មន្ត្រីក្រសួងបរិស្ថាន បានឲ្យដឹងថា ម៉ាស៊ីនសម្អាតទឹកកខ្វក់ ២គ្រឿង ត្រូវបានចិនផ្ដល់មកកម្ពុជាកាលពីថ្ងៃម្សិលមិញនេះ ដោយថា សម្រាប់សម្អាតទឹកកខ្វក់នៅរាជធានីភ្នំពេញ និងខេត្តកែប។
អគ្គនាយកនៃអគ្គនាយកដ្ឋានគាំពារបរិស្ថាន លោក ហេង ណារ៉េត បានប្រាប់វីអូឌីនៅថ្ងៃនេះថា ម៉ាស៊ីនសម្អាតទឹកកខ្វក់ ២គ្រឿងដែលមានតម្លៃប្រហែល ៦ម៉ឺនដុល្លារអាមេរិកនោះ ត្រូវបានប្រគល់រដ្ឋាភិបាលចិនផ្ដល់មកកម្ពុជាជាជំនួយឥតសំណង អំឡុងពិធីចុះហត្ថលេខាលើអនុស្សារណៈស្ដីពីគម្រោងសម្អាតទឹកកខ្វក់រវាងក្រសួងបរិស្ថានកម្ពុជា និងក្រសួងអេកូឡូស៊ី និងបរិស្ថានចិន កាលពីថ្ងៃម្សិលមិញនេះ។
មន្ត្រីបរិស្ថានរូបនេះ បានឲ្យដឹងទៀតថា ម៉ាស៊ីនសម្អាតទឹកកខ្វក់មួយគ្រឿង នឹងត្រូវយកទៅដាក់ឲ្យប្រើប្រាស់នៅរាជធានីភ្នំពេញ ដែលអាចសម្អាតទឹកកខ្វក់បានប្រហែល ១០ម៉ែត្រគូបក្នុងមួយថ្ងៃៗ ខណៈដែលម៉ាស៊ីនមួយគ្រឿង នឹងត្រូវយកទៅដាក់ប្រើប្រាស់នៅខេត្តកែប ដែលអាចសម្អាតទឹកបាន ៥០ម៉ែត្រគូបក្នុងមួយថ្ងៃ។
បើតាមលោក ណារ៉េត ទឹកកខ្វក់ដល់ទៅ ៣០ម៉ឺនម៉ែត្រគូប ត្រូវបានបង្ហូរចេញពីប្រភពនានានៅក្នុងរាជធានីភ្នំពេញ ខណៈដែលលោកថា វាប៉ះពាល់ផលដល់ប្រភពទឹកប្រើប្រាស់របស់ប្រជាជន និងមច្ឆជាតិ៕
