ខួបពីរឆ្នាំនៃព្រឹត្តិការណ៍បាញ់សម្លាប់លោក កែម ឡី អ្នកតាមដានមួយចំនួន បង្ហាញការព្រួយបារម្ភថា ការសម្លាប់មនុស្សក្រៅច្បាប់អាចនៅតែបន្ត បើរដ្ឋាភិបាលមិនទាន់ចាប់បានអ្នកនៅពីក្រោយឃាតកម្មនេះ មកផ្តន្ទាទោស ។
អ្នកវិភាគនយោបាយ លោក កែម ឡី ត្រូវខ្មាន់កាំភ្លើងបាញ់សម្លាប់ នៅថ្ងៃទី១០ខែកក្កដាឆ្នាំ២០១៦ ក្នុងហាងស្តាម៉ាតមួយ របស់ស្ថានីយប្រេងឥន្ទះកាល់តិច ជាប់ស្តុបបូកគោ រាជធានីភ្នំពេញ។
ប៉ុន្តែ២ឆ្នាំមកនេះតុលាការបានផ្តន្ទាទោ បុរស់ម្នាក់គត់ឈ្មោះអឿត អាង ហៅ ជួប សម្លាប់ ឲ្យជាប់គុកអស់មួយជីវិត ដោយចោទថា ជាខ្មាន់កាំភ្លើងបាញ់សម្លាប់លោក កែម ឡី។
ក្រោយចាប់ខ្លួន សមត្ថកិច្ចប្រាប់អ្នកសារព័ត៌មានថា អាវុធខ្លីរបស់ជនដៃដល់ទំនើបហើយមានតម្លៃថ្លៃ ទិញពីប្រទេសថៃ ។ចំណែកជនជាប់ចោទ ជួប សម្លាប់ ឆ្លើយសារភាពប្រាប់នគរបាលយុត្តិធម៌ ថា មូលហេតុនៃការបាញ់សម្លាប់ មកពីលោក កែម ឡី ជំពាក់លុយ៣០០០ដុល្លារមិនសង។
ប៉ុន្តែអ្នកតាមដាន អះអាងថា ជនជាប់ចោទម្នាក់នេះ មិនអាចរៀបចំផែនការណ៍តែម្នាក់ឯងសម្លាប់ អ្នកវិភាគដែលរិះគន់រដ្ឋាភិបាលឥតសម្ចៃមាត់ លោក កែម ឡី នៅកណ្តាលទីក្រុងបានទេ។
អ្នកវិភាគនយោបាយជើងចាស់ លោក បណ្ឌិត ឡៅ ម៉ុងហៃ បង្ហាញការខកចិត្តទៅនឹងការអះអាងរបស់ជនជាប់ចោទ ជួប សម្លាប់នេះ។ហើយថា ការជំនុំជម្រះសំណុំរឿងនេះ តុលាការមិនបានបង្ហាញមុខអ្នកដឹងឮ រឿងជំពាក់លុយនោះទេ។លោកបន្តថា ការដែលអាជ្ញាធរខកខានបង្ហាញភស្តុតាងថ្មីៗ ដើម្បីកំណត់មុខសញ្ញាអ្នកពាក់ព័ន្ធ ជាកត្តាជំរុញឲ្យមានការសង្ស័យទៅលើវិធានការលុបបំបាត់និទណ្ឌភាពនៅកម្ពុជា ។
អ្នកវិគនយោបាយជើងចាស់ លោក បណ្ឌិត ឡៅ ម៉ុងហៃ
អ្នកវិភាគវ័យក្មេង លោក ហង្ស វិទូ និយាយថា ឃាតកម្មបាញ់សម្លាប់ លោក កែម ឡី នៅកណ្តាលទីក្រុង ទាំងកណ្តាលថ្ងៃ នៅកន្លែងដែលឡោមព័ទ្ធដោយកាមេរ៉ាសុត្ថិភាពនោះ លោកវិភាគថា ជនជាប់ចោទ ជួប សម្លាប់ តែម្នាក់ឯង មិនអាចរៀបចំផែនការបាញ់សម្លាប់លោក កែម ឡី បានទេ។
អ្នកវិភាគវ័យក្មេងរូបនេះ យល់ថា ការដែលតុលាការមិន បង្ហាញមុខអ្នកនៅពីក្រោយឃាតកម្មនេះ អាចថានិទណ្ឌភាពនៅកម្ពុជានៅតែចាក់ឬសជ្រៅ បើធៀបទៅនឹងឃាតកម្មបាញ់សម្លាប់ លោក ជា វិជ្ជា និងលោក ឈុត វុទ្ធី កាលជិត១០មុន ។
អ្នកវិភាគវ័យក្មេង លោក ហង្ស វិទូ
អ្នកវិភាគនយោបាយ លោក ឯម សុវណ្ណារ៉ា និយាយថា សំណុំរឿងដ៏រសើបមួយនេះ មិនអាចផ្តន្ទាទោសតែខ្មាន់កំាភ្លើងម្នាក់ ធ្វើឲ្យមហាជនដែលមានភក្តីភាពរបស់លោក កែម ឡី ស្ងប់ចិត្តទេ ។លោកថា តែផ្ទុយទៅវិញបើសំណុំរឿងនេះគ្មានជនដៃដល់ណាផ្សេងទៀត ត្រូវតុលាការនាំខ្លួនមកផ្តនញទាទោសនោះទេ លោកគិតថា អ្នកស្រឡាញ់លោក កែម ឡី នឹងនៅតែគិតថា យុត្តិធម៌សង្គមនឹងមិនកើតមានសម្រាប់មនុស្សទូទៅទេ ។
អ្នកវិភាគនយោបាយ លោក ឯម សុវណ្ណារ៉ា
ជាងនេះទៅទៀត ប្រធានអតីតគណបក្សសង្គ្រោះជាតិ លោក សម រង្ស៊ី ធ្លាប់ចោទរដ្ឋាភិបាលថា ជាអ្នកនៅពីក្រោយឃាតកម្មនេះនិងធ្លាប់ជំរុញឲ្យបញ្ជូលអ្នកជំនាញអន្តរជាតិបានចូលរួមសហការណ៍ជាមួយអាជ្ញាធរកម្ពុជាដើម្បីស្វែងរកការពិតករណីឃាតកម្មនេះ។ប៉ុន្តែសំណើនេះត្រូវបានក្រសួងមហាផ្ទៃច្រានចោល។
អ្នកនាំពាក្យក្សសួងយុត្តិធម៌ លោក ជិន ម៉ាលីន លើកឡើងថា ការយល់ឃើញរបស់ក្រុមអ្នកវិភាគ ហាក់មាននិន្នាការនយោបាយ គាំទ្រអតីតបក្សប្រឆាំង។ លោកអះអាងថា សំណុំរឿងបាញ់សម្លាប់លោក កែម ឡី នេះតុលាការកំពុងជំរុញនីតិវិធីស្វែងរកអ្នកពាក់ព័ន្ធ។ប៉ុន្តែលោកសុំមិនបញ្ជាក់ថាមានអ្នកពាក់ព័ន្ធណាខ្លះបានរកឃើញរយៈពេល២ឆ្នាំមកនេះ ដោយថានេះជារឿងសម្ងាត់ របស់តុលាការ។
អ្នកនាំពាក្យក្សសួងយុត្តិធម៌ លោក ជិន ម៉ាលីន
លោកនាយករដ្ឋមន្ត្រី កាលពីថ្ងៃទី១៦ខែមិនា បានប្រាប់ពលរដ្ឋខ្មែរនៅអូស្ត្រាលីថា អ្នកដែលបាញ់សម្លាប់ លោក កែម ឡី ជាចារកម្មអាមេរិក។
ទោះជាយ៉ាងណាក្នុងថ្ងៃខួប២ឆ្នាំនេះ ស្ថានទូតអាមេរិកប្រចាំកម្ពុជា បានសរសេរនៅលើបណ្ដាញTwitter របស់ខ្លួន ថា ពួកគេសូមចូលរួមរំលែកទុក្ខជាមួយគ្រួសារនឹងមិត្តភក្ដិរបស់លោក កែម ឡី ហើយសហរដ្ឋអាមេរិកនៅតែសង្ឃឹមថាគ្រួសារនឹងមិត្តភក្ដិរបស់លោក កែម ឡី នឹងទទួលបានយុត្តិធម៌។
ចំណែកអង្គការសិទ្ធិមនុស្សអន្ដរជាតិ (Human Rights Watch) កាលពីថ្ងៃម្សិលមិញ ក៏បានទាមទារឲ្យរដ្ឋាភិបាល អញ្ជើញឧត្តមស្នងការអង្គការសហប្រជាជាតិប្រចាំនៅកម្ពុជា ជួយបើកការស៊ើបអង្កេតឯករាជ្យក្នុងករណីឃាតកម្មលោកបណ្ឌិត កែម ឡី នេះ និងថា អាជ្ញាធរកម្ពុជា មិនទាន់បានស៊ើបអង្កេតស៊ីជម្រៅចំពោះករណីនេះនោះទេ។