ធនាគារអភវឌ្ឍន៍អាស៊ី ADB បានប្រកាសផ្តល់កម្ចី៩០លានដុល្លារដល់កម្ពុជា សម្រាប់គម្រោងជួយដល់កម្ពុជាដើម្បីពង្រឹងភាពធន់នឹងអាកាសធាតុ និងធ្វើទំនើបកម្មវិស័យកសិកម្ម។
តាមការចុះផ្សាយលើគេហទំព័រធនាគារអភិវឌ្ឃន៍អាស៊ី ADB ចេញផ្សាយកាលថ្ងៃទី៤ កក្កដា គម្រោងនៃការផ្តល់កម្ចីនេះនឹងជំរុញដល់ការ បន្ស៊ាំអាកាសធាតុ នៃហេដ្ឋារចនាសម្ព័ន្ធកសិកម្មសំខាន់ៗ ដែលនឹងជួយដល់សង្វាក់ផលិតកម្ម ស្រូវ ពោត ក្តួច និងស្វាយដែលដាំដុះនៅ កម្ពុជា។
តាមរយៈជំនួយនេះ ADB អះអាងថានឹងធ្វើឲ្យប្រសើរឡើងវិញនូវប្រព័ន្ធធារាសាស្រ្ត ការគ្រប់គ្រងទឹក ការរៀបចំហេដ្ឋារចនាសម្ព័នផ្លូវថ្នល់ និងជំរុញការប្រើប្រាស់ថាមពលដែលអាចកើតឡើងវិញបានដូចជាថាមពលពន្លឺព្រះអាទិត្យជាដើម។
ADB រំពឹងថាគម្រោងនេះនឹងបញ្ចប់នៅត្រីមាសទី៣ ក្នុងឆ្នាំ២០២៤ខាងមុខ៕