នាយកដ្ឋានប្រយុទ្ធនឹងជំងឺឆ្លងនៃក្រសួងសុខាភិបាល បានអំពាវនាវឲ្យ ប្រជាពលរដ្ឋកម្ពុជាប្រុងប្រយ័ត្នពីជំងឺផ្ដាសាយជ្រូក H1N1 ក្នុងរដូវវស្សា ខណៈដែលថ្មីៗនេះ ប្រទេសជិតខាងបានប្រកាសសារជាថ្មីពីការរីករាលដាលជំងឺផ្ដាសាយជ្រូក ឬជំងឺផ្ដាសាយធំនេះ។
យោងទៅតាមបណ្ដាញសង្គមហ្វេសប៊ុករបស់នាយកដ្ឋានប្រយុទ្ធនឹងជំងឺឆ្លង (CDC) បានឲ្យដឹងថា នាយកដ្ឋានទទួលបានរបាយការណ៍ពីការកើនឡើងនៃជំងឺផ្ដាសាយធំនៅកម្ពុជា ដែលក្នុងនោះក៏មានឃើញវិជ្ជមានមេរោគផ្ដាសាយ H1N1 ផងដែរ តែពុំទាន់ឃើញករណីធ្ងន់ធ្ងរនៅឡើយទេ។
តាមរយៈការសិក្សា ស្រាវជ្រាវរបស់នាយកដ្ឋានប្រយុទ្ធនឹងជំងឺឆ្លង រដូវភ្លៀងជារដូវមួយដែលមានឆ្លងជំងឺផ្ដាសាយធំច្រើន ដែលបង្កឡើងដោយមេរោគផ្ដាសាយច្រើនប្រភេទ។ អ្នកជំងឺដែលមានជំងឺផ្តាសាយធំអាចវិវត្តន៍ទៅជំងឺធ្ងន់ធ្ងរមានកុមារអាយុក្រោម៥ឆ្នាំ
មនុស្សចាស់លើសពី៦៥ឆ្នំា ស្រ្តីមានផ្ទៃពោះ និងអ្នកមានជំងឺរ៉ាំរ៉ៃ។
អ្នកនាំពាក្យក្រសួងសុខាភិបាល បានណែនាំប្រជាពលរដ្ឋត្រូវឧស្សាហ៍លាងដៃជាមួយសាប៊ូនិងទឹក លាងជាមួយអាល់កុល ឬថ្នាំហ្សែល ហើយនៅឲ្យឆ្ងាយពីអ្នកផ្ដាសាយលើសពី១ម៉ែត្រ ជាពិសេសឲ្យអ្នកជំងឺផ្ដាសាយពាក់ម៉ាស់ និងលាងដៃសាប៊ូ និងទឹកផងដែរ។
នៅក្នុងសេចក្ដីថ្លែងការណ៍ខាងលើ ក្រសួងសុខាភិបាលក៏បានប្រាប់ពីរោគសញ្ញាជំងឺផ្ដាសាយធំនេះរួមមាន គ្រុនក្ដៅលើសពី ៣៨.៥ អង្សាសេ និងមានក្អក ឬឈឺក និងករណីខ្លះអាចវិវត្តន៍ទៅហត់។
របាយការណ៍ពីអង្គការសុខភាពពិភពលោកឆ្នាំ២០០៩បានឲ្យដឹងថា ជម្ងឺផ្ដាសាយជ្រូកបានបណ្ដាលឲ្យមនុស្សស្លាប់បាត់បង់ជីវិតសរុប ១៨០៩៧ នាក់ នៅជុំវិញពិភពលោក។