សមត្ថកិច្ចឲ្យដឹងថា យ៉ាងហោចណាស់កម្មករ ២០នាក់បានរងរបួសធ្ងន់ស្រាល ខណៈមន្រ្តីអង្គការសង្គមស៊ីវិលថា កម្មករជាង ៣០នាក់បានរងរបួសធ្ងន់ស្រាលក្នុងហេតុការណ៍គ្រោះថ្នាក់ចរាចរណ៍មួយ នៅស្រុកកណ្តាលស្ទឹង ខេត្តកណ្តាលនៅថ្ងៃនេះ។
អធិការរងនគរបាលស្រុកកណ្តាលស្ទឹង លោក ឆេង ស៊ុន បានឲ្យដឹងថា រថយន្តមួយដែលដឹកកម្មករពីខេត្តតាកែវមកបំពេញការងារនៅក្នុងរោងចក្រនៅរាជធានីភ្នំពេញនោះ បានក្រឡាប់នៅព្រឹកថ្ងៃនេះ នៅឯភូមិជីម៉ូវ ស្ថិតក្នុងឃុំត្បែង បន្ទាប់ពីរថយន្តនោះប្រទះនឹងរ៉ឺម៉កមួយគ្រឿង។
មន្ត្រីនគរបាលរូបនេះ បានឲ្យដឹងថា កម្មករ ២០នាក់ បានរងរបួស និងត្រូវបានបញ្ជូនទៅសង្គ្រោះនៅតាមមន្ទីរពេទ្យនានាអស់ហើយ ប៉ុន្តែ លោកពុំអាចបញ្ជាក់ពីចំនួនកម្មកររងរបួសធ្ងន់ ឬស្រាលប៉ុន្មាននាក់នោះឡើយ។
ទោះយ៉ាងណា អង្គការសង់ត្រាល់ ដែលអះអាងថា បានបញ្ជូនមន្ត្រីចុះទៅអង្កេតផ្ទាល់នៅកន្លែងកើតហេតុនោះ បានឲ្យដឹងថា កម្មករ-កម្មការិនីសរុប ៣៤នាក់ បានរងរបួស ក្នុងនោះកម្មករ ១០នាក់រងរបួសធ្ងន់។
បើតាមអង្គការសង់ត្រាល់ កម្មករទាំងនោះបម្រើការងារនៅរោងចក្រ Moha Garments Co. Ltd ស្ថិតក្នុងសួនវឌ្ឍនៈ២ ជារោងចក្រផលិតសម្លៀកបំពាក់យីហោល្បីនៅអឺរ៉ុប និងអាមេរិក។
មន្រ្តីមូលនិធិរបបសន្តិសុខសង្គម ប.ស.ស ប្រចាំនៅសាខាខណ្ឌដង្កោ អ្នកស្រី សយ សុភា ឲ្យដឹងថា រោងចក្រដែលមានកម្មករជួបគ្រោះថ្នាក់នោះ បានចូលជាសមាជិក ប.ស.ស រួចហើយ ខណៈមន្រ្តី ប.ស.ស ខណ្ឌដង្កោ កំពុងចុះអន្តរាគមន៍ករណីនេះ ប៉ុន្តែ មិនទាន់អាចបញ្ជាក់ចំនួនកម្មករដែលគ្រោះថ្នាក់នោះបាននៅឡើយទេ។
របាយការណ៍គ្រោះថ្នាក់ចរាចរណ៍របស់ក្រសួងមហាផ្ទៃឆ្នាំ២០១៧ បានបង្ហាញថា កម្មករ-កម្មការិនី ៣៦នាក់ បានស្លាប់ ៣២០រងរបួសធ្ងន់ និង ១៩៧០នាក់ទៀតរងរបួសស្រាល នៅក្នុងគ្រោះថ្នាក់ចរាចរណ៍លើកម្មករសរុប ១,៧៧១ លើកនៅទូទាំងប្រទេស។
របាយការណ៍នេះ បញ្ជក់ថា មូលហេតុចម្បងដែលបណ្តាលឲ្យកើតមានគ្រោះថ្នាក់នោះដោយសារបើកបរហួសល្បឿនកំណត់ មិនគោរពសិទ្ធអាទិភាព មិនប្រកាន់ស្តាំ បទឆ្វេងស្តាំមិនប្រយ័ត្ន បើកជែងក្នុងស្ថានភាពគ្រោះថ្នាក់ និងបើកបរក្នុងស្ថានភាពស្រវឹងជាដើម៕
