មន្ត្រីនគរបាលបានឲ្យដឹងថា បុរសជនជាតិខ្មែរ ៣នាក់ទៀត ត្រូវបានចាប់ខ្លួននៅទីតាំងបីកន្លែងផ្សេងគ្នានៅរាជធានីភ្នំពេញ ជាមួយនឹងគ្រឿងញៀនដល់ទៅ ២៦គីឡូក្រាម ពាក់ព័ន្ធនឹងការដឹកជញ្ជូនគ្រឿងញៀនដល់ទៅ ១២០គីឡូក្រាមកាលពីចុងខែមុន។
នាយកមន្ទីរប្រឆាំងគ្រឿងញៀន នៃក្រសួងមហាផ្ទៃ លោក ឡឹក វណ្ណៈ បានប្រាប់វីអូឌីកាលពីថ្ងៃម្សិលមិញថា ជនសង្ស័យជួញដូរគ្រឿងម្នាក់ ត្រូវបានចាប់ខ្លួននៅម្ដុំរង្វង់មូលកាំកូស៊ីធី ជនសង្ស័យម្នាក់ទៀត ត្រូវបានចាប់ខ្លួននៅក្នុងខណ្ឌពោធិ៍សែនជ័យ និងជនសង្ស័យទី៣ ត្រូវបានចាប់ខ្លួននៅឯខណ្ឌសែនសុខ។
មន្ត្រីនគរបាលរូបនេះ បានឲ្យដឹងទៀតថា សមត្ថកិច្ចក៏បានរឹបអូសបានគ្រឿងញៀន ២៦គីឡូក្រាមផងដែរ ក្រោយពីជនសង្ស័យទាំង ៣នាក់នោះ ត្រូវបានសមត្ថកិច្ចចាប់ខ្លួន កាលពីថ្ងៃទី០៦ ខែកក្កដា។
លោក ឡឹក វណ្ណៈ បានប្រាប់ថា ជនសង្ស័យទាំង ៣នាក់នោះ ជាប់ពាក់ព័ន្ធទៅនឹងការដឹកជញ្ជូនគ្រឿងញៀន ១២០គីឡូក្រាម ពីច្រកព្រំដែនអន្តរជាតិត្រពាំងក្រៀល ដែលត្រូវបានសមត្ថកិច្ចចាប់បានកាលពីថ្ងៃទី២៦ ខែមិថុនាកន្លងមកនេះ៕