អភិបាលកិច្ច

គម្រោងតភ្ជាប់ផ្លូវដែកកម្ពុជា ថៃឈានដល់ការសម្រេចរួម

លោក ហ៊ុន សិរីវឌ្ឍន៍
| ០៦ កក្កដា ២០១៨
ម៉ោង ១៦:០៨

លោក ARKHOM TERMPITTAYAPAISITH រដ្ឋមន្រ្តីនៃក្រសួងដឹកជញ្ជូនថៃ បានដឹកនាំគណ:ប្រតិភូ មកជួបពិភាក្សាជាមួយលោក ស៊ុន ចាន់ថុល នៅទីស្តីការក្រសួងសាធារណការ និងដឹកជញ្ជូន ដើម្បីពិភាក្សាបញ្ចប់សេចក្តីព្រាងនៃកិច្ចព្រមព្រៀងដឹកជញ្ជូនតាមផ្លូវដែករវាងកម្ពុជា និង ថៃ (រូបភាព៖ ហ្វេសប៊ុក ក្រសួងសាធារណការ និងដឹកជញ្ជូន)

គម្រោងតភ្ជាប់ផ្លូវរថភ្លើងកម្ពុជា ថៃ ឈានដល់ការសម្រេចរួមនៅព្រឹកនេះ ខណៈភាគីទាំងពីរសន្យាបន្តនីតិវិធី ដើម្បីជំរុញឱ្យឲ្យមានការចុះហត្ថលេខាលើកិច្ចព្រមព្រៀងមួយក្នុងពេលខាងមុខ។

បន្ទាប់ពីជំនួបជាមួយរដ្ឋមន្ត្រីសាធារណការថៃលោក Arkhom Permpittayapaisith នៅទីស្តីការក្រសួងសាធារណការកម្ពុជានៅព្រឹកនេះ រដ្ឋមន្ត្រីក្រសួងសាធារណការលោក ស៊ុន ចាន់ថុល មានប្រសាសន៍ថា គម្រោងតភ្ជាប់ផ្លូវដែកកម្ពុជា ថៃ បានឈានដល់ការព្រមពៀងរវាងភាគីទាំងពីរហើយ ដោយនៅតែរង់ចាំតែការចុះហត្ថលេខាលើកិច្ចព្រមព្រៀងប៉ុណ្ណោះ។ លោកបន្ថែមថាក្រៅពីព្រមព្រៀងក្នុងការតភ្ជាប់ ភាគីប្រទេសថៃក៏យល់ព្រមផ្តល់ដែកសម្រាប់ធ្វើផ្លូវរថភ្លើងដែលមានប្រវែង៦០គីឡូម៉ែត្រមកកាន់កម្ពុជាផងដែរ។

ពេលយើងចុះកិច្ចព្រមព្រៀងចប់ ហើយយើងនឹងគោរពអញ្ចើញ សម្តេចតេជោនាយករដ្ឋមន្ត្រី គាត់អញ្ចើញនាយករដ្ឋមន្ត្រីគាត់ជិះរទេះភ្លើង ឆ្លងកាត់ព្រំដែនហើយថ្ងៃនោះគាត់ហ្នឹងប្រគល់ក្បាលរទេះភ្លើង១ និងទូរទេះភ្លើង៤ ហៅថា DMU មកឲ្យយើងបើអាចដឹកដែកមកឲ្យយើង គាត់ក៏ដឹកដែកមកឲ្យយើងតែម្តង។ […] យើងនឹងពិភាក្សា រទេះភ្លើងគាត់អាចមកដល់ប៉ោយប៉ែត ឬមកដល់ស៊ីសុផុន យើងអាចទៅដល់អារញ្ញប្រថេត ឬយើងអាចចូលដល់កន្លែងណា? យើងកំពុងរកឯកភាពគ្នាថាគាត់មកដល់ណាយើងមកដល់ណា? តែប៉ុហ្នឹងទេ

