បទ​យកការណ៍​​៖​ មធ្យោយបាយ​ធ្វើ​ដំណើរ​សាធារណៈ​បាន​ដាក់​ដំណើរការ​ជា​បន្ដបន្ទាប់​ ​ប៉ុន្ដែ​ការ​កក​ស្ទះ​នៅ​តែ​ជា​បញ្ហា​

មធ្យោយបាយធ្វើដំណើរសាធារណៈ​ បានឲ្យដាក់ដំណើរការប្រើប្រាស់ជាផ្លូវការតាំងពីឆ្នាំ​២០១៧​​​ នៅក្នុងរាជធានីភ្នំពេញ​ ដែលចាប់ផ្ដើមដំបូងជាប្រភេទរថយន្តក្រុងសាធារណៈ ហើយនៅក្នុងឆ្នាំនេះដែរ មធ្យោបាយធ្វើដំណើរសាធារណៈបានដាក់ឲ្យប្រើប្រាស់បន្ថែមទៀត រួមមាន រថភ្លើង​​​និងនាវាដឹកជញ្ចូនសាធារណៈ ដើម្បីកាត់បន្ថយការកកស្ទះចរាចរណ៍។ ​​​

សាលារាជធានីភ្នំពេញរំពឹងថា មធ្យោយបាយធ្វើដំណើរសាធារណៈ ដែលបានដាក់ឲ្យប្រើប្រាស់ជាបន្តបន្ទាប់ទាំងនេះ អាចកាត់បន្ថយការកកស្ទះចរាចរណ៍ ក៏ប៉ុន្តែតែចំនួនអ្នកប្រើប្រាស់មធ្យោបាយនេះនៅមានកម្រិតទាបនៅឡើយ ដោយសារតែប្រជាពលរដ្ឋមានមធ្យោបាយធ្វើដំណើរផ្ទាល់ខ្លួន​ ហើយពួកគេគ្មានពេលវេលាគ្រប់គ្រាន់ក្នុងការរងចាំរថយន្តក្រុងដើម្បីធ្វើដំណើរ។

កំពុងអង្គុយពិសារកាហ្វេ​​​ នៅក្នុងហាងមួយក្នុងរាជធានីភ្នំពេញ លោក ឃូ សុភ័ណ្ឌ បុគ្គលិកក្រុមហ៊ុនឯកជន បានប្រាប់​ វី​.អូ.ឌី ថា លោកមិនដែលប្រើប្រាស់​​​មធ្យោបាយធ្វើដំណើរសាធារណៈម្ដងណាឡើយ ដោយសារតែគាត់មិនចង់ចំណាយពេលច្រើនក្នុងការធ្វើដំណើរ ហើយគាត់ចង់ប្រើមធ្យោបាយណារហ័សហើយមានប្រសិទ្ធិភាព។

ទោះបីជាការកកស្ទះ មានការប្រសើរតិចតួចយ៉ាងណាក្តី​ ក៏ប្រជាជនមួយចំនួនមានការសាទរ​​​ចំពោះការដាក់ឲ្យមានការអនុវត្តនៃការប្រើប្រាស់មធ្យោយបាយធ្វើដំណើរសាធារណះនេះដែរ​។

កម្មការនីរោងចក្រមួយរូប ដែលសុំមិនបញ្ចេញឈ្មោះ បានសម្ដែងសេចក្ដីរីករាយចំពោះការដាក់ឲ្យ​​​ប្រើប្រាស់មធ្យោបាយធ្វើដំណើរសាធារណៈនេះ ដោយសារតែវាមានសុវត្ថិភាពជាងមធ្យោបាយដ៏ទៃ ហើយតម្លៃសមរម្យ ផ្ទុយពីការប្រើប្រាស់ម៉ូតូ ឬរឺម៉កកង់បីដែលត្រូវចំណាយថវិកាច្រើនក្នុងការធ្វើដំណើរម្ដងៗ។​​​ អ្នកស្រីប្រើប្រាស់រថយន្តក្រុងជាប្រចាំ​​​​​​នៅពេលចេញពីធ្វើការ ពីព្រោះពេលព្រឹកគាត់ត្រូវទៅដល់រោងចក្រម៉ោង៧ព្រឹក ដែលមិនអាចធ្វើដំណើរតាមឡានក្រុងបានទាន់ពេលវេលានោះឡើយ។

កម្មការនី ដដែលនេះបានលើកឡើងថា ការកាត់បន្ថយមធ្យោបាយធ្វើដំណើរឯកជន វាអាចជួយកាត់បន្ថយការកកស្ទះបានតិចតួចប៉ុណ្ណោះ។ តែអ្វីដែលសំខាន់ អ្នកបើកបរគ្រប់រូបត្រូវគោរពច្បាប់ចរាចរណ៍។

