រដ្ឋាភិបាល ចោទអង្គការឃ្លាំសិទ្ធិមនុស្សអន្តរជាតិ Human Rights Watch ថា ជាអ្នកគាំទ្រអ្នកនយោបាយខ្មែរក្បត់ជាតិ ខណៈអង្គការនេះអំពាវនាវទៅសហគមន៍អន្តរជាតិឲ្យដាក់ទណ្ឌកម្មលើឧត្ដមសេនីយ៍កម្ពុជា ១២រូប ដែលអង្គការនេះថា ជាខ្នងបង្អែកជំរុញឲ្យមានការរំលោភសិទ្ធិមនុស្សធ្ងន់ធ្ងនៅកម្ពុជា។
អង្គការ Human Rights Watch កាលពីចុងខែមុន បានចេញរបាយការណ៍មួយ ដោយបានអំពាវនាវទៅសហគមន៍អន្តរជាតិ ឲ្យស៊ើបអង្កេត ដើម្បីដាក់ទណ្ឌកម្មលើឧត្តមសេនីយ៍ជាន់ខ្ពស់ ១២នាក់ នៃកងកម្លាំងប្រដាប់អាវុធជាតិ ដោយថា អ្នកទាំងនោះជាកម្លាំងដ៏រឹងមាំការពារអំណាចលោក ហ៊ុន សែន ជំរុញឲ្យមានការរំលោភសិទ្ធិមនុស្សធ្ងន់ធ្ងរនៅកម្ពុជាចាប់តាំងពីឆ្នាំ១៩៧៥មក។
ឧត្តមសេនីយ៍ទាំង ១២រូប ដែល Human Rights Watch ស្នើឲ្យសហគមន៍អន្តរជាតិស៊ើបអង្កេតនោះ មានអគ្គមេបញ្ជាការនៃកងយោធពលខេមរភូមិន្ទ លោក ប៉ុល សារឿន អគ្គមេបញ្ជាការរងកងទ័ព លោក គន់ គីម មេបញ្ជាការកងរាជអាវុធហត្ថលើផ្ទៃប្រទេសលោក សៅ សុខា មេបញ្ជាការរងកងរាជអាវុធហត្ថលើផ្ទៃប្រទេស លោក រ័ត្ន ស្រ៊ាង មេបញ្ជាការកងពលតូចពិសេសឆត្រយោង៩១១ លោក ចាប ភក្តី អគ្គស្នងការនគរបាលជាតិលោក នេត សាវឿន និងអគ្គស្នងការរងនគរបាលជាតិលោក សុខ ផល លោក ម៉ក់ ជីតូ និងលោក ជួន សុវណ្ណ ជាដើម។
ប៉ុន្តែ កាលពីថ្ងៃចន្ទម្សិលមិញ ក្រសួងមហាផ្ទៃ បានចេញលិខិតមួយថ្កោលទោស និងចាត់ទុករបាយការណ៍នេះថា ជាឧបាយកលទុច្ចរិតរបស់ក្រុមជនបរទេសមួយចំនួន ដែលមានគំនិតគាំទ្រអ្នកនយោបាយខ្មែរក្បត់ជាតិ ក្នុងបំណងបង្កឲ្យមានចលាចល បំផ្លាញសន្តិភាព និងសន្តិសុខរបស់ប្រជាជនខ្មែរ។
អង្គការសិទ្ធិមនុស្ស Human Rights Watch បានស្នើឲ្យដាក់ទណ្ឌកម្មលើឧត្ដមសេនីយ៍ជាន់ខ្ពស់ទាំង ១២រូបនោះ បន្ទាប់ពីសហរដ្ឋអាមេរិក បានសម្រេចបង្កកទ្រព្យសម្បត្តិលោក ហ៊ីង ប៊ុនហៀង មេបញ្ជាការកងអង្គរក្សនាយករដ្ឋមន្ត្រី ហ៊ុន សែន ដោយថា លោក ប៊ុនហៀង ជាបុគ្គលជាប់ពាក់ព័ន្ធទៅនឹងការរំលោភបំពានសិទ្ធិមនុស្សយ៉ាងធ្ងន់ធ្ងរ និងប្រព្រឹត្តអំពើពុករលួយ។
ទោះជាយ៉ាងណា ក្រសួងមហាផ្ទៃ បានរំឭកអង្គការឃ្លាំសិទ្ធិមនុស្សអន្តរជាតិ ដែលមានទីតាំងនៅសហរដ្ឋអាមេរិកមួយនេះឲ្យឈប់ជ្រៀតជ្រែកអធិបតេយ្យភាពរបស់កម្ពុជា ឈប់ផលិតរបាយការណ៍ក្លែងក្លាយ ក្នុងបំណងញុះញង់ធ្វើឲ្យប៉ះពាល់ដល់កិត្តិយសកងយោធពលខេមរភូមិន្ទ និងកងកម្លាំងនគរបាលជាតិ។
ក្រៅពីក្រសួងមហាផ្ទៃ លោក ហ៊ុន សែន ផ្ទាល់ បានប្រតិកម្មទៅនឹងអង្គការសិទ្ធិមនុស្សមួយនេះកាលពីថ្ងៃម្សិលមិញនេះ ដោយជំរុញឲ្យដាក់ទណ្ឌកម្មលើមន្ត្រីប្រដាប់អាវុធទាំង ១១ម៉ឺននាក់នៅទូទាំងប្រទេស ខណៈលោកអះអាងថា កម្លាំងប្រដាប់អាវុធទាំងនោះ គាំទ្រលោក និងការពាររដ្ឋាភិបាល៕