុន និងកន្លែងផ្សេងទៀត នោះបើតាមរ៉យទ័រ។
អភិបាលខេត្តឈៀងរ៉ៃ លោក ណារ៉ុងសាក់ ត្រូវបានសារព័ត៌មានដកស្រង់សម្តីមកចុះផ្សាយនៅថ្ងៃចន្ទនេះថា «អង្គភាព SEAL កាលពីយប់មិញបានឈានដល់ចំណុចប្រសព្វ T ហើយថ្ងៃនេះ ពួកគេនឹងបន្តទៅខាងឆ្វេង ប៉ុន្តែឧបសគ្គមួយ ដែលជួបប្រទះ គឺរន្ធតូចនៃផ្លូវមួយដែលយើងត្រូវការពង្រីក ដើម្បីឱ្យក្រុមការងារអាចឆ្លងកាត់បាន»។
លោក ណារ៉ុងសាក់ បានបន្ថែមថា មជ្ឈមណ្ឌលប្រតិបត្តិមួយត្រូវបានបង្កើតឡើង នៅក្នុងអ្វីដែលក្រុមអ្នកជួយសង្គ្រោះ ហៅថា កន្លែងទីបីរបស់រូងភ្នំ ដែលមានចម្ងាយប្រហែល១.៧គីឡូម៉ែត្រពីច្រករូងភ្នំ។
រដូវភ្លៀងធ្លាក់ បានបង្អាក់ប្រតិបត្ដិការស្វែងរកក្រុមក្មេងប្រុសដែលបាត់ខ្លួន ដោយមានអ្នកមុជទឹកជាច្រើន ដើរតាមបណ្តោយជញ្ជាំងនៃរូងភ្នំដែលលិចទឹក ដែលមិនអាចមើលឃើញនៅក្នុងទឹកភក់។
បើតាមរ៉យទ័យ វេជ្ជបណ្ឌិត និយាយថា ក្មេងប្រុសអាចរស់បានច្រើនថ្ងៃ ដោយមិនមានអាហារ ប៉ុន្តែ វាអាស្រ័យថាតើពួកគេអាចរកឃើញទឹកស្អាតគ្រប់គ្រាន់ដើម្បីទទួលទានបានទេ។
ការអធិដ្ឋានពិសេសត្រូវបានធ្វើឡើងនៅព្រឹកថ្ងៃចន្ទ នៅឯសាលា ម៉ែសៃប្រាសិតសាទ ដែលក្មេងប្រុសចំនួន៦នាក់ដែលបាត់ខ្លួនបានសិក្សា៕