អ្នកនាំពាក្យសាលារាជធានីភ្នំពេញ លោក ម៉េត មាសភក្ដី បានលើកឡើងថា ការកកស្ទះចរាចរណ៍ក្នុងក្រុងភ្នំពេញ ដោយសារកំណើនប្រជាជន ​​​  និង

យានយន្តគ្រប់ប្រភេទ ហើយជាពិសេសប្រជាពលរដ្ឋ​​​មួយចំនួនពុំបានគោរពច្បាប់ចរាចរណ៍។ បច្ចុប្បន្ននេះចំនួនរថយន្ដនៅក្នុងក្រុងភ្នំពេញមានប្រមាណជាង៥០ម៉ឺនគ្រឿង និង ម៉ូតូចំនួន ១.៥លានគ្រឿង។

លោក មាសភក្ដី បានកត់សំគាល់ថា មធ្យោបាយធ្វើដំណើរសាធារណៈបានទទួលការគាំទ្រ និងការលើកទឹកចិត្តពីសំណាក់ប្រជាពលរដ្ឋ ដោយសាររបាយការណ៍នៃចំនួនអ្នកប្រើប្រាស់បានកើនឡើងជាលំដាប់បើធៀបពីការដាក់ដំណើរការជាលើកដំបូង។

កាលពីថ្ងៃទី ៦​ ខែមេសា ឆ្នំ២០១៨ លោក ស៊ុន ចាន់ថុល រដ្ឋមន្រ្ដីក្រសួងសាធារណការ និងដឹកជញ្ជូន បានសម្ពោធ និងបានដាក់ឲ្យប្រើប្រាស់នាវាដឹកជញ្ជូនសាធារណៈព្រែកព្នៅ ភ្នំពេញ-តាខ្មៅ ដើម្បីសម្រួលដល់ការធ្វើដំណើររបស់ប្រជាពលរដ្ឋខ្មែរ។ ក្រសួងក៏បានបញ្ជាក់ថា ការដាក់ឲ្យប្រើប្រាស់ជាបណ្ដោះអាសន្ននេះ គឺពុំយកតម្លៃសេវាកម្មអ្វីឡើយ គិតចាប់ពីថ្ងៃដាក់ដំណើរការ​ រហូតដល់ថ្ងៃទី ០១ ខែសីហានេះ។

អ្នកបើកបរនាវាសាធារណៈ លោក ហួត មាន បានឲ្យដឹងថា ប្រជាជនភាគច្រើនប្រើប្រាស់នាវានេះសម្រាប់ការជិះសាកល្បងកម្សាន្ដតែប៉ុណ្ណោះ មិនបានប្រើប្រាស់ក្នុងការធ្វើដំណើរទៅធ្វើការឡើយ។

លោក ក៏បានបន្ដថា ថ្ងៃធម្មតាជាមធ្យមមានអ្នកជិះប្រហែល ១០នាក់ តែពេលល្ងាចមានចំនួនច្រើនជាងបន្ដិច រីឯថ្ងៃសោរ៍ និងថ្ងៃអាទិត្យ ជួនកាលមានប្រជាជនមកជិះច្រើនដល់លើសចំណុះទូកក៏មាន។

លោក ម៉េត មាសភក្ដី បានលើកឡើងថាសាលាក្រុងរាជធានីភ្នំពេញ​​​គ្រោងនឹងបន្ថែមចំនួនរថយន្តក្រុង និងពង្រីកខ្សែរត់របស់រថយន្ដក្រុងបន្ថែមទៀត ដើម្បីកាត់បន្ថយការកកស្ទះឲ្យមានប្រសិទ្ធិភាពខ្ពស់។ លោក មាសភក្តីក៏លើកទឹកចិត្តឲ្យប្រជាពលរដ្ឋប្រើប្រាស់មធ្យោបាយសាធារណៈកាន់តែច្រើនបន្ថែមទៀតដើម្បីកាត់បន្ថយការកកស្ទះ។​​​ បច្ចុប្បន្នសាលារាជធានីភ្នំពេញមានរថយន្តក្រុងសរុប ១៧៧គ្រឿង ក្នុងនោះ ៥៧គ្រឿផ្តល់ដោយក្រសួងសាធារណៈការ ១០០គ្រឿងជាអំណោយពីប្រទេសចិន និង២០គ្រឿងផ្សេងទៀតជាអំណោយពីប្រទេសជប៉ុន។

នៅថ្ងៃទី ១០ មេសា ឆ្នាំនេះ ក្រុមហ៊ុនរថភ្លើង រ៉ូយ៉ាល់រេលវេយ៍ ក៏បានដាក់ដំណើរការរថភ្លើងមួយខ្សែទៅកាន់ប្រលានយន្ដហោះអន្ដរជាតិដើម្បីសម្រួលដល់ការកកស្ទះចរាចរណ៍ ដោយពុំយកថ្លៃសេវា ទាំងភ្ញៀវជាតិ និងអន្ដរជាតិចំនួន៣ខែផងដែរ។