សាលារាជធានីភ្នំពេញ គ្រោងដាក់ឲ្យដំណើរការរថយន្តក្រុងសាធារណៈ ២០គ្រឿងបន្ថែមទៀត បន្ទាប់ពីរថយន្តទាំងនោះដែលជាផ្នែកមួយនៃជំនួយរថយន្តក្រុង ៨០គ្រឿងពីប្រទេសជប៉ុននោះ ត្រូវបានដឹកញ្ជូនមកដល់កម្ពុជាកាលពីថ្ងៃម្សិលមិញនេះ។
អ្នកនាំពាក្យសាលារាជធានីភ្នំពេញ លោក ម៉េត មាសភក្ដី បានប្រាប់វីអូឌីតាមទូរស័ព្ទនៅថ្ងៃនេះថា អាជ្ញាធររាជធានីភ្នំពេញកំពុងរៀបចំពីទីតាំងដាក់បណ្ដាញរថយន្តក្រុងបន្ថែម ប៉ុន្ដែ លោកថា ពុំទាន់ចេញជាផ្លូវការនៅឡើយទេ។
អ្នកនាំពាក្យរូបនេះ ប្រាប់ថា ការបន្ថែមខ្សែដឹកជញ្ជូនសាធារណៈនេះ គឺឆ្លើយតបទៅនឹងតម្រូវការរបស់ប្រជាពលរដ្ឋ ដោយគ្រោងនឹងពង្រីកចំនួនខ្សែ និងបន្ថែមចំនួនខ្សែរត់ត្រង់ចំណុចមមាញឹក ដើម្បីឲ្យពេលវេលានៃការរង់ចាំរបស់ប្រជាពលរដ្ឋកាន់តែខ្លី។
របាយការណ៍សាលាក្រុងរាជធានីភ្នំពេញ បានឲ្យដឹងថា រថយន្ដក្រុងសាធារណៈ ត្រូវបានដាក់ឲ្យដំណើរការលើផ្លូវ ០៨ខ្សែបច្ចុប្បន្ននេះ ប៉ុន្តែ សាលារាជធានីភ្នំពេញ គ្រោងបង្កើនបណ្ដាញដឹកជញ្ជូន ១ខ្សែទៀត។
សព្វថ្ងៃនេះ សាលារាជធានីភ្នំពេញ បានដាក់ឲ្យដំណើរការរថយន្តក្រុងសាធារណៈសរុប ១៥៧គ្រឿងរួចមកហើយ ដោយក្នុងនោះរថយន្តក្រុងចំនួន ១០០គ្រឿង ជាជំនួយរបស់ប្រទេសចិន៕