អង្គការអន្ដរជាតិមួយ បានទទូចជាថ្មីឲ្យអាជ្ញាធរកម្ពុជាដោះលែងសកម្មជនដីធ្លីតំបន់បឹងកក់ អ្នកស្រី ទេព វន្នី បន្ទាប់ពីអ្នកស្រី ត្រូវបានចាប់ដាក់ពន្ធនាគារជិត ២ឆ្នាំមកហើយនោះ។
យោងតាមការចេញផ្សាយលើគេហទំព័រនៅថ្ងៃនេះ អង្គការលើកលែងទោសអន្ដរជាតិ (Amnesty International) បានទាមទារជាថ្មីទៀតឲ្យដោះលែងអ្នកស្រី ទេព វន្នី ដោយថា សកម្មជនដីធ្លីរូបនេះបានធ្វើការតវ៉ាដោយសន្ដិវិធី ដើម្បីការពារផលប្រយោជន៍សហគមន៍ ប្រឆាំងនឹងគម្រោងអភិវឌ្ឍន៍ដែលធ្វើឲ្យពលរដ្ឋរាប់រយគ្រួសារបាត់បង់ផ្ទះសម្បែង។
អ្នកស្រី ទេព វន្នី ត្រូវអាជ្ញាធររាជធានីភ្នំពេញចាប់ខ្លួន កាលពីថ្ងៃទី១៥ ខែសីហា ឆ្នាំ២០១៦ នៅពេលអ្នកស្រីចូលរួមយុទ្ធនាការថ្ងៃចន្ទពណ៌ខ្មៅ ដែលទាមទារឲ្យដោះលែងមន្ត្រីអាដហុក ៤រូប និងមន្ត្រី គ.ជ.ប.មួយរូប ព្រមទាំងជំរុញទៅរដ្ឋាភិបាល ឲ្យវែកមុខរកឃាតករពិត នៅពីក្រោយការបាញ់សម្លាប់លោក កែម ឡី។
ប៉ុន្តែ នៅថ្ងៃទី២៣ ខែកុម្ភៈ ឆ្នាំ២០១៧ សាលាដំបូងរាជធានីភ្នំពេញ បានសើរើសំណុំរឿងចាស់កាលពីឆ្នាំ២០១៣ មកចោទប្រកាន់អ្នកស្រី ទេព វន្នី ដោយចោទពីបទ «ប្រព្រឹត្តហិង្សាដោយចេតនាមានស្ថានទម្ងន់ទោស» និងផ្តន្ទាទោសដាក់គុក ២ឆ្នាំកន្លះ(៣០ខែ)ពិន័យប្រាក់ ៥លានរៀល និងបង្គាប់ឲ្យបង់ប្រាក់ទៅដើមបណ្តឹងជាសន្តិខណ្ឌដូនពេញ ចំនួន ៩លានរៀល៕