តុលាការក្រុងភ្នំពេញកាលពីម្សិលមិញ បានសម្រេចចោទប្រកាន់ស្រ្ដីស៊ីឈ្នួលពរពោះ៣២នាក់ ដោយចោទពីបទការជួញដូរមនុស្សដោយឆ្លងដែន ដែលស្ថិតក្នុងមាត្រា ១៦ នៃច្បាប់ស្តីពីការបង្ក្រាបការជួញដូរមនុស្ស និង អំពើធ្វើអាជីវកម្មផ្លូវភេទ។
អ្នកនាំពាក្យតុលាការក្រុង លោក អ៊ី រិន បានប្រាប់វីអូឌីនៅថ្ងៃនេះថា ចៅក្រមតុលាការក្រុងភ្នំពេញបានសម្រេចចោទប្រកាន់ស្រី៣២នាក់ក្នុងចំណោម៣៣នាក់ដែលបានឃាត់ខ្លួនកាលពីថ្ងៃទី២១ ខែ មិថុនា ឆ្នាំ២០១៨ រួមជាមួយមេខ្យល់៥នាក់ នៅខណ្ឌឬស្សីកែវ ក្រុង ភ្នំពេញ។
លោ អ៊ី រិន បានបន្ថែមទៀតថា ស្រ្ដីទាំង៣២នាក់ នៅពេលនេះកំពុងឃុំខ្លួនបណ្ដោះអាសន្ននៅមណ្ឌលកែប្រែទី២។
ទាក់ទងនឹងករណីនេះដែរ នៅថ្ងៃទី២៨ ខែមិថុនា ឆ្នាំ២០១៨ បានសម្រេចចោទប្រកាន់ស្រី្តខ្មែរបួននាក់ និងបុរសជនជាតិចិនម្នាក់ ដែលជាប់ពាក់ព័ន្ធនឹងការពពោះជំនួស។