រដ្ឋមន្ត្រីក្រសួងសាធារណការលោក ស៊ុន ចាន់ថុល

រដ្ឋមន្ត្រីក្រសួងសាធារណការថៃលោក Arkhom Permpittayapaisith មានប្រសាសន៍ថាការតភ្ជាប់ផ្លូវរថភ្លើងរវាងកម្ពុជា ថៃ នឹងអាចផ្តល់ផលប្រយោជន៍ជាច្រើនដល់ភាគីទាំងពីរ ពិសេសគឺការធ្វើពាណិជ្ជកម្ម។

យើងអាចបង្កើនការដឹកជញ្ជូនរវាងប្រទេសទាំងពីរ ដូចជាផលិតផលចំណីអាហារ សំភារៈសំណង់ ឬប្រេងជាដើម។ វានឹងធ្វើឲ្យមានការរីកចំរើនក្នុងការដឹកជញ្ជូន ក៏ដូចជាភ្ជាប់រវាងប្រជាពលរដ្ឋ នឹងប្រជាពលរដ្ឋដូចគ្នា។ ខ្ញុំសូមអរគុណដល់រដ្ឋមន្ត្រីក្រសួងសាធារណការកម្ពុជា ដែលធ្វើឲ្យសម្រេចបានការព្រមព្រៀងនេះ

រដ្ឋមន្ត្រីក្រសួងសាធារណការថៃលោក Arkhom Permpittayapaisith

អនុស្សរណៈនៃការយោគយល់គ្នា(MOU) អំពីការតភ្ជាប់ផ្លូវដែកកម្ពុជា ថៃ ត្រូវបានចុះហត្ថលេខាតាំងពីឆ្នាំ២០១៥ មកម្លេះ ហើយកម្ពុជាធ្លាប់បានប្រកាសថានឹងតភ្ជាប់ឲ្យបាននៅត្រឹមចុងឆ្នាំ២០១៦ តែគម្រោងនេះបានអូសបន្លាយរហូតមកដល់ពេលនេះ។

ការតភ្ជាប់នេះស្ថិតក្នុងក្របខ័ណ្ឌផ្លូវដែកសិង្ហបុរី-គុនមីងដែលនឹងតភ្ជាប់ពីប្រទេសសិង្ហបុរី ម៉ាឡេស៊ី ថៃ វៀតណាម ទៅកាន់ខេត្តគុនមីងប្រទេសចិន។

ប្រទេសកម្ពុជាមានផ្លូវដែក ២ ខ្សែគឺខ្សែទី ១ ពីភ្នំពេញទៅក្រុងប៉ោយប៉ែតមានចម្ងាយ ៣៨៦ គីឡូម៉ែត្រ និងខ្សែទី ២ ពីភ្នំពេញទៅកំពង់ផែក្រុងព្រះសីហនុមានចម្ងាយ ២៦៦ គីឡូម៉ែត្រ។

ចំណែកកំណាត់ផ្លូវដែកខេត្តពោធិ៍សាត់ មកភ្នំពេញដែលបើកដំណើរការបណ្តោះអាសន្នកាលពីថ្ងៃទី ៤ កក្កដា មានប្រវែង ១៦៦ គីឡូម៉ែត្រ៕

រក្សាសិទ្វិគ្រប់យ៉ាងដោយ ស៊ីស៊ីអាយអឹម

សូមបញ្ជាក់ថា គ្មានផ្នែកណាមួយនៃអត្ថបទ រូបភាព សំឡេង និងវីដេអូទាំងនេះ អាចត្រូវបានផលិតឡើងវិញក្នុងការបោះពុម្ពផ្សាយ ផ្សព្វផ្សាយ ការសរសេរឡើងវិញ ឬ ការចែកចាយឡើងវិញ ដោយគ្មានការអនុញ្ញាតជាលាយលក្ខណ៍អក្សរឡើយ។
ស៊ីស៊ីអាយអឹម មិនទទួលខុសត្រូវចំពោះការលួចចម្លងនិងចុះផ្សាយបន្តណាមួយ ដែលខុស នាំឲ្យយល់ខុស បន្លំ ក្លែងបន្លំ តាមគ្រប់ទម្រង់និងគ្រប់មធ្យោបាយ។ ជនប្រព្រឹត្តិ និងអ្នកផ្សំគំនិត ត្រូវទទួលខុសត្រូវចំពោះមុខច្បាប់កម្ពុជា និងច្បាប់នានាដែលពាក់ព័ន្ធ។