តំណាងបេសកម្មជប៉ុនប្រចាំក្រុមប្រឹក្សាសិទ្ធិមនុស្សអង្គការសហប្រជាជាតិ បានថ្លែងទៅកាន់កិច្ចប្រជុំនៅក្រុមប្រឹក្សាសិទ្ធិមនុស្សកាលពីសប្តាហ៍មុន ដោយជំរុញឲ្យគណបក្សនយោបាយធំៗនៅកម្ពុជា ចរចារនយោបាយឡើងវិញ នៅមុនការបោះឆ្នោតនៅចុងខែនេះ។
តំណាងប្រទេសជប៉ុន លោកស្រី Mitsuko Shino បានថ្លែងក្នុងកិច្ចប្រជុំលើកទី ៣៥ នៃក្រុមប្រឹក្សាសិទ្ធិមនុស្ស នៅទីក្រុងហ្សឺណែវ កាលពីថ្ងៃទី៥ កក្កដា ដោយថា ប្រទេសជប៉ុនបានព្រួយបារម្ភចំពោះស្ថានភាពនយោបាយ និងសិទ្ធិសេរីភាពសង្គមស៊ីវិលនៅកម្ពុជា បន្ទាប់ពីរដ្ឋាភិបាលកម្ពុជាបានសម្រេចរំលាយបក្សសង្គ្រោះជាតិចេញពីឆាកនយោបាយ។
តំណាងប្រទេសជប៉ុនរូបនេះ បានជំរុញឲ្យមានការចរចារនយោបាយនៅកម្ពុជាឡើងវិញ ដើម្បីធានាដល់ការបោះឆ្នោតនាពេលខាងមុខ។
តំណាងបេសកម្មជប៉ុនប្រចាំក្រុមប្រឹក្សាសិទ្ធិមនុស្សអង្គការសហប្រជាជាតិ លោកស្រី Mitsuko Shino
នៅថ្ងៃជាមួយគ្នានោះ តំណាងកម្ពុជាប្រចាំអង្គការសហប្រជាជាតិ លោក ណី សំអុល បានឆ្លើយតបវិញថា កម្ពុជាបច្ចុប្បន្ន បានអនុវត្តយ៉ាងត្រឹមត្រូវនូវលិទ្ធិប្រជាធិបតេយ្យសេរីពហុបក្ស ហើយពលរដ្ឋមានសិទ្ធិបោះឆ្នោតជ្រើសតំណាងខ្លួនដោយសេរី។ លោកបន្ថែមថា ការចង់ឲ្យកម្ពុជារក្សាបាននូវការបោះឆ្នោតដោយសេរី និងយុត្តិធម៌ អន្តរជាតិ និងអ្នកព្រួយបារម្ភទាំងនោះផ្តល់ការគាំទ្រ និងឧបត្ថម្ភមកកម្ពុជានៅក្នុងការបោះឆ្នោតខាងមុខនេះឲ្យកាន់តែខ្លាំង។
តំណាងកម្ពុជាប្រចាំអង្គការសហប្រជាជាតិ លោក ណី សំអុល
អ្នកនាំពាក្យគណបក្សប្រជាជនកម្ពុជា លោក សុខ ឥសាន ចាត់ទុកថា ការលើកឡើងរបស់ប្រទេសជប៉ុន គឺគ្រាន់តែជាការបញ្ចេញមតិតែប៉ុណ្ណោះ ដែលមិនអាចចាប់បង្ខំឲ្យកម្ពុជាធ្វើតាមការលើកឡើងនេះបាននោះទេ។
អ្នកនាំពាក្យគណបក្សប្រជាជនកម្ពុជា លោក សុខ ឥសាន
ប្រទេសជប៉ុនបានជំរុញជាបន្តបន្ទាប់មករដ្ឋាភិបាលកម្ពុជា ឲ្យរៀបចំការបោះឆ្នោតមួយដែលអាចឆ្លុះបញ្ចាំងពីឆន្ទៈរបស់ប្រជាពលរដ្ឋ ខណៈដែលជប៉ុនលើកឡើងផងដែរថា មិនចង់ឃើញកម្ពុជាប្រឈមមុខនឹងការរិះគន់ពីអន្តរជាតិនោះឡើយ។
កាលពីខែមេសាកន្លងទៅ ប្រធានក្រុមអ្នកវិភាគវ័យក្មេងលោកហង្ស វិទូ លើកឡើងថា ការដែលជប៉ុនព្យាយាមជំរុញកម្ពុជាម្តងហើយម្តងទៀត ឲ្យស្តារប្រជាធិបតេយ្យឡើងវិញនេះ លោកថា ទំនងជាជប៉ុនដឹងមុនថា ខ្លួនកំពុងតែឈរនៅចំណុចណា ហើយកម្ពុជាកំពុងត្រូវការអ្វីពិតប្រាកដពីជប៉ុន។
ប្រធានក្រុមអ្នកវិភាគវ័យក្មេងលោកហង្ស វិទូ
ស្ថានការណ៍នយោបាយ និងបញ្ហាសិទ្ធិមនុស្សនៅកម្ពុជា ត្រូវបានវាយតម្លៃដោយក្រុមសិទ្ធិមនុស្សអន្តរជាតិថា កាន់តែអាក្រក់ទៅនៅមុនការបោះឆ្នោតខែកក្កដានេះ។
ប្រទេសលោកសេរីមួយចំនួន រួមមាន សហរដ្ឋអាមេរិក សហភាពអឺរ៉ុប និងប្រទេសចំនួន ៤៥ នៅក្រុមប្រឹក្សាសិទ្ធិមនុស្សអង្គការសហប្រជាជាតិ បានព្រមានថា ការបោះឆ្នោតខាងមុខ ពុំអាចទទួលយកបានឡើយ បើគ្មានគណបក្សសង្គ្រោះជាតិ៕