មន្ត្រីជាន់ខ្ពស់គណបក្ស ហ្វ៊ុន ស៊ិនប៉ិច បានឲ្យដឹងថា ស្ថានភាពព្រះរាជសុខភាព សម្តេចក្រុមព្រះមានភាពប្រសើរឡើង ហើយគ្រោងវិលត្រឡប់មកកម្ពុជាវិញសប្តាហ៍ក្រោយ។
អ្នកនាំពាក្យគណបក្ស ហ្វ៊ុន ស៊ិនប៉ិច លោក ញ៉េប ប៊ុនជិន ប្រាប់វិអូឌីនៅថ្ងៃនេះថា ព្រះរាជសុខភាពរបស់សម្តេចក្រុមព្រះបានប្រសើរឡើងជាលំដាប់។ លោកបន្តថា បើទោះជាសុខភាពប្រសើរឡើងតែព្រះអង្គមិនអាចចូលរួមឃោសនាបោះឆ្នោតបានទេ។
លោក ញ៉េប ប៊ុនជិន បានបន្ថែមថា មកដល់ពេលនេះ សម្ដេចក្រុមព្រះនៅតែមិនទាន់ជ្រាបដំណឹងពីមរណភាពរបស់អ្នកម្នាង អ៊ុក ផល្លា នៅឡើយទេ។ ព្រះអង្គត្រឹមថា អ្នកម្នាងមានរបួស គង់នៅមន្ទីរពេទ្យផ្សេងប៉ុណ្ណោះ។
សម្ដេចក្រុមព្រះ និងអ្នកម្នាង បានជួបប្រទះនឹងគ្រោះថ្នាក់ចរាចរណ៍កម្រិតធ្ងន់ម្ដងរួចមកហើយកាលពីឆ្នាំ២០១៥ អំឡុងពេលធ្វើដំណើរត្រឡប់មកពីជួបអ្នកគាំទ្រគណបក្សរាជានិយមនៅឯខេត្តកំពង់ចាម។
ហើយនៅក្នុងឆ្នាំនេះ កាលពីថ្ងៃទី ថ្ងៃទី ១៧ ខែមិថុនា នៅក្នុងគ្រោះថ្នាក់ចរាចរណ៍លើកនេះបានឆក់យកជីវិតអ្នកម្នាងអ៊ុក ផល្លា នៅពេលដែលទ្រង់ស្ថិតក្នុងដំណើរចុះទៅជួបសំណេះសំណាលជាមួយសមាជិកគណបក្សហ៊្វុនស៊ិនប៉ិចនៅឯខេត្តកំពត និងបន្តដំណើរទៅខេត្តព្រះសីហនុ។